மாணவர் முரசு
இ-பேப்பர்
'ரெஜினா' மலையாளப் படத்தின் மூலம் ரசிகர்களின் கவனத்தை ஈர்த்துள்ளார் சுனைனா. அண்மையில் வெளியிடப்பட்ட இப்படத்தின் சுவரொட்டி ரசிகர்களை திகிலடைய வைத்துள்ளது.
தமிழில் விஷாலுடன் 'லத்தி' படத்தில் நடித்துக் கொண்டிருக்கிறார். மேலும், 'தொடுவானம்' என்ற படத்தில் நாற்பது குழந்தைகளுடன் முக்கிய கதாபாத்திரத்தில் நடித்து முடித்திருப்பவர், நடிகர் நானியின் சகோதரி இயக்கியுள்ள 'மீட் க்யூட்' என்ற படத்தின் வெளியீட்டுக்காக காத்திருக்கிறார்.
"இந்த ஆண்டு தமது நடிப்பில் இரண்டு இணையத் தொடர்களை எதிர்பார்க்கலாம் என்று சொல்லும் சுனைனா, அடுத்த ஆண்டு தொடக்கம் வரை புதிதாக யாருக்கும் கால்ஷீட் ஒதுக்க முடியாத நிலையில் உள்ளாராம்.
"இணையத் தொடர்கள் என்றால் தகுதி குறைவான விஷயமாக சிலர் நினைக்கிறார்கள். திரைப்படங்களுக்கும் இந்தத் தொடர்களுக்கும் இடையே பெரிய வித்தியாசமில்லை. படம் வெளியாகும் தளங்கள்தான் வெவ்வேறானவை.
"மற்றபடி நமது படம் அனைத்துத் தரப்பினரையும் சென்றடைவதை எண்ணி மகிழலாம்," என்று சொல்லும் சுனைனா கடந்த 2018ஆம் ஆண்டிலேயே இணையத்தொடர்களில் நடிக்கத் தொடங்கிவிட்டார்.
நண்பர்களும் நலன் விரும்பிகளும் ஏன் தொடர்களில் நடிக்கி றீர்கள் என்று கேட்கத் தொடங்கி விட்டார்களாம். தொலைக்காட்சி, இணையத்தொடர்கள் ஆகிய இரண்டும் வெவ்வேறானவை என்பதை அனைவரும் விரைவில் புரிந்துகொள்வர் என்கிறார்.
`சில்லுக்கருப்பட்டி' படம் வெளியான பிறகுதான் தமிழில் தமக்கு மீண்டும் எதிர்பார்த்த வாய்ப்புகள் அமைவதாகச் சொல்பவர், மூன்று குழந்தைகளுக்குத் தாயாக நடித்தால் சந்தை மதிப்பு போய்விடும் என்று பலரும் எச்சரித்ததாகக் கூறுகிறார்.
"இப்படிப்பட்ட கதைகளில் நடிக்க வேண்டாம். ஒரு குழந்தைக்கு தாயாக நடித்தாலே திரையுலகம் ஒதுக்கிவிடும் என்றும் கூறினர். நான் என் முடிவை மாற்றிக்கொள்வதாக இல்லை. வெற்றியோ தோல்வியோ துணிந்து நடித்தேன்.
"என் முடிவு தோற்கவில்லை, வெற்றி கிடைத்தது. மக்கள் என்னுடைய கதாபாத்திரத்தை வெகுவாக ரசித்தனர்.
"நான் பேசிய வசனங்களுக்கு திரையரங்கில் பலர் எழுந்து நின்று கைதட்டினர். விசில் சத்தம் அதிகரித்தபோது, சுற்றி நடப்பவற்றை என்னாலேயே நம்ப முடியவில்லை," என்று சொல்லும் சுனைனா, 'லத்தி' படத்தில் விஷாலின் மனைவியாக நடித்துள்ளார்.
ஒவ்வொரு நாளும் படப்பிடிப்பு கலகலப்பாகவும் உற்சாகமாகவும் நடந்ததாகக் குறிப்பிடுபவர், இந்தப் படத்தில் தமது கதாபாத்திரத்தில் நடிப்பது சவாலாக இருந்ததாகச் சொல்கிறார்.
"நான் அதிகம் பேசமாட்டேன். ஆனால் 'லத்தி' படத்தில் நான் ஓயாமல் பேசிக்கொண்டிருக்கும் நடுத்தரக் குடும்பத்தைச் சேர்ந்த பெண்ணாக நடித்தேன்.
"குறைவான வசனங்கள்தான், பல காட்சிகளில் முக பாகவங்கள் மூலமாகவே ரசிகர்களுக்கு சிலவற்றைப் புரிய வைப்பது சவாலாக இருந்தது," என்கிறார் சுனைனா.