மாணவர் முரசு
இ-பேப்பர்
'வலிமை', 'பீஸ்ட்', 'கேஜிஎஃப்' என்று அடுத்தடுத்து பிரம்மாண்ட படங்கள் வெளியீடு கண்டு வருவதால் சினிமா ரசிகர்கள் தொடர் கொண்டாட்டத்தில் உள்ளனர்.
இணையத்தளங்கள், சமூக ஊடகங்கள் என அனைத்திலும் இந்த மூன்று படங்களின் விமர்சனம், வசூல் நிலவரம் ஆகியவை குறித்த தகவல்கள் தொடர்ந்து இடம்பெற்று வருகின்றன.
எந்தப் படம் அதிகம் வசூல் கண்டுள்ளது என்பது தொடர்பாக இணையவாசிகள் நடத்தி வரும் வார்த்தைப் போரும் மோதலும் திகில் படத்தைவிட அதிக பயத்தையும் கவலையையும் தருகிறது.
'வலிமை' படத்தின் வசூல் அது வெளியான சில தினங்களிலேயே இருநூறு கோடி ரூபாயை கடந்துவிட்டது என்பதாக அதன் தயாரிப்பாளர் போனிகபூர் தெரிவித்திருந்தார். அடுத்து விஜய் நடித்த 'பீஸ்ட்' படம் இந்த வசூலை முறியடிக்குமா என்ற எதிர்பார்ப்பு அவரது ரசிகர்கள் மத்தியில் அளவுக்கு அதிகமாகவே இருந்தது.
இந்நிலையில் திரைகண்ட முதல் நாளன்றே 'பீஸ்ட்' படம் சுமார் 70 கோடி ரூபாயை உலகெங்கும் வசூல் செய்துள்ளதாக ஒரு தகவல் வெளியாகி உள்ளது.
இரண்டாம் நாளன்று நூறு கோடியைக் கடந்துவிட்ட நிலையில், நிச்சயமாக இருநூறு கோடியை எட்டிப்பிடிக்கும் என்று ஆணித்தரமாக அடித்துச் சொல்கிறார்கள் விஜய் ரசிகர்கள். இதே வேகத்தில் போனால், இருநூறு என்ற இலக்கைக் கடந்து 'பீஸ்ட்' புதிய வசூல் சாதனை படைக்கும் என்ற நம்பிக்கையும் விஜய் ரசிகர்களிடம் உள்ளது.
இதற்கிடையே அஜித் ரசிகர்கள் என்ன செய்து கொண்டிருப்பார்கள் என்பதுதான் உங்கள் கவலை என்றால், அதையும் பார்த்துவிடுவோம்.
'பீஸ்ட்' படத்துடன் கிட்டத்தட்ட இணைந்து வெளியீடு கண்டுள்ளது 'கேஜிஎஃப்'. இந்தப் படத்துக்கும் உலகெங்கும் உள்ள இந்திய சினிமா ரசிகர்கள் மத்தியில் வரவேற்பு கிடைத்துள்ளது.
நடிகர் யாஷ் நடிப்பில், பிரசாந்த் நீல் இயக்கத்தில் கடந்த 2019ஆம் ஆண்டு வெளியானது 'கேஜிஎஃப்'. யாரும் எதிர்பாராத வகையில் இந்தப் படம் விமர்சன, வசூல் ரீதியில் பெரிய வெற்றியைப் பெற்றது. இதையடுத்து 'கேஜிஎஃப்' இரண்டாம் பாகத்தை எடுக்க இருப்பதாக பிரசாந்த் நீல் அறிவித்தார்.
சூட்டோடு சூடாக பட வேலைகளைத் தொடங்கி, கடந்த ஆண்டே வெளியிட இருந்தார். ஆனால் கொரோனா விவகாரத்தால் இந்தப் படத்தின் வெளியீடும் ஒத்தி வைக்கப்பட்டது. இந்நிலையில் ஏப்ரல் 14ஆம் தேதி வெளியீடு கண்டது 'கேஜிஎஃப் 2'. இந்த இரண்டாம் பாகத்துக்கும் பலத்த எதிர்பார்ப்பு நிலவியதால், உலகெங்கும் சுமார் பத்தாயிரத்துக்கும் அதிகமான திரைகளில் படத்தை வெளியிட்டுள்ளனர்.
சரி... 'கேஜிஎஃப்' வசூல் நிலவரம் எப்படியாம்?
இது தொடர்பாக வெளியான தகவல்கள்தான் அஜித் ரசிகர்களை உற்சாகப்படுத்தி உள்ளது. காரணம், உலகம் முழுவதும் முதல்நாளன்றே சுமார் ரூ.150 கோடிக்கும் மேல் வசூல் கண்டுள்ளதாம் 'கேஜிஎஃப்'. தமிழகத்தில் மட்டும் ரூ. 7 கோடியும் கேரளாவில் ரூ. 6 கோடியும் வசூல் செய்துள்ளது.
'பீஸ்ட்' படம் சென்னையில் முதல் நாளன்று ரூ.2 கோடி வசூல் கண்ட நிலையில், அதையும் 'கேஜிஎஃப்' முறியடித்துவிட்டதாக கோடம்பாக்கத்து விவரப் புள்ளிகள் தெரிவிக்கின்றனர்.
அதேசமயம் இந்திய அளவில் திரையிடும் எண்ணத்துடன் தயாரிக்கப்பட்ட படம் என்பதால் 'கேஜிஎஃப்' படத்தின் தயாரிப்புச் செலவு அதிகம் என்றும் அதில் பிற மொழிக் கலைஞர்கள் பங்கேற்றுள்ளதையும் அவர்கள் சுட்டிக்காட்டுகின்றனர்.
"விஜய் படத்தில் தெலுங்கு நடிகர் கார்த்திகேயா மட்டுமே உள்ளார். 'கேஜிஎஃப்' படத்தில் சஞ்சய் தத் ரவீணா டாண்டன், பிரகாஷ்ராஜ் என்று பிறமொழி நடிகர்கள், தொழில்நுட்ப வல்லுநர்கள் எனப் பலர் பணியாற்றி உள்ளனர். அதனால் 'பீஸ்ட்' படத்துடன் ஒப்பிடுவது சரியல்ல. "இரு படங்களுமே வசூல், விமர்சன ரீதியில் எதை இலக்காகக் கொண்டு தயாரிக்கப்பட்டனவோ, அதை எட்டும் வகையில் வரவேற்பு பெற்றுள்ளன என்பதுதான் சரி. எனவே இதில் இரு தரப்புக்குமே வெற்றி என்றுதான் சொல்ல வேண்டும். அதுதான் சரி," என்கிறார்கள் திரையுலக விவரப் புள்ளிகள்.