மாணவர் முரசு
இ-பேப்பர்
‘ரெஜினா’ படத்தில் நடித்து முடித்த பின்னர் எத்தகைய கதாபாத்திரங்களில் நடிக்க வேண்டும் என்பது தொடர்பாக மனதில் தெளிவு ஏற்பட்டுள்ளது என்கிறார் சுனைனா.
15 ஆண்டுகளைக் கடந்த பிறகும் தமது திரையுலகப் பயணத்தில் உற்சாகம் நீடிப்பதாக அண்மைய பேட்டியில் அவர் குறிப்பிட்டுள்ளார்.
திரையில் அவ்வப்போது புதிய அவதாரங்கள் எடுப்பது நடிகர், நடிகையரின் வழக்கமான வேலைதான் என்றாலும் ஒரே மாதிரியான கதாபாத்திரத்தில் நடிக்கக்கூடாது என்று கூறியுள்ள அவர், அதிரடி கதாபாத்திரத்தில் நடித்தது தமக்குப் புது அனுபவம் என்கிறார்.
“வித்தியாசமான கதாபாத்திரங்களில் நடிக்க வேண்டும் என்பதுதான் எனது விருப்பம். திரையுலகில் அறிமுகமான புதிதில் எனக்கு கிடைத்த கதாபாத்திரங்கள் பல ஒரே மாதிரியாக இருந்திருக்கலாம். என்னை ஒரே தளத்தில் மட்டுமே பார்த்து ரசிக்க செய்திருக்கலாம். ஆனால் இப்போது அப்படி அல்ல. எல்லாம் மாறிவிட்டது.
“நிறைய வித்தியாசமான சிந்தனைகளுடன்கூடிய கதைகளை படமாக்குகிறார்கள். அதனால் திரையுலகில் பணியாற்றுவது முன்னைவிட உற்சாகமாக உள்ளது,” என்று சொல்லும் சுனைனாவுக்கு ‘ரெஜினா’ படத்தில் அதிரடி பாத்திரத்தில் நடித்ததுதான் மறக்க முடியாத அனுபவம் என்கிறார்.
அந்தப் படத்துக்கான சண்டைக் காட்சிகளில் நடித்தபோது, அவை எப்படி படமாக்கப்படும் என்பதை இயக்குநர் விவரிக்கவில்லையாம்.
“அது சவாலான அனுபவமாக இருந்தது. சண்டைப் பயிற்சியாளர் சில அசைவுகளைக் கற்றுக்கொடுத்தார். ஆனால், காட்சி படமாக்கப்பட்டபோது சில விஷயங்கள் திடீரென நிகழ்ந்தன.
“இதனால் தொடக்கத்தில் அதிர்ச்சி அடைந்தேன். பிறகு இயக்குநரிடம் இது குறித்து கேட்டபோது, காட்சிகள் இயல்பாக அமைய வேண்டும், எனது முக பாவங்களும் இயல்பாக வெளிப்பட வேண்டும் என்பதற்காக சில விவரங்களை மறைத்ததாக விளக்கம் அளித்தார்.
தொடர்புடைய செய்திகள்
“படத்தை திரையில் பார்த்தபோது அவர் கூறியது முற்றிலும் உண்மை என்பதை உணர்ந்தேன்,” என்று சொல்லும் சுனைனா, தமிழில் மிக சரளமாகப் பேசுகிறார்.
மராட்டியப் பெண் என்றாலும் தமிழ் மொழியைத் தான் மிகவும் நேசிப்பதாக பேட்டியில் குறிப்பிட்டுள்ளார். பொதுவாக பல மொழிகளைக் கற்க வேண்டும் என்ற ஆர்வம் இவரிடம் அதிகமாக உள்ளது.
“மகாராஷ்டிர மாநிலம்தான் எனது சொந்த ஊர். வீட்டில் இந்தியில்தான் பேசிக்கொள்வோம். மொழிகள் மீதான ஆர்வம் காரணமாக தமிழையும் கற்றுக்கொண்டேன்.
“இப்போது நான் நடிக்கும் படங்களில் வேறு யாரும் இரவல் குரல் கொடுப்பதில்லை. எனக்கான வசனங்களுக்கு நானே பின்னணிக் குரல் (டப்பிங்) கொடுக்கிறேன்.
“இதன் மூலம் ரசிகர்களுடன் மேலும் நெருங்க முடிவதாக நம்புகிறேன். தமிழில் மேலும் சில நல்ல வாய்ப்புகள் தேடி வந்துள்ளன,” என்கிறார் சுனைனா.
இவரது ரகசியம் என்னவென்று ரசிகர்கள் தொடர்ந்து கேள்வி எழுப்புகிறார்களாம். தமக்கு இருப்பது பெற்றோர் தந்த இயற்கையான அழகு என்கிறார்.
“இதுதான் உண்மை. அனைத்தையும்விட ஒருவர் உள்ளத்திலும் நிஜத்திலும் மகிழ்ச்சியாக இருக்கவேண்டும். அந்த உண்மையான மகிழ்ச்சிதான் அழகைத் தேடித்தரும். இதை மனதிற்கொண்டுதான் நான் செயல்படுகிறேன். ஒருவேளை எப்போதுமே மகிழ்ச்சியாக இருப்பதால் எனக்கு கூடுதல் அழகு இருப்பதாக வைத்துக் கொள்ளலாம்,” என்கிறார் சுனைனா.