மாணவர் முரசு
இ-பேப்பர்
'வலிமை' படத்தின் வெளியீட்டையொட்டி தொடங்கிய அஜித் ரசிகர்களின் கொண்டாட்டம் இன்னும் குறையவில்லை. அந்தப் படம் ரூ.200 கோடி வசூல் செய்திருப்பதாக தயாரிப்பாளர் போனி கபூர் அறிவித்துள்ளார்.
இந்நிலையில், அஜித்தின் சம்பளம் நூறு கோடி ரூபாயைக் கடந்துள்ளதாக புதுத்தகவல் வெளியாகி உள்ளது.
அவரது 62வது படத்தை விக்னேஷ் சிவன் இயக்குவதும் அதில் நயன்தாரா நாயகியாக நடிப்பதும் தெரிந்த தகவல்கள். லைகா நிறுவனம் தயாரிக்கிறது.
இந்நிலையில், அஜித்தின் சம்பளம் திடீரென நூறு கோடி ரூபாயைக் கடந்ததன் பின்னணி குறித்து தற்போது தெரியவந்துள்ளது.
விக்னேஷ் சிவன் சொன்ன கதை அஜித்துக்குப் பிடித்துப்போன நிலையில், சத்யஜோதி ஃபிலிம்ஸ் தான் இந்தப் படத்தை தயாரிப்பதாக இருந்ததாம். இதற்கு அஜித்திடம் நடத்தப்பட்ட பேச்சுவார்த்தையில் ரூ.80 கோடி சம்பளம் என தீர்மானிக்கப்பட்டுள்ளது. அஜித் தரப்பும் இதற்கு சம்மதித்ததாகத் தகவல்.
இந்நிலையில், லைகா நிறுவனத்துக்கு இந்தத் தகவல் தெரியவர, அஜித்தை தங்கள் பக்கம் இழுத்துள்ளது அந்நிறுவனம் என்கிறார் கோடம்பாக்க மூத்த செய்தியாளர் ஆர்.எஸ். அந்தணன்.
லைகா நிறுவனத்துக்கு இந்தத் தகவலைச் சொன்னவர் நயன்தாரா தானாம். லைகா உரிமையாளர் சுபாஷ் கரன், நயன்தாராவின் நெருங்கிய நண்பர்களில் ஒருவர்.
"நீங்கள் பேச்சுவார்த்தை நடத்தினால் அஜித் கால்ஷீட் ஒதுக்க முன்வருவார், முயற்சி செய்யுங்கள்," என்றாராம் நயன்தாரா. அதையேற்று லைகா நிறுவனத்தார் அஜித்தை தொடர்பு கொண்டு பேச்சுவார்த்தை நடத்தி உள்ளனர். எடுத்த எடுப்பிலேயே ரூ.100 கோடி சம்பளம் என்று சொல்லப்பட, அஜித் சிறிய தயக்கத்துக்குப் பிறகு சம்மதித்தாராம். அந்த மகிழ்ச்சியில், "நீங்கள் கேட்டது நூறு கோடி.... அதற்கும் மேல் ஐந்து கோடியாகச் சேர்த்து மொத்தமாக 105 கோடி ரூபாய் தருவதாக ஒப்புக்கொண்டுள்ளது லைகா," என்கிறார் அந்தணன்.
நடிகர் விஜய் ஏற்கெனவே தன் சம்பளத்தை நூறு கோடியாக உயர்த்திவிட்டார். திரையுலகில் அவருக்குப் போட்டியாகக் கருதப்படும் அஜித் மட்டும் இவ்விஷயத்தில் தயங்கி வந்தார். இப்போது இருவருமே நூறு கோடி சம்பளப் பட்டியலில் இணைந்துள்ளனர்.
இதற்கிடையே இன்னொரு தகவலும் அண்மையில் கசிந்துள்ளது. கொரோனா இரண்டாவது அலை இந்தியாவில் கடுமையாக இருந்த வேளையில், அஜித்தும் விஜய்யும் ரகசியமாக சந்தித்துப் பேசியுள்ளனர் என்பதுதான் அந்தத் தகவல்.
"இதுகுறித்து யாரிடமும் அவர்கள் தெரிவிக்கவில்லை. குறைந்தபட்சம் தங்கள் உதவியாளர்களைக் கூட உடன் இருக்க அனுமதிக்கவில்லையாம். அப்படி என்ன ரகசியமாகப் பேசினார்கள் என்பது தெரியாது. ஆனால் அஜித்துக்கு நெருக்கமான ஒரு தயாரிப்பாளர்தான் இந்தத் தகவலைச் சொன்னார்.
"அஜித்தும் விஜய்யும் நல்ல நண்பர்கள் என்பதற்கு இதுபோன்ற சந்திப்புகள்தான் நல்ல ஆதாரம். அதேசமயம் தொழில் ரீதியில் தங்களுக்கு இடையே உள்ள போட்டியை இருவரும் தக்க வைத்துள்ளனர்," என்கிறார் அந்தணன்.
இதற்கிடையே 'வலிமை' படத்தை இணையத்தில் வெளியிட எதிர்த்து தொடுக்கப்பட்ட வழக்கு தள்ளுபடியானது. இதனால் திட்டமிட்டபடி அப்படம் ஓடிடியில் வெளியாகிறது.