மாணவர் முரசு
இ-பேப்பர்
அல்வா என்றால் யாருக்குத்தான் பிடிக்காது? பொதுவாக கோதுமை, சர்க்கரையிலிருந்து செய்யப்படும் ஓர் இனிப்பு உணவுப் பண்டம் இது. 'அல்வா' என்ற சொல் அரேபிய மொழியில் இருந்து வந்ததாகும்.
அரேபிய மொழியில் 'அல்வா' என்பதற்கு இனிப்பு என்று பொருளாகும். அல்வாவில் பலவகை உண்டு. இருப்பினும், ஆரோக்கிய வாழ்க்கைமுறையைக் கடைப்பிடிக்க விரும்புவோர் 'அல்வா'வைத் தொடத் தயங்குவர். இப்பிரிவினருக்கு ஆப்பிள் அல்வா ஏற்றது.
இனிப்பு சாப்பிடும் ஆசை ஏற்படும்போதெல்லாம், சுலபமான இந்தச் சமையல் குறிப்பைக் கொண்டு ஆப்பிள் அல்வாவைத் தயாரித்துவிடலாம்.
ஆனால், கைக்கு வேலை தருவதுடன் இதைத் தயாரிப்பதற்குக் கொஞ்சம் பொறுமையும் வேண்டும்.
ஆப்பிளைச் சாப்பிட விரும்பாத பிள்ளைகள் உங்கள் வீட்டில் இருந்தால், அதே ஆப்பிளைக் கொண்டு அல்வா தயாரித்து அவர்களுக்கு ஊட்டிவிட்டுப் பாருங்கள்.
பால், பாலேடு இவை எதுவும் இல்லாமல் தயாரிக்கப்படுவதால், ஆப்பிள் அல்வாவை உண்ட பிறகும் அதிகம் சாப்பிட்டது போன்ற உணர்வு உங்களுக்குத் தோன்றாது.
மேலும், சீனியின்றி இதைத் தயாரிக்க முடிவதால் இனிப்பளவையும் நம்மால் கட்டுப்படுத்திக்கொள்ள முடிகிறது.
தேவையானவை:
7 ஆப்பிள் பழங்கள்
சீனி (விருப்பத்திற்கு ஏற்ப)
சிறிதளவு நெய்
2 மேசைக்கரண்டி தண்ணீர்
1 தேக்கரண்டி
இலவங்கப்பட்டைத் தூள்
1 தேக்கரண்டி வென்னிலா சாரம்
10 பாதாம்
10 முந்திரி
செய்முறை:
1. பழங்களைத் தண்ணீரில் கழுவிய பிறகு, ஒவ்வொரு ஆப்பிள் பழத்தின் தோலையும் நீக்கவும்.
2. விதைகள், பழத்தின் நடுப்பகுதியை அகற்றிவிட்டு பழங்களைச் சிறு சிறு துண்டுகளாக நறுக்கிக்கொள்ளவும்.
3. கடாயில் 2 மேசைக்கரண்டி நெய்யை உருக்கி, நறுக்கிய பழங்களை அதில் போடவும்.
4. நெருப்பின் அளவைக் குறைத்து ஐந்து, ஆறு நிமிடங்களுக்கு பழங்களை வதக்கவும். 2 மேசைக்கரண்டி தண்ணீரைச் சேர்த்து மீண்டும் வதக்கவும்.
5. கடாயை 15 நிமிடங்களுக்கு மூடிய பிறகு ஆப்பிள் துண்டுகளை நசுக்கவும்.
6. ஆப்பிள் பழத்தில் இனிப்பு இருந்தால் சீனி வேண்டாம்.
7. சிறிது நெய் சேர்த்து சுமார் 10 நிமிடங்களுக்கு வதக்கவும்.
8. இலவங்கப்பட்டைத் தூள், வென்னிலா சாரம், சிறிது சிறிதாக நறுக்கப்பட்ட பாதாம், முந்திரி ஆகியவற்றை ஒவ்வொன்றாகச் சேர்க்கவும்.
9. ஆப்பிள் அல்வா கலவை உருவாகும்வரை கிண்டவும்.
படம்: இந்திய ஊடகம்