தமிழ்மொழியின் இளமையைப் பறைசாற்றிய நிகழ்ச்சி

தமிழ்மொழி விழாவின் ஒரு பகுதியாக ஜமால் முஹம்மது கல்லூரி முன்னாள் மாணவர்கள் சங்கத்தின் சிங்கப்பூர்க் கிளை ‘தமிழ் எங்கள் இளமைக்குப் பால்!’ என்ற தலைப்பில் இலக்கியச் சொற்பொழிவு நிகழ்ச்சிக்கு ஏற்பாடு செய்திருந்தது.

வளர்தமிழ் இயக்கத்தின் ஆதரவுடன் ஞாயிற்றுக்கிழமை (ஏப்ரல் 20) மாலை 6 மணிக்கு உமறுப்புலவர் தமிழ்மொழி நிலையத்தில் இந்த நிகழ்ச்சி நடைபெற்றது.

சமூகத் தலைவர்கள், தமிழ் ஆர்வலர்கள், பெற்றோர், மாணவர்கள், சங்கத்தின் உறுப்பினர்கள் உட்பட ஏறத்தாழ 300 பேர் இந்நிகழ்ச்சியில் பங்கேற்றனர்.

இவ்வாண்டு ‘இளமை’ என்ற கருப்பொருளை மையமாகக் கொண்டு தாய்மொழியில் இளையர்களிடம் நாட்டத்தை உருவாக்கும் வகையில் இந்த நிகழ்ச்சி வடிவமைக்கப்பட்டிருந்தது.

“இளமை என்பது மகிழ்ச்சி, எதிர்காலம், வசந்தம், குதூகலம் எனக் கூறக்கூடிய பருவம். அந்த இளமை, நமது தாய்மொழியான தமிழிலும் இருக்கிறது என்பதை எடுத்துச் சொல்லும் வகையில் நாங்கள் இந்த நிகழ்ச்சியைத் திட்டமிட்டோம்.

“அதேசமயம் இளையர்களை ஈர்த்து, தமிழ்மொழியின் பெருமையை உணரச் செய்து, இதுபோன்ற விழாக்களில் கலந்துகொள்ள ஊக்குவிக்‌க வேண்டும் என்று நினைத்தோம்,” என்றார் சங்கத்தின் தலைவர் முனைவர் மு. அ. காதர்.

இந்த ஆண்டிறுதியில் சங்கத்தின் 15ஆம் ஆண்டு நிறைவு விழா கொண்டாடப்படும் என்று நிகழ்ச்சியில் அறிவிக்கப்பட்டது.

சிங்கப்பூர் நாடாளுமன்ற முன்னாள் நியமன உறுப்பினர் டாக்டர் சையது ஹாருன் அல்ஹாப்சி இந்நிகழ்ச்சியில் சிறப்பு விருந்தினராகக் கலந்துகொண்டார்.

தொடர்புடைய செய்திகள்

நோன்புப் பெருநாளுக்குச் சக்கர நாற்காலி நன்கொடை

தாய்மொழியின் அவசியத்தை வலியுறுத்திப் பேசிய அவர், கடந்த 15 ஆண்டுகளில் இதுவரை 144 நிகழ்ச்சிகள் நடத்தியுள்ள ஜமால் முஹம்மது கல்லூரி முன்னாள் மாணவர்கள் சங்கம் (சிங்கப்பூர்க் கிளை) ஆற்றிவரும் கல்வி சார்ந்த சமூக நலப் பணிகளைப் பாராட்டினார்.

நிகழ்ச்சியில், ‘தமிழும் இளமையும்’ என்ற தலைப்பில் மாணவர் அங்கம் இடம்பெற்றது. இதில் மாணவர்கள் இஷாக் இப்ராஹிம், ஆமினா ஜூனைரா, ஸ்ரீநிதி ரெங்கபிரசாத் ஆகியோர் கலந்துகொண்டனர். இவர்களுடன், பெற்றோர்களான திரு கோ. ரெங்கபிரசாத்தும் திருமதி சாரதாமணியும் இந்த அங்கத்தில் கலந்துகொண்டனர்.

இசைக்கலைஞரும் பாடகருமான பரசு கல்யாண், அவரது மாணவர்களான ஷ்ருதி கார்த்திக், சாய் காத்யாயனி, பரசுராமன் ஷாய் சித்தாந்த், பரசுராமன் ஷாய் வேதாந்த், வியாசன் வெங்கடேஷ், இஷான் கார்த்திக், அக்க்ஷரா கார்த்திக் ஆகியோருடன் ‘அமுதே தமிழே!’ என்ற பாடலை இணைந்து பாடியது நிகழ்ச்சியின் சிறப்பம்சங்களில் ஒன்றாக அமைந்தது.

மூத்த ஊடகவியலாளர் முஹம்மது அலி ‘தமிழ் பாடம் அல்ல’ என்ற தலைப்பில் தமிழ்மொழியின் சிறப்புகளைப் பற்றிச் சிற்றுரையாற்றினார்.

தமிழ்மொழி என்பது ஒரு பாடம் என்பதற்கும் அப்பால் அது நம் வாழ்க்கை நெறி, நமது அடையாளம் என்பதால் அதை வாழ்க்கையோடு என்றும் இணைக்க வேண்டும் என்று அவர் கூறினார்.

சிங்கப்பூர் ஆயுதப்படை உள்ளிட்ட பல சமூக அமைப்புகளில் 40 ஆண்டுகாலச் சமூக சேவை ஆற்றியதற்காக ஸ்ரீ நாராயண மிஷன் சிங்கப்பூர் அறநிறுவனத்தின் தலைமை நிர்வாக அதிகாரி எஸ். தேவேந்திரனுக்கு ‘ஜமாலியன் விருது’ வழங்கப்பட்டது.

இத்துடன், ‘ஓ’ நிலைத் தேர்வில் சிறப்புத் தேர்ச்சி பெற்ற ஈசூன் டவுன் உயர்நிலைப்பள்ளி மாணவர் அப்துல் ரஹ்மானுக்குப் பாராட்டுச் சான்றிதழ் வழங்கப்பட்டது.

நிகழ்ச்சியின் இறுதி அங்கமாக, மூத்த தமிழாசிரியரும் சிறப்புப் பேச்சாளருமான விஜய் தொலைக்காட்சிப் புகழ் கவிஞர் ஜோ. அருள் பிரகாஷ் சிறப்புரையாற்றினார்.

தமிழ் மொழியை வளர்க்க வேண்டும் என்ற எண்ணம் வெளி உலகத்தில் தேட வேண்டியதன்று. அது நம் மனதுக்குள்ளேதான் இருக்கிறது என்று அவர் கூறினார்.

“பித்தளைப் பாத்திரத்தைப் புளியால் தேய்த்தால் அதன் பளபளப்பு வெளிப்படுவதுபோல, ஒவ்வொருவரும் தங்களுக்குள் இருக்கும் தமிழ்மொழிப் பற்றையும் பெருமையையும் உணர்ந்து, அதை வெளிப்படுத்தும் பொறுப்பை ஏற்க வேண்டும்,” என்றார் திரு அருள் பிரகாஷ்.

மேலும், மனித வாழ்க்கைக்கு வழிகாட்டியாகவும், சோர்ந்தவர்களுக்கு ஊக்கமாகவும், இல்லற வாழ்க்கைக்கு ஒளிவிளக்காகவும் இருந்து, அனைத்து வயதினருக்கும் ஏற்ற அறமும் நெறிகளும் கூறும் தமிழ் மொழி என்றென்றும் வாழ்ந்துகொண்டே இருக்கும் என்று அவர் கூறினார்.