லோகேஷ் கனகராஜ் இயக்கத்தில் விஜய் நடிக்கும் ‘லியோ’ திரைப்படம், ஹாலிவுட் படப் பாணியில் உருவாக இருப்பதாகக் கூறப்படுகிறது.
இப்படத்தின் அறிமுக காணொளி நேற்று முன்தினம் மாலை வெளியானது.
இதையடுத்து, விஜய் ரசிகர்கள் அதை உடனுக்குடன் பார்த்து ரசித்து உற்சாகம் அடைந்தனர்.
ஒரே நாளில் சுமார் 20 மில்லியன் பேர் அந்தக் காணொளியைப் பார்த்ததாக படக்குழுத் தரப்பில் கூறப்படுகிறது. இது மிகப்பெரிய சாதனை என்றும் விஜய் ரசிகர்கள் கூறி வருகின்றனர்.
‘லியோ’ படத்தில் சண்டைக் காட்சிகள் அதிகம் இருக்கும் என்றும் கூறப்படுகிறது.
‘மாஸ்டர்’ படத்தை அடுத்து, சற்று வயதான கதாபாத்திரங்களில் நடித்து வருகிறார் விஜய். ‘லியோ’ படத்திலும் அவர் அதே போன்றுதான் தோன்றுகிறார் என்று தகவல் கசிந்துள்ளது.
காஷ்மீரில் படப்பிடிப்பு தொடங்கி உள்ள நிலையில், மிகுந்த உற்சாகத்துடன் நடித்து வருகிறாராம் விஜய். படப்பிடிப்பில் அவர் உடன் நடிப்பவர்களைத் தனது கைப்பேசியில் படம்பிடித்து அவர்களது நடிப்பையும் பாராட்டுவதாக தகவல் வெளியாகி உள்ளது.
இதற்கிடையே, லோகேஷ் இயக்கியிருந்த ‘கைதி, விக்ரம்’ ஆகிய படங்களின் கதாபாத்திரங்கள் ‘லியோ’ படத்திலும் இடம்பெறுமா என்ற எதிர்பார்ப்பு ரசிகர்கள் மத்தியில் அதிகரித்து வருகிறது.
இது குறித்து தற்போது தகவல் ஏதும் வெளியாகாது என்றும் படம் வெளியாவதற்கு முன்புதான் விவரம் அறிவிக்கப்படும் என்றும் தெரிகிறது.