மாணவர் முரசு
இ-பேப்பர்
கல்வி அமைச்சு நீண்ட காலமாக முழுமையான கல்வியை வலியுறுத்தி வருகிறது. ஏட்டுக்கல்விக்கு அப்பால் விளையாட்டுகள், இணைப்பாட வகுப்புகள் போன்றவற்றிலும் மாணவர்கள் ஈடுபட தொடர்ந்து ஊக்கமளித்து வருகிறது.
எனினும், ஏட்டுக்கல்வியே மாணவர்களின் முக்கிய நோக்கமாக இருக்கிறது. அதில் சிறக்க மாணவர்கள் பலர் துணைப்பாட வகுப்புகளை நாடும் போக்கும் அதிகமாக உள்ளது.
சிங்கப்பூர் குடும்பங்கள் 2023ஆம் ஆண்டில் தனியார் துணைப்பாட வகுப்புகளுக்கு $1.8 பில்லியன் செலவு செய்ததாக ஸ்ட்ரெய்ட்ஸ் டைம்ஸ் நாளிதழ் செய்தி குறிப்பிடுகிறது.
நன்யாங் தொழில்நுட்ப பல்கலைக்கழகம் இந்த ஆண்டு பிப்ரவரி மாதம் வெளியிட்ட ஆய்வறிக்கையில், 2013 முதல் 2023 வரை, துணைப்பாட வகுப்புக்களான செலவு 63.3 விழுக்காடு அதிகரித்து, $1.1 பில்லியனிலிருந்து, $1.8 பில்லியனாக உயர்ந்துள்ளதாகத் தெரிவிக்கப்பட்டிருந்தது.
மிலியு இன்சைட் (Milieu Insight) எனும் உலகளாவிய சந்தை ஆய்வு, தரவுப் பகுப்பாய்வு நிறுவனம் அண்மையில் 1,000 சிங்கப்பூரர்களிடம் ஆய்வு நடத்தியது. அதில் 16 வயது முதல் 55 வயதுக்கும் மேற்பட்டவர்கள் கலந்துகொண்டனர்.
கல்வி மூலம் தங்கள் பிள்ளைகளுக்கு மன உளைச்சல் ஏற்பட்டாலும், இளம் பெற்றோர்கள் தங்கள் பிள்ளைகளைத் துணைப்பாட வகுப்புகளுக்கு அனுப்பப் பணத்தையும் நேரத்தையும் செலவிடத் தயாராக இருப்பதாக அதில் தெரிய வந்துள்ளது.
ஆய்வில் பங்கேற்ற 25 முதல் 34 வயதுக்கு உட்பட்ட பெற்றோரில் பாதிப் பேர், தங்கள் பிள்ளைகள் ஒவ்வொரு வாரமும் துணைப்பாட வகுப்புகளுக்கும் இதர வகுப்புகளுக்கும் நான்கு முதல் ஆறு மணி நேரம் செலவிடுவதாகத் தெரிவித்தனர்.
பங்கேற்றவர்களில் 40 விழுக்காட்டினர் மாதத்திற்கு $300 முதல் $500 வரை செலவு செய்வதாகக் கண்டறியப்பட்டது.
தொடர்புடைய செய்திகள்
சிங்கப்பூர் கல்வி முறையில் விடாமுயற்சியும், போட்டித்தன்மைமிக்க கலாசாரமும் பின்னிப்பிணைந்திருப்பதாகவும் பெற்றோர் நம்புவதாக அந்தக் கருத்தாய்வு தெரிவித்தது.
பொறியியலாளராகப் பணிபுரியும் இளமாறன் பக்கிரிசாமியின், 43, மூத்த மகன் இந்த ஆண்டு தொடக்கப்பள்ளி இறுதித் தேர்வு எழுதுகிறார்.
மகன் தேர்வில் சிறந்த தேர்ச்சி பெறுவார் என்ற நம்பிக்கை இருந்தாலும், இளமாறனுக்கு இதர பெற்றோர் இடையே நிலவும் போட்டி அழுத்தத்தைத் தருகிறது. அதனால், குழு அடிப்படையிலான துணைப்பாட வகுப்புகளுக்கும், தனியார் வகுப்புக்கும் மகனை அனுப்புகிறார் அவர்.
