மாணவர் முரசு
இ-பேப்பர்
சிங்கப்பூரின் வலுவான சமய நல்லிணக்க சமூகத்தையும் நாட்டின் 59ஆவது பிறந்தநாளையும் கொண்டாட சமய நல்லிணக்க அமைப்பு (ஐஆர்ஓ) வியாழக்கிழமை (ஆகஸ்ட் 22) தேசிய தினப் பற்றுறுதி நிகழ்ச்சிக்கு ஏற்பாடு செய்திருந்தது.
தனது 75ஆம் ஆண்டு நிறைவை இவ்வாண்டு கொண்டாடும் ஐஆர்ஓவின் இந்நிகழ்ச்சியில் மூத்த அமைச்சர் லீ சியன் லூங், ஓய்வுபெற்ற கௌரவ மூத்த அமைச்சரும் ஐஆர்ஓவின் புரவலருமான கோ சோக் டோங், வர்த்தக, தொழில் மற்றும் கலாசார, சமூக, இளையர்துறை துணை அமைச்சர் ஆல்வின் டான் ஆகியோர் கலந்துகொண்டு சிறப்பித்தனர்.
இந்து, யூத, ஸொராஸ்ட்ரிய, பௌத்த, தாவோயிச, சமணா, கிறிஸ்தவ, இஸ்லாமிய, சீக்கிய, பகாய் சமயக் குழுக்களைச் சேர்ந்த 200க்கும் மேற்பட்டோர் நிகழ்ச்சிக்கு வருகையளித்தனர்.
நிகழ்ச்சியின் சிறப்பம்சமாக 10 சமயக் குழுக்களின் சமயத் தலைவர்களும் மேடையில் பிரார்த்தனை செய்தனர். நிகழ்ச்சிக்கு வந்த அனைவரும் தேசிய கீதத்தைச் சேர்ந்து பாடி, உறுதிமொழியையும் சமய நல்லிணக்க உறுதிமொழியையும் எடுத்துக்கொண்டனர்.
“நமது பலதரப்பட்ட சமயங்களின் இழைகள் ஒரு சிங்கப்பூர் என்ற வளமான கம்பளச் சித்திரத்தை நெய்வதில் முக்கியப் பங்கு வகிக்கின்றன,” என்று நிகழ்ச்சியில் வரவேற்புரையாற்றிய ஐஆர்ஓ தலைவர் குர்மீத் சிங் சொன்னார்.
கோயில்கள், தேவாலயங்கள், ஜெபக்கூடங்கள், குருத்வாராக்கள், பள்ளிவாசல்கள் என்று பல்வேறு வழிபாட்டுத் தலங்கள் சிங்கப்பூரில் அருகருகே அமைந்திருப்பதைச் சுட்டிய அவர், சமய மோதல்கள் நிறைந்த உலகில் சிங்கப்பூரின் தனித்துவத்தையும் சமய நல்லிணக்கத்தையும் கடைப்பிடிப்பதில் நாட்டின் கடப்பாட்டையும் இது வெளிக்காட்டுவதாகச் சொன்னார்.
1949ல் ஐந்து சமயக் குழுக்களின் உறுப்பினர்களுடன் ஆரம்பிக்கப்பட்ட ஐஆர்ஓவில் தற்போது 10 சமயக் குழு உறுப்பினர்கள் இருப்பதில் பெருமிதம் கொள்கிறார் ஐஆர்ஓ துணைத் தலைவரும் சிங்கப்பூர் பகாய்களின் ஆன்மிகக் கூட்டத் தலைவருமான கே.இளங்கோ, 58.
“இதுபோன்ற நிகழ்ச்சிகளை நடத்துவதன்வழி அனைவருக்கும் சிங்கப்பூரில் இருக்கும் பல்வேறு சமயங்களைப் பற்றி, குறிப்பாக அவ்வளவாக அறியப்படாத சமயங்களைப் பற்றி விழிப்புணர்வு ஏற்படுத்த முடியும் என்று நம்புகிறோம். அத்துடன், இந்தச் சமயங்களின் உறுப்பினர்களுக்குப் பல வாய்ப்புகளை வழங்க ஐஆர்ஓ தொடர்ந்து ஒரு தளமாகத் திகழும்,” என்றும் சொன்னார் அவர்.
தொடர்புடைய செய்திகள்
நிகழ்ச்சியின் இறுதியில் ஐஆர்ஓ முன்னாள் தலைவர்களால் அறிமுகப்படுத்தப்பட்ட கூட்டு வழிபாட்டில் அனைவரும் ஈடுபட்டனர்.