மாணவர் முரசு
இ-பேப்பர்
மோசடிகளுக்கு எதிராக சிங்கப்பூர் மக்கள் தீவிரமான நடவடிக்கைகளை எடுக்க வேண்டும் என்று உள்துறை துணை அமைச்சர் சுன் ஷுவெலிங் கேட்டுக் கொண்டுள்ளார்.
எவரும் மோசடிக்கு இரையாகலாம். அதன் விளைவுகள் மோசமாக இருக்கும் என்று அவர் எச்சரித்தார்.
"மோசடிகள் உலகம் எங்கும் உள்ள அனைத்து சட்ட, அமலாக்க நிறுவனங்களுக்கும் பெரும் சவாலாக உள்ளன.
"எனவே, சட்ட நடைமுறைகளை மட்டுமே நம்பியிருக்க முடியாது. மோசடிகளுக்கு எதிரான சிறந்த தற்காப்பு, விழிப்புடன், கவனத்துடன், விவேகத்துடன் இருப்பது. அதில் நம்மைப் பாதுகாத்துக் கொள்வதோடு, மோசடிகளில் இருந்து மற்றவர்களையும் பாதுகாப்பது," என்றார் அமைச்சர். மோசடிக் குற்ற எதிர்ப்பில் விழிப்புணர்வை ஏற்படுத்த சன்டெக் மாநாட்டு மண்டபத்தில் நேற்று முன்தினம் நடந்த 'ஸ்கேமினார்' கருத்தரங்கில் அவர் பேசினார்.
அமைச்சுகளுக்கு இடையிலான மோசடித் தடுப்புக் குழுவுக்குத் தலைமை தாங்கும் அவர், நேரடியாக நடைபெறும் குற்றங்கள் குறைவாக இருக்கும் நிலையில், இணைய மோசடிகள் தான் தற்போதைய தலையாய பிரச்சினை என்றார்.
உள்துறை அமைச்சு, சிங்கப்பூர் காவல்துறை, தேசிய குற்றவியல் தடுப்பு மன்றம் ஆகியன 'ஸ்ட்ரெய்ட்ஸ் டைம்ஸ்' செய்தித்தாளுடன் இணைந்து நடத்திய இக்கருத்தரங்கில் 700க்கும் மேற்பட்டோர் நேரடியாகவும் 200க்கும் மேற்பட்டோர் இணையம் வாயிலாகவும் பங்கேற்றனர்.
சமுதாய, குடும்ப மேம்பாட்டு துணை அமைச்சருமான அவர், 2017 முதல் 2021 வரை நடைபெற்ற 60,000 இணைய மோசடிச் சம்பவங்களில் ஒரு பில்லியன் வெள்ளிக்கும் மேற்பட்ட தொகையை சிங்கப்பூர் மக்கள் இழந்துள்ளதாகவும் அமைச்சர் சுன் ஷுவெலிங் குறிப்பிட்டார்.
உலகளவில் நிலவும் சிரமமான பொருளியல் சூழ்நிலையில், மோசடிகள் அதிகரிக்கலாம். வேலை மோசடிகள் கவலைக்குரியன என்றார் அவர்.
சில பிரிவினரே மோசடிகளுக்கு இலக்காக இருப்பார்கள் என சிலர் நினைக்கலாம். மூத்த குடிமக்கள்தான் மோசடிகளுக்கு இரையாகிறார்கள் என்று சிலர் நினைக்கிறார்கள். இது உண்மையல்ல. எவரும் மோசடிக்கு ஆளாகலாம் என்பதைப் புள்ளிவிவரங்கள் காட்டுகின்றன.
மோசடிகள் பாதிக்கப்பட்டவர்களுக்கும் அவர்களது அன்புக்குரியவர்களுக்கும் மோசமான விளைவுகளை ஏற்படுத்தலாம், நிதி இழப்புகளுக்கு அப்பால் அவர்களைப் பாதிக்கலாம்.
உள்துறை துணை அமைச்சர் சுன் ஷுவெலிங்
மோசடித் தடுப்பு நேரடி எண்
1800-722-6688
மனநலக் கழக உதவி எண்
6389-2222
சிங்கப்பூர் அபய ஆலோசனை சங்கம் 1-767
மனநலத்துக்கான சிங்கப்பூர் சங்கம் 1800-283-7019
சில்வர் ரிப்பன் சிங்கப்பூர்
6386-1928
டிங்கிள் ஃபிரண்ட் (7-12 வயது) 1800-2744-788
டச்லைன் (ஆலோசனை)
1800-377-2252
மோசடிக் குற்றத்துக்கு எதிரான வளங்களைப் பெற:
scamalert.sg
scamshield.org.sg