மாணவர் முரசு
இ-பேப்பர்
அஜ்மினா பானு
உயர்நிலைப் பள்ளியில் படித்தபோது பிரெஞ்சு மொழியின்பால் ஈர்க்கப்பட்ட ஹாமிது மரைக்காயருக்கு (படம்) இப்போது ஏழு மொழிகள் தெரியும். பல மொழிகளைக் கற்றுக்கொண்டு பேசும் ஆர்வத்துக்கு ஆரம்பப் புள்ளி அது என்கிறார் அவர்.
மொழிகளைக் கற்றுக்கொள்ள 'டுவோலிங்கோ', 'டீச் யுவர்செல்ஃப்' போன்ற செயலிகளை இணையம்வழி எளிதில் பயன்படுத்த முடிந்ததால் அவரது ஊக்கம் அதிகரித்தது.
தற்போது தேசிய கல்விக் கழகத்தில் முதுநிலைப் பட்டயக் கல்வியை மேற்கொள்கிறார் ஹாமிது.
"மொழியும் கலாசாரமும் அணுக்கமாகப் பிணைந்தவை" என்று கூறிய அவர், மொழி கலாசாரத்தை அறிவதற்கான வாயில் என்றார்.
வாய்ப்பு கிடைக்கும்போதெல்லாம் உணவங்காடிக் கடைக்காரர்களிடம் மலாய் மொழியிலும் இந்தி பேசும் நண்பர்களிடம் இந்தி மொழியிலும் உரையாடுவது அவரது வழக்கம்.
பிற்காலத்தில் பிரான்ஸ், ஸ்பெயின், அரபு நாடுகள் ஆகியவற்றுக்குப் பயணம் செய்ய வாய்ப்புக் கிடைத்தால் அந்நாட்டு மக்களிடம் அவரவர் மொழியில் பேசிப் பழக விரும்புகிறார் ஹாமிது.
அவ்வாறு பேசுவதால் கூடுதல் புரிந்துணர்வு ஏற்படும் என்று கருதும் அவர், மொழிகளின் மூலம் நட்பையும் அன்பையும் வளர்த்துக் கொள்வதே அவற்றைத் தான் கற்றுக்கொள்வதற்கான முக்கிய நோக்கம் என்றார்.
பிரெஞ்சு, ஸ்பானிஷ், அரபு மொழிகளைப் பேச சிங்கப்பூரில் அதிக வாய்ப்பில்லை. அவற்றை நினைவில்கொள்ள 'குவிஸ்லட்', 'அன்கி' போன்ற செயலிகளும் 'ஐடாக்கி' தளமும் கைகொடுப்பதாக ஹாமிது கூறினார்.
இத்தொழில்நுட்பத் தளங்கள் மொழியின் இலக்கணம், வாக்கிய அமைப்பு, சொல்வளம் போன்றவற்றைக் கற்றுத்தர இயலுமே தவிர குறிப்பிட்ட சூழல்களுக்கேற்ப பதிலளிப்பதைக் கற்றுத்தர இயலாது.
அந்த நுணுக்கங்களை நேரடியாக, மொழி தெரிந்தவரிடம் கற்றுக்கொள்வதே சிறப்பு என்றார் ஹாமிது.
ஆங்கிலம், மலாய், இந்தி, ஸ்பானிஷ், பிரெஞ்சு, அரபு, தமிழ் மொழிகளை அறிந்துள்ள அவர், தமிழின் நகைச்சுவை, கேலி உணர்வை மற்ற மொழிகளில் உணர்ந்தது இல்லை என்றார்.
மேலும் பல மொழிகளைக் கற்று, பல கலாசாரங்களைத் தெரிந்துகொள்ளும் முயற்சியில் அடுத்தபடியாக மாண்டரின் மொழியைப் பயின்று சிங்கப்பூரின் நான்கு அதிகாரத்துவ மொழிகளையும் அறிந்த குடிமகனாகத் திகழ்வது ஹாமிதின் விருப்பம்.