மாணவர் முரசு
இ-பேப்பர்
அபர்ணா பாலமுரளி நடித்து அண்மையில் வெளியாகி இருக்கும் படம் 'வீட்ல விசேஷங்க'. இந்தப் படத்தில் அபர்ணாவின் உருவத்தைப் பார்த்து பலர் வலைத்
தளங்களில் அவரைக் கேலி செய்து பதிவிட்டு வருகிறார்கள். அதனால் தான் மன உளைச்சலுக்கு ஆளானதாக காணொளி ஒன்றை வெளியிட்டு இருக்கிறார் அபர்ணா பாலமுரளி.
மலையாளத்தில் பல படங்களில் நடித்திருந்த அபர்ணா பாலமுரளி முதன் முதலில் தமிழில் 'எட்டு தோட்டாக்கள்' படத்தில் நடித்திருந்தார். அதனைத்தொடர்ந்து 'சர்வம் தாள மையம்' படத்திலும் நடித்தார். ஆனால் இந்தப் படங்கள் அவருக்கு நல்ல ஓர் அடையாளத்தைப் பெற்றுத் தரவில்லை.
அதன்பிறகு மலையாளத்தில் நடிக்க வாய்ப்புகள் அவருக்கு அதிகரித்து வந்ததால் தமிழில் நடிக்காமல் இருந்தார்.
இந்நிலையில் இவர் சூர்யாவுடன் இணைந்து நடித்த 'சூரரைப்போற்று' திரைப்படம் வெற்றிப்படமானது. அந்தப் படத்தில் இவரது கதாபாத்திரம் பெருமளவு பேசப்பட்டது. அந்தப் படத்தில் இருந்து இவர் தமிழில் நல்ல படங்களுக்காக காத்திருந்தார்.
இந்நிலையில் இவர் நடித்து அண்மையில் வெளியான 'வீட்ல விசேஷம்' படத்தில் ஆர்.ஜே.பாலாஜிக்கு ஜோடியாக நடித்திருந்தார். இந்தப் படத்தில் முன்பு பார்த்ததைவிட இன்னும் உடல் எடை கூடி இருந்தது தெரிந்தது.
அந்தப் படத்தைப் பார்த்தபிறகு வலைத்தளங்களில், "பார்ப்பதற்கு ஆன்ட்டிபோல் அசிங்கமாக இருக்கிறீர்கள்," என்று பலர் பதிவிட்டிருந்தது தன்னை மிகவும் பாதித்ததாகவும் அதனால் தான் மன உளைச்சலில் இருப்பதாகவும் காணொளி ஒன்றை வெளியிட்டு இருக்கிறார்.
அதில், "ஒருவருக்கொருவர் முகம் பார்த்துக்கொள்ளாமல் இணையங்களில் இணைந்திருக்கும் இந்த காலகட்டத்தில் மனதைப் புண்படுத்தும்படியான பதிவுகள் வலைத்தளங்களில் பகிரப்பட்டு வருவது தன்னை மிகவும் காயப்படுத்துகிறது.
"இந்த மாதிரியான பகிர்வுகள் எந்த அளவிற்கு பாதிப்பை எங்களுக்கு ஏற்படுத்தும் என்பதை உணராமலேயே அவர்கள் இதனைச் செய்து வருகின்றனர்.
"உருவத்தைப் பார்க்காதீர்கள். அவர்களிடம் இருக்கும் திறமையைப் பாருங்கள். நன்றாகப் பாடத் தெரியும். இசை அமைக்கத் தெரியும். அத்துடன் நடிக்கவும் நடிக்கிறேன். இவற்றையெல்லாம் பார்க்காமல் உருவத்தைப் பற்றியே கேலி செய்கிறீர்கள்.
"உடல் எடை அதிகமாகிவிட்டால் அதைக் குறைப்பதற்கு அதைப்பற்றி நாம் யோசிப்பதற்குகூட இடம் கொடுக்காமல், நம்மைக் குறி வைத்து நம்மைப் பற்றியே செய்திகள் உலா வருகின்றன. அது மிகவும் மனவேதனையைத் தருகிறது," என்று வருத்தத்துடன் காணொளி ஒன்றை வெளியிட்டு இருக்கிறார் அபர்ணா பாலமுரளி.
நடிகை அபர்ணா பாலமுரளி நடித்திருக்கும் 'வீட்ல விசேஷம்' திரைப்படம் விமர்சன ரீதியாக நல்ல வரவேற்பைப் பெற்று வருகிறது. இப்படத்தில் சத்யராஜ், ஊர்வசி, ஷிவானி நாராயணன் மற்றும் பலரும் நடித்துள்ளனர் என்பது குறிப்பிடத்தக்கது.
தற்போது அபர்ணா பாலமுரளி 'நித்தம் ஒரு வானம்' படத்திலும் நடிகர் கார்த்தியுடன் ஒரு படத்திலும் நடித்து வருகிறார்.
