மாணவர் முரசு
இ-பேப்பர்
சுனைனா நாயகியாக நடித்துள்ள 'ரெஜினா' படம் குறித்த எதிர்பார்ப்பு ரசிகர்கள் மத்தியில் அதிகரித்துள்ளது.
அதற்கேற்ப அப்படக்குழுவினரும் பல்வேறு விளம்பர நிகழ்வுகளுக்கு வரிசையாக ஏற்பாடு செய்து வருகின்றனர்.
இந்நிலையில், கோவையில் நடைபெற்ற 'ரெஜினா' படத்துக்கான விளம்பர நிகழ்வில் மேடையேறி பாட்டுப் பாடியும் நடனமாடியும் ரசிகர்களை மகிழ்வித்தார் சுனைனா.
மேலும் ரசிகர்கள் எழுப்பிய சில கேள்விகளுக்கு தயக்கமின்றி பதிலும் அளித்தார்.
"இந்தப் படத்துக்காக இரண்டு மாதங்கள் கால்ஷீட் ஒதுக்கி மிகுந்த கவனம் செலுத்தி நடித்தேன். காரணம், மிக வித்தியாசமான கதாபாத்திரம் அமைந்துள்ளது.
"நீண்ட இடைவெளிக்குப் பிறகு எனக்கு மனநிறைவு அளிக்கும் வகையில் ஒரு கதாபாத்திரம் அமைந்ததும் எந்தவிதமான சிக்கலும் இன்றி அதில் நடித்து முடித்ததும் மகிழ்ச்சி அளிக்கிறது.
"ஒவ்வொரு படமும் வெவ்வேறு கதைக்களங்களுடன் உருவாகிறது. அவற்றுள் நமக்கான கதையைத் தேர்வு செய்வதில்தான் வெற்றி அடங்கி உள்ளது. அந்த வகையில் 'ரெஜினா' படத்தின் கதை எனக்கு மிகவும் பிடித்திருந்தது," என்றார் சுனைனா.
தமக்கு மேடை நாடகங்களில் நடித்த அனுபவம் உண்டு என்று குறிப்பிட்டவர், அதன் மூலம் கிடைத்த அனுபவங்களால் தனது திறமையைக் கூர்தீட்டிக்கொள்ள முடிந்தது என்றார்.
"மேடை நாடக அனுபவம் இருந்தாலும் எத்தகைய கதாபாத்திரத்திலும் நடிக்க இயலும். அதற்கான துணிச்சல் கிடைக்கும். அந்த வகையில் நான் எந்தவிதமான கதாபாத்திரத்தையும் ஏற்று நடிக்கத் தயார்.
"கடந்த 15 ஆண்டுகளாக நான் அதே அழகுடன் இருப்பதாகப் பலரும் பாராட்டுகிறார்கள். அதிலும் திரையில் மிகுந்த அழகுடன் காட்சியளிப்பதாக ரசிகர்கள் சொல்கிறார்கள். அதன் பின்னணியில் பெரிய ரகசியம் ஏதும் இல்லை. கதைக்குத் தகுந்தாற்போல் என்னை மாற்றிக் கொள்கிறேன். அதுதான் அழகின் ரகசியம்.
"முன்னேற்றம் காண வேண்டுமானால் அதிகம் உழைக்க வேண்டும். உழைப்பதற்குத் தயங்கினால் எந்தத் துறையாக இருந்தாலும் முன்னேற்றம் என்பது இருக்காது.
"எனது முன்னேற்றத்திற்கு எனது குடும்பமும் ஒரு முக்கியக் காரணம். குடும்பத்தாரின் ஆதரவு இல்லாமல் இன்றுள்ள இடத்தை என்னால் எட்டிப்பிடித்திருக்க இயலாது.
'ரெஜினா' ஒரு வித்தியாசமான பழி வாங்கும் கதையை வைத்து உருவாகி உள்ளது என்றும் இதுபோன்ற கதைகளை நேர்த்தியாகப் படமாக்கினால் ரசிகர்களை நிச்சயம் கவரும் என்றும் குறிப்பிட்டார்.
"சாதாரண நிலையில் உள்ள ஒரு பெண் எப்படி அசாதாரணமான பெண்ணாக மாறுகிறாள் என்பதுதான் 'ரெஜினா' படத்தின் கதை.
"வித்தியாசமான வேடங்களில் நடிக்க வேண்டும் என்பது எனது விருப்பம். சினிமாவில் அதுவே என் லட்சியம் என்றும் சொல்லலாம்.
"என் திரைப்பயணத்தில் அந்த லட்சியம் நிறைவேறுவதற்கான சூழல் காணப்படுகிறது," என்றார் சுனைனா.
பதினைந்து வயதில் திரையுலகில் அறிமுகமானதாகவும் ரசிகர்களின் ஆதரவு இன்று வரை நீடிப்பது நெகிழ வைப்பதாகவும் கூறினார்.
இதையடுத்து தனது நடிப்பில் பல ஆண்டுகளுக்கு முன்பு வெளிவந்த 'மாசிலாமணி' திரைப்படத்தின் 'ஓடி ஓடி விளையாடு' பாட்டுக்கு நடனமாடிய அவர், 'காதலில் விழுந்தேன்' திரைப்படத்தின் 'உனக்கென நான் எனக்கென நீ' என்ற பாடலையும் பாடி அசத்தினர்.
கடந்த 2022ஆம் ஆண்டு இறுதியில் வெளியான 'லத்தி' படத்திற்குப் பிறகு நடிகை சுனைனா நடிப்பில் வெளியாக உள்ள படம் 'ரெஜினா'.
தமிழ், தெலுங்கு, மலையாளம், இந்தி ஆகிய நான்கு மொழிகளில் இப்படம் உருவாகி இருப்பது தமக்கு மகிழ்ச்சி அளித்துள்ளதாக சுனைனா சொல்கிறார்.
, :
தமிழகத்
சுனைனா