மாணவர் முரசு
இ-பேப்பர்
'கார்கி' படம் குறித்து பல்வேறு தரப்பினரும் பேசுகிறார்கள். படத்துக்கு விமர்சன, வசூல் ரீதியில் நல்ல வரவேற்பு கிடைத்துள்ளது.
"ஒரு திரைப்படத்தை உருவாக்கும்போதே அதன் வெற்றியை உணரமுடியும் என்று சொல்வதுண்டு. அதுபோன்ற உணர்வை எங்களில் பலர் உணர்ந்தோம்," என்கிறார் படத்தின் இயக்குநர் கௌதம் ராமச்சந்தி்ரன்.
நடுத்தர வர்க்கத்தைச் சேர்ந்த ஓர் ஆசிரியை அமைதியாக வாழ்ந்து கொண்டிருக்கிறார். திடீரென அவரது தந்தைக்கு ஒரு பிரச்சினை ஏற்படுகிறது. அதனால் ஆசிரியையும் பாதிக்கப்படுகிறார். இதையடுத்து நடக்கும் போராட்டத்தில் கார்கி என்ற அந்தப் பெண் வெற்றி பெறுகிறாளா என்பதுதான் இப்படத்தின் கதை.
ஒவ்வொரு பெண்ணுக்குள்ளும் குறிப்பாக ஒவ்வொரு மகளுக்குள்ளும் இந்தப் படம் துணிச்சலை விதைக்கும் அல்லது தட்டியெழுப்பும் என்கிறார் இயக்குநர்.
கௌதம் ராமச்சந்திரன் இயக்கத்தில், கோவிந்த் வசந்தா இசையமைத்துள்ள இந்தப் படம் தமிழ், கன்னடம், தெலுங்கு ஆகிய மொழிகளில் தயாராகி உள்ளது. ரவிச்சந்திரன், ஐஸ்வர்யா லட்சுமி, தாமஸ் ஜார்ஜ் ஆகியோர் தயாரித்துள்ள இப்படத்தை சூர்யா, ஜோதிகாவின் 2டி நிறுவனம் வெளியிடுகிறது.
"இயக்குநர் கௌதம் ராமச்சந்திரன் கதை சொல்லும்போதே அவ்வளவு சுவாரசியமாக இருந்தது. எனக்கு இதில் திறமையை வெளிப்படுத்த நிறைய வாய்ப்பு இருப்பதைப் புரியவைத்தார்.
"வழக்கறிஞராக காளி வெங்கட் நடித்துள்ளார். கிட்டத்தட்ட அவர்தான் இந்தப் படத்தின் நாயகன் எனலாம். அவ்வளவு அருமையாக நடித்துள்ளார். என் தோழியாக நடித்திருப்பதுடன், தயாரிப்பாளராகவும் ஐஸ்வர்யா லட்சுமி ஆதரவு அளித்துள்ளார்.
"நல்ல நடிகை எனப் பெயரெடுக்க விரும்புகிறேன். அதனால்தான் இப்படியொரு கதைக்களம், கதாபாத்திரத்தை தேர்வு செய்துள்ளேன்," என்கிறார் சாய் பல்லவி.
சில படங்களின் விளம்பர நிகழ்வுகளில் இவர் பங்கேற்றதில்லை. ஆனால் 'கார்கி' படத்தை விளம்பரப்படுத்த கிடைத்த சிறு வாய்ப்பையும் இவர் இழக்கவில்லை.
"காரணம், நான் நடித்த சில படங்களுக்கான விளம்பர நிகழ்ச்சிகளில் நான் இல்லையென்றாலும், அவை தன்னால் நடந்தேறும். சம்பந்தப்பட்ட படங்களின் நாயகன் என்னைவிட பளிச்சென்று காணப்படுவார். ஆனால், 'கார்கி'யைப் பற்றி பேசவேண்டிய அல்லது படத்தை மக்களிடம் கொண்டு போய் சேர்க்கக் கூடிய ஒரே ஆள் நான்தான். எனவே நேரடியாகக் களமிறங்கி வேலை செய்தாக வேண்டும். இதில் வண்ணமயமான பாடல்களோ, அடிதடி சண்டைக் காட்சிகளோ இல்லை. நல்ல கதை. அதனால்தான் நானே களமிறங்கி னேன்," என்கிறார் சாய் பல்லவி.