மாணவர் முரசு
இ-பேப்பர்
அனுஷா செல்வமணி
உள்ளூர், வெளிநாட்டுக் கலைஞர்கள் தங்களின் கலைத்திறமைகளை வெளிப்படுத்த வாய்ப்பும் இடமும் அளிக்கிறது புதிதாக வலம்வரும் 'அர்ப்பணம் எக்ஸ்பீரியன்சஸ்' என்ற சமூகவெளி.
கலைஞர்களும் கலைமேல் மிகுந்த ஆர்வம் கொண்டவர்களும் இவ்விடத்தைப் பயன்படுத்துவதற்காக விண்ணப்பிக்கலாம். பன்முகத்தன்மையும் தனிச்சிறப்பும் மிக்க நம் தமிழர் கலைகளில் ஆடல், பாடல், இசை எனப் பலவற்றையும் மேடையேற்றும் வாய்ப்பை இவ்விடம் வழங்கும்.
பிரம்மாஸ்த்ரா இசைக் குழுவின் புல்லாங்குழல் கலைஞர், புத்தாக்கத் தயாரிப்பாளர், இசை அமைப்பாளர் எனப் பல பரிமாணங்கள் கொண்ட திரு நிரஞ்சன் பாண்டியன், அர்ப்பணம் எக்ஸ்பீரியன்சசுடன் கைகோத்து 'அப் கிளோஸ் வித் பிரம்மாஸ்த்ரா' என்ற இசை நிகழ்ச்சியை அண்மையில் மேடையேற்றினார்.
நிகழ்ச்சிக்கு மேலும் வலுசேர்க்கும் விதமாக நவீன யுகத்தினர் ரசிக்கும் திரைப்படப் பின்னணிப் பாடகரும் எட்டாவது முறையாக நடத்தப்பட்ட 'சூப்பர் சிங்கர்' இசை நிகழ்ச்சியின் வெற்றியாளருமான ஸ்ரீதர் சேனா வரவழைக்கப்பட்டார்.
'பொடி அண்ட் பொரியல்' உணவகத்தின் மேல்தளத்தில் அமைந்துள்ள புதிய அரங்கில் நிகழ்ச்சியைக் காண மாலை வேளையில் கிட்டத்தட்ட 30 பேர் கூடினர். நிகழ்ச்சியில் தமது இனிமையான குரலில் பார்வையாளர்களை இசை மழையில் நனைய வைத்தார் திரு ஸ்ரீதர்.
இதற்குமுன் மூன்று முறை சிங்கப்பூருக்கு வருகைபுரிந்திருந்தாலும் உன்னத நோக்கத்திற்காக இம்முறை வந்துள்ளதை எண்ணி நெகிழ்வதாக அவர் குறிப்பிட்டார்.
கலைஞர்களுக்கு அமைக்கப்பட்ட ஒரு மேடையாக மட்டுமல்லாது, உணவகத்திற்கு வரும் வாடிக்கையாளர்கள் கலைஞர்களின் திறமைகளைக் கண்டு, கேட்டு இன்புறவும் உதவும் என்று அர்ப்பணத்தின் தலைமை நிர்வாக அதிகாரி கிரண் ராகவன் உறுதியாகக் கூறினார்.
உள்ளூர்க் கலைஞர்களான சாய் விக்னேஷ், மீனாட்சி ஜோதிஷ், அழகனந்தா கிரிதர் ஆகியோரும் பிற இனத்தைச் சேர்ந்த உள்ளூர் இசைக் கலைஞர்களும் நிகழ்ச்சியில் தங்களது ஆற்றலை வெளிப்படுத்தினர்.
ஒன்றரை மணிநேர நிகழ்ச்சியில் கலந்துகொண்டவர்கள் கலைஞர்களின் இசை விருந்தைக் கேட்டு மகிழ்ந்ததுடன் நிகழ்ச்சியின் இறுதியில் வழங்கப்பட்ட விருந்தைச் சுவைத்துவிட்டு கலைஞர்களுடன் உரையாடுவதற்கான அரிய வாய்ப்பையும் பெற்றனர்.
"கலைகள்வழி நம் பண்பாட்டைக் கட்டிக்காப்பது ஒருபுறம் இருந்தாலும் இந்தியாவையும் சிங்கப்பூரையும் இணைக்கும் பாலமாக இந்தக் கலை மேடை அமைய வேண்டும் என்பது அர்ப்பணத்தின் முக்கிய இலக்கு," என்று திரு கிரண் ராகவன் கூறினார்.