எனினும் தொடக்கநிலை 4ல் பயிலும் இரண்டாவது மகனை அவர் துணைப்பாட வகுப்புக்கு அனுப்பவில்லை.
நடைமுறையில் முரண்படும் கல்விக் கொள்கை
“துணைப்பாட வகுப்புக்கு வரும் சில பெற்றோர் துணைப்பாட நிலையங்களை ஒப்பிட்டுப் பேசுவார்கள். எந்த வகுப்புக்கு அனுப்பினால் பிள்ளைகள் அதிக மதிப்பெண்கள் வாங்குவார்கள் என்பதாக உரையாடல்கள் இருக்கும்,” என்று இளமாறன் கூறினார்.
கல்வி அமைச்சின் முழுமையான கல்விக் கொள்கை நடைமுறையில் முரண்படுவதாக இளமாறன் கருதுகிறார்.
அவரது மூத்த மகன் பள்ளியில் இயந்திரவியலை இணைப்பாட நடவடிக்கையாகத் தேர்ந்தெடுத்துள்ளார். ஆனால் பள்ளியில் இணைப்பாட நடவடிக்கைக்கு முக்கியத்துவம் வழங்கப்படவில்லை என்பது அவரது வருத்தம்.
சமூக அழுத்தம்
பிள்ளைகள் ஏட்டுக்கல்வியில் சிறந்து விளங்க வேண்டுமென்ற சமூக அழுத்தம் இன்னும் இருப்பதால் பெற்றோர் எப்போதும் போட்டித்தன்மையுடன்தான் இருப்பார்கள் என்றார் முன்னாள் கல்வி அமைச்சு ஆசிரியர் வெரோனிகா ஜோசப், 58.
தங்களுக்குப் பிடித்த பள்ளிக்குப் பிள்ளைகள் செல்ல வேண்டும் என்பதற்காகவும், பள்ளி நேரடிச் சேர்க்கைமூலம் முன்னணி உயர்நிலை பள்ளிகளில் இடம்கிடைக்கவும் பிள்ளைகளைப் பல வகுப்புகளுக்குப் பெற்றோர் அனுப்புவதாகப் பெற்றோரான பிரபாஷிணி, 37 குறிப்பிட்டார்.
படிப்புக்கே அதிக நேரம் செலவாகிறது
தொடக்கநிலை 5, 3ஆம் வகுப்புகளில் பயிலும் 39 வயது சங்கரி இளவழகனின் இரு மகன்களும் துணைப்பாட வகுப்புகளுக்குச் செல்வதில்லை. அவர்கள் கர்நாடக இசை, தெக்குவாண்டோ, பறை இசை வகுப்புகளுக்குச் செல்கின்றனர்.
“துணைப்பாட வகுப்புகளுக்குச் செல்வதன் மூலம் என் பிள்ளைகளின் நேரம் படிப்பதற்கே அதிகம் செலவிடப்படுகிறது. செலவும் அதிகம்,” என்றார் சங்கரி.
உதவி தேவைப்படுவோருக்கு கைகொடுக்கும் சிண்டா
இந்த ஆண்டு தொடக்கப்பள்ளி இறுதித் தேர்வு எழுதவுள்ள தமது மகனை சிங்கப்பூர் இந்தியர் மேம்பாட்டு சங்கத்தின் (சிண்டா) துணைப்பாட வகுப்புகளுக்கு மகனை அனுப்பி வருகிறார் ஜெஸ்லின் மெர்சிபா மேரி, 57.
சிண்டாவின் உதவியினால் அவர் விசைப்பலகை வகுப்புகளுக்கும் செல்கிறார்.
“தம் வயதையொத்த பிற பிள்ளைகள் பல வகுப்புகளுக்குச் செல்வதாக என் மகன் பகிர்ந்துகொள்வான். அவனிடம் நம்மால் முடிந்தது இவ்வளவுதான் என்பேன்,” என்று கூறினார் ஜெஸ்லின். கணவருக்கு உடல்நிலை சரியில்லாததால் அவர் வேலைக்குச் செல்வதில்லை
குடும்பத்தின் நிதிநிலை பிள்ளையின் கற்றலுக்கு தடையாக இருக்கக் கூடாது என்பது சிண்டாவின் முக்கியமான நோக்கங்களில் ஒன்று என்று சிண்டாவின் தலைமை நிர்வாக அதிகாரி அன்பரசு ராஜேந்திரன் கூறினார்.
