கமல்ஹாசன் நடித்துள்ள 'விக்ரம்' படம் இதுவரை இல்லாத அளவுக்கு வெளியீட்டிற்கு முன்பே பெருந்தொகைக்கு வியாபாரமாகியுள்ளது.
லோகேஷ் கனகராஜ் இயக்கத்தில் உருவாகி உள்ள இந்தப் படத்தில் கமல், விஜய் சேதுபதி, பகத் பாஃசில், காளிதாஸ் ஜெயராம் உள்ளிட்ட பலர் முக்கிய கதாபாத்திரங்களில் நடித்துள்ளனர்.
எதிர்வரும் ஜூன் 23ஆம் தேதி உலகெங்கும் திரைகாண உள்ள இப்படத்தின் வெளியீட்டு உரிமை ரூ.172 கோடிக்கு விற்கப்பட்டுள்ளது. நடிகரும் எம்எல்ஏவுமான உதயநிதி ஸ்டாலினின் ரெட் ஜெயன்ட் நிறுவனம் இப்படத்தை வெளியிடுகிறது.
ஸ்டார் நெட்வொர்க் நிறுவனம் அனைத்து மொழிகளுக்கான தொலைக்காட்சி, மின்னிலக்க உரிமையை ரூ.93 கோடி ரூபாய்க்கு கைப்பற்றியுள்ளது.
ஏற்கெனவே பாடல் உரிமம் ரூ.4.25 கோடிக்கும் வெளிநாட்டு உரிமம் ரூ.25 கோடிக்கும் விற்பனையாகியுள்ளது.
இப்படி அனைத்து வகையிலும் சேர்த்து இதுவரை ரூ.172 கோடியை ஈட்டியுள்ளது 'விக்ரம்' திரைப்படம்.
இதற்கிடையே 'விக்ரம்' படக்குழுவினர் சென்னையில் செய்தியாளர்களைச் சந்தித்துப் பேசினர். அப்போது 'விக்ரம்' படத்தின் மூன்றாவது பாகம் உருவானால், அதையும் லோகேஷ் கனகராஜ்தான் இயக்குவார் என்றார் கமல்.
"நான்கு ஆண்டுகளுக்குப் பிறகு நான் நடித்துள்ள படம் திரைகாண்கிறது. நான்கு ஆண்டுகளாக என் ரசிகர்களை காக்க வைத்ததற்கு மன்னிப்பு கேட்டுக் கொள்கிறேன். லோகேஷ் கனகராஜுக்கு நன்றி கூறினால் அவர் வெளிமனிதராகிவிடுவார்.
"நல்ல படம் எடுத்துள்ளோம். அது வெற்றி பெறும் என நம்புகிறோம். ரசிகர்களுக்கு நல்ல விருந்து காத்திருக்கிறது. என்னிடம் பெரிய அளவில் பணம் இல்லை. என்னுடைய வருமானத்தை மக்களுக்காகப் பயன்படுத்துவேன்.
"மறைந்த முதல்வர் கருணாநிதி பிறந்தநாளில் இந்தப் படம் வெளியாவது எதிர்பாராமல் நடந்தது. என் திறமையை வளர்த்துக் கொள்ள முன்னோடியாக இருந்ததில் கருணாநிதியும் ஒருவர்.
"தற்செயலாக ஒருவிஷயம் நடந்துள்ளது என்றபோதிலும் அதில் எனக்கு மகிழ்ச்சிதான்," என்றார் கமல்ஹாசன்.
'இந்தியன் 2' படம் குறித்து எழுப்பப்பட்ட கேள்விக்குப் பதில் அளித்த அவர், தாம் நடித்த படங்களின் பட்டியலில் அதுவும் இடம்பெறும் என்றார்.
'விக்ரம்' படத்தில் 'பத்தல பத்தல' பாடலில் ஒன்றியம் என்ற வார்த்தை இடம்பெற்றது விவாதப் பொருளாகி உள்ள நிலையில், அதுகுறித்தும் விளக்கம் அளித்தார் கமல்.
"தமிழில் ஒரு வார்த்தைக்குப் பல அர்த்தங்கள் சொல்லலாம். ஒன்றியம் என்ற வார்த்தைக்கும் அப்படிப் பல அர்த்தங்கள் உள்ளன. செய்தியாளர்கள் இணைந்துள்ள இந்தக் கூட்டம்கூட ஒன்றியம்தான். இயக்குநர்கள், தயாரிப்பாளர்கள் வைத்துள்ள சங்கம்கூட ஒன்றியம்தான். படம் வெளிவந்தபிறகு, இதற்கான அர்த்தங்கள் தெரியும்," என்றார் கமல்.
, :