மாணவர் முரசு
இ-பேப்பர்
விஜய்தான் தனக்குப் பிடித்தமான நடிகர் என்கிறார் இளம் நாயகி காஷ்மீரா பர்தேசி.
கடந்த 2018ஆம் ஆண்டு வெளியான 'சிவப்பு மஞ்சள் பச்சை' படத்தின் மூலம் தமிழில் அறிமுகமான இவர், அதில் ஜிவி.பிரகாஷ் ஜோடியாக நடித்திருந்தார்.
கொரோனா நெருக்கடி வேளையில், சில வாய்ப்புகள் தேடிவந்த போதும், அவற்றை ஏற்கவில்லையாம். தொற்றுப் பரவல் அச்சுறுத்தல் குறைந்தபிறகு, 'வசந்த முல்லை', 'வரலாறு முக்கியம்', 'அன்பறிவு', கன்னடத்தில் 'ரைடர்' என்று வரிசையாக பல படங்களை ஒப்புக்கொண்டு ஓய்வின்றி நடித்து வருகிறார் காஷ்மீரா.
"விஜய் சார் நடித்த படங்களை ஒன்றுவிடாமல் பார்த்துவிடுவேன். அவரது எளிமையான ஸ்டைல் எனக்குப் பிடித்தமானது.
அவருடன் நடிக்க வாய்ப்பு கிடைத்தால், மற்ற படங்களை ஒதுக்கிவிட்டு, அதற்கு முன்னுரிமை அளிப்பேன்," என்கிறார் காஷ்மீரா.
'வசந்த முல்லை' படம் குறித்து?
"இது ஒருவகையில் மனோதத்துவ ரீதியிலான ஒரு திகில் படம். பாபி சிம்ஹாதான் நாயகன். இருவரும் தம்பதியராக நடித்துள்ளோம். கணவனுக்கு அனைத்து வகையிலும் ஆதரவு அளிக்கும் மனைவியாக நடித்தது நல்ல அனுபவமாக இருந்தது.
"அதேசமயம் கார் துரத்தல் காட்சிகள், நெடுஞ்சாலையில் நடக்கும் பரபரப்புச் சம்பவங்கள் என்று இந்தப் படத்தில் வணிக ரீதியிலான அம்சங்களும் நிறையவே உள்ளன," என்கிறார்.
ஜீவாவுடன் நடிப்பது குறித்து?
"அவருக்கு ஜோடியாக 'வரலாறு முக்கியம்' படத்தில் நடிக்கிறேன். இதன் முதல்தோற்றச் சுவரொட்டி அண்மையில் வெளியானது.
"வண்ணமயமாகக் காட்சி அளிக்கும் அந்தச் சுவரொட்டிக்கு ரசிகர்களிடம் நல்ல வரவேற்பு கிடைத்திருப்பதாக படக்குழுவினர் தெரிவித்தபோது உற்சாகமாக இருந்தது. படமும் அப்படித்தான் இருக்கும்.
"முதன்முறையாக இதில் எனக்கு கேரளப் பெண் கதாபாத்திரம் அமைந்துள்ளது. கோவையில்தான் படப்பிடிப்பை நடத்தினர். தமிழ்த் திரையுலகில் ஒவ்வொரு படத்தையும் நன்கு திட்டமிட்டு படத்தை குறித்த நேரத்தில் முடிக்கிறார்கள்.
"அனைவரும் இயல்பாகப் பேசிப் பழகுகிறார்கள். இது எனக்குப் பிடித்திருக்கிறது," என்று சொல்லும் காஷ்மீரா, தற்போது ஒப்புக்கொண்டுள்ள படங்களை முடித்த பிறகே அடுத்தடுத்த வாய்ப்புகளை ஏற்பது என்று முடிவு செய்துள்ளாராம். ஆடை வடிவமைப்பில்தான் காஷ்மீராவுக்கு ஆர்வம் அதிகம். எதிர்காலத்தில் ஒரு நிறுவனம் தொடங்க வேண்டும் என விரும்புகிறார்.
"அதுவரை சும்மா இருக்க முடியாது அல்லவா... அதனால்தான் 'வொர்த்' என்ற பிராண்ட் ஒன்றை உருவாக்கி, ஓய்வு நேரங்களில் சில வடிவமைப்புகளை உருவாக்கி வருகிறேன். திரையுலகில் இருந்து விலகிய பின்னர் என்னிடம் இருந்து ரசிகர்களை மயக்கக்கூடிய வடிவமைப்புகள் வெளிவரும்," என்கிறார் காஷ்மீரா பர்தேசி.
சிறு குறிப்பு: காஷ்மீரா என்றால் அழகு என்று அர்த்தமாம்.