கல்வி அமைச்சு முழுமையான கல்வி இலக்குக்கு ஏற்ப சிண்டா, ஒரு பிள்ளையின் முழுமையான வளர்ச்சி, மனநலன், மின்னிலக்கத் திறன் ஆகியவற்றிலும் கவனம் செலுத்துவதாகத் திரு அன்பரசு தெரிவித்தார்.
வசதியிருந்தால் கூடுதல் வாய்ப்புகள்
வசதியுள்ள குடும்பங்கள் தங்கள் பிள்ளைகளைச் சிறந்த துணைப்பாட மையங்கள் அல்லது தனிப்பட்ட துணைப்பாட ஆசிரியர்களை நாட முடியும் என்பதால் அவர்களுக்குக் கூடுதல் கல்வி வாய்ப்புகள் உள்ளதாக முன்னாள் தமிழாசிரியர் ரா. பாலசுப்பிரமணியம் தெரிவித்தார்.
இந்த ஆண்டு ‘ஏ’ நிலை தேர்வுகள் எழுதவிருக்கும் சுவேதா நாடி பிரபாகரன், 18, பள்ளியில் ஆசிரியர் கற்பிப்பது போதவில்லை என்பதால் துணைப்பாட வகுப்புக்குச் செல்வதாகக் கூறினார்.
வேதியியல் பாடத்துக்குத் துணைப்பாட வகுப்புக்குச் செல்லும் அவர், அப்பாடத்திட்டம் மிகக் கடினமாக இருப்பதாகவும் தமது ஆசிரியர் அடிப்படை அளவிலேயே கற்பிப்பதாகவும் சொன்னார்.
பெற்றோரின் பயத்தினால் அதிகரித்து வரும் தேவை
துணைப்பாட வகுப்புக்கான தேவை அதிகரித்துக் கொண்டே வருவதாகக் குறிப்பிட்டார் ரேடியன்ட் துணைப்பாட நிலையத்தை நடத்திவரும் சரஸ்வதி தேவி, 34.
10 ஆண்டுகளுக்கும் மேலாகத் துணைப்பாட நிலையத்தை நடத்திவரும் அவர், தொடக்கக் கல்லூரி உயிரியல், வேதியியல் பாடங்கள், உயர்நிலை பள்ளி அறிவியல் பாடங்களைக் கற்பித்து வருகிறார்.
இவரிடம் படிக்கும் மாணவர்களில் 95 விழுக்காட்டினர் இந்திய மாணவர்கள்.
பள்ளிகளில் அரையாண்டுத் தேர்வு அகற்றப்பட்டதால் இறுதியாண்டுத் தேர்வுகளில் பிள்ளைகளின் தேர்ச்சி குறித்து பெற்றோர் மிகவும் அச்சப்படுவதாகக் கூறினார்.
போட்டித்தன்மைமிக்க சூழலில் பெற்றோர் துணைப்பாட வகுப்புகளுக்கு அதிக செலவு செய்யவும் தயாராக இருப்பதாகக் குறிப்பிட்ட சரஸ்வதி, ஒரே பாடத்திற்கு வெவ்வேறு துணைப்பாட வகுப்புகளுக்குப் பிள்ளைகளை அனுப்புவோரும் உண்டு என்றார்.
கட்டணமும் உயர்கிறது, மாணவர் எண்ணிக்கையும் கூடுகிறது
பத்தாண்டுகளுக்கு முன்னர் ஒப்பிடுகையில் தற்போது தனது நிலையத்துக்கு வரும் மாணவர்களின் எண்ணிக்கை 85 விழுக்காடு அதிகரித்துள்ளதாக தெரிவித்தார்.
கணித பாடத்திற்கு ஒரு வகுப்புக்கு $70, அறிவியலுக்கு ஒரு வகுப்புக்கு $100, ஆங்கிலத்திற்கு நான்கு வகுப்புகளுக்கு $160 செலவு செய்கிறார் இளமாறன்.
துணைப்பாட வகுப்புகளுக்கான தேவையும், உயரும் வாழ்க்கைச் செலவினமும் துணைப்பாட வகுப்புகளின் கட்டண உயர்வுக்கு முக்கியக் காரணம் என்று குறிப்பிட்டார் சரஸ்வதி.