மாணவர் முரசு
இ-பேப்பர்
வெண்ணெய்ப் பழம், பட்டர் ஃப்ரூட், ஆனைக்கொய்யா, முதலைப் பேரி என்றெல்லாம் அழைக்கப்படும் அவகாடோ பழம் (Avocado), அன்றாட நார்ச்சத்து தேவையில் 40% பூர்த்தி செய்கிறது. அதோடு, இப்பழங்கள் மருத்துவக் குணம் நிறைந்தவையாகவும் உள்ளன.
வெண்ணெய்ப் பழங்கள் மெக்சிகோ, மத்திய அமெரிக்காவை பூர்வீகமாகக் கொண்டவை. ஆனால், அவை வட அமெரிக்கா உட்பட உலகின் பல பகுதிகளிலும் பயிரிடப்படுகின்றன.
அமெரிக்காவின் கலிபோர்னியா மாநிலம் இந்த வெண்ணெய்ப் பழங்களை உற்பத்தி செய்வதில் முன்னணியில் திகழ்கிறது. இங்குள்ள 5,000க்கும் மேற்பட்ட அவகாடோ பண்ணைகளில் இப்பழங்கள் உற்பத்தி செய்யப்படுகின்றன.
ஆரோக்கியமான உணவுப்பட்டியலில் உள்ள அவகாடோ பழத்தில் 25க்கும் மேற்பட்ட ஊட்டச்சத்துகள் அடங்கியுள்ளன. இதிலுள்ள சத்துகள் நோயின் பிடியிலிருந்து காக்க உதவுகின்றன.
வாழைப்பழத்தில் இருக்கும் பொட்டாசியத்தைவிட அவகாடோ வில் 35% அதிகமாகவே உள்ளது. இதனால், உயர் ரத்த அழுத்தம் அதிகரிப்பது தணியும்.
உலகில் விளையும் பெரும்பாலான பழங்களில் மாவுச்சத்து, புரதம், நார்ச்சத்து போன்ற சத்துகள் உள்ளன. ஆனால், அதிகளவில் ஆரோக்கிய கொழுப்புச் சத்தைக் கொண்டிருப்பதில்லை.
இந்த அவகாடோ பழத்தில் பல ஊட்டச்சத்துகளும் அடங்கி இருப்பதுடன், அதிகளவு ஆரோக்கிய மான கொழுப்புச் சத்துகளும் நிறைந்துள்ளன.
இப்பழம் பற்றி அண்மையில் நடத்தப்பட்ட ஒரு ஆய்வின் முடிவுகள் 'ஜர்னல் ஆஃப் நியூட்ரிஷன்' இதழில் வெளியிடப்பட்டுள்ளன.
அதன்படி, தினமும் ஒரு அவகடோ பழத்தை உட்கொள்வதால் வயிற்றுக் கொழுப்பு குறைவதாக கண்டறிந்துள்ளனர்.
'ஆர்த்தரைட்டீஸ்' பாதிப்பு உள்ளவர்கள் இப்பழத்தைச் சாப்பிட்டால் மூட்டுவலி குணமாகும் என்று மருத்துவ நிபுணர்கள் கூறியுள்ளனர்.
இல்லினாய்ஸ் பல்கலைக்கழகப் பேராசிரியர்கள் நூற்றுக்கணக்கான முதியவர்களைக் கொண்டு 12 வார சோதனையை நடத்தினர். அதில், முதியவர்கள் இரண்டு குழுவினராகப் பங்கேற்றனர்.
ஒரு குழுவிற்கு அவகாடோ பழத்துடன் தினசரி உணவும் மற்ெறாரு குழுவினருக்கு இப்பழம் சேர்க்கப்படாமலும் உணவு வழங்கப்பட்டது.
ஆய்வின் ஆரம்பத்திலும் முடிவிலும் பங்கேற்ற முதியவர்களின் அடிவயிற்றுக் கொழுப்பையும் அவர்களின் இனிப்புத் தன்மையையும் ஆய்வாளர்கள் ஆய்வு செய்தபோது, அவகாடோ பழத்தை எடுத்துக்கொண்டவர்களுக்கு சிறந்த முறையில் எடையும் தொப்பைக் கொழுப்பும் குறைந்திருந்தது தெரியவந்ததாகக் கூறியுள்ளனர்.
அவகாடோவில் கொழுப்பு அதிகம் இருந்தாலும் மாவுச்சத்து குறைவாகவும் நார்ச்சத்து அதிகமாகவும் இருக்கிறது என்று விளக்கம் அளித்துள்ள மருத்துவர் ஜெசிகா மார்கஸ், இப்பழத்தில் காணப்படும் ஃபைட்டோ வேதிப்பொருட்கள் புற்றுநோய் செல்களின் வளர்ச்சியைத் தடுத்து, தாக்கி அழிக்கக்கூடிய தன்மை கொண்டது எனவும் கூறியுள்ளார்.
இப்பழத்தை தினமும் உட்கொள்பவர்களின் உடல் எடை, இடுப்புச் சுற்றளவு, பிஎம்ஐ எனும் உடல் எடை குறியீட்டு எண் போன்றவை குறைவான அளவில் இருப்பதாகவும் பிற ஆய்வுகள் தெரிவிக்கின்றன.