மாணவர் முரசு
இ-பேப்பர்
குப்பைத்தொட்டிகளையும் வாளிகளையும் அடித்து, ஓசை எழுப்பி இசை ஆர்வத்தை இளையர்கள் மத்தியில் தூண்டும் ஜெய், தன் வாழ்க்கையின் ஒரு கட்டத்தில் பிடிமானமில்லாமல் வாழ்ந்தார்.
தந்தையின் பராமரிப்பில் இருந்த அல்ட்ரிச் ஜெய் கிஷான், 10 வயதில் அந்தத் தந்தையை இழந்தார். சிகரெட்டிலும் மதுவிலும் அவர் ஆறுதல் காணத் தொடங்கினார். அவரை நல்வழிப்படுத்த எண்ணிய ஜெய்யின் தாயார், அவரைச் சிறுவர் இல்லத்தில் சேர்த்தார்.
ஆனால் தான் மீண்டும் சிறுவர் இல்லத்தில் பணியாற்றுவார் என்றோ, அப்பணியில் இந்நாள் வரை நீடிப்பார் என்றோ ஜெய் அப்போது நினைத்துக்கூடப் பார்க்கவில்லை. அந்தச் சிறுவர் இல்லப் பராமரிப்பில் ஜெய்யின் பதின்ம காலம் கழிந்தது.
சிறுவர் இல்லத்திலிருந்து 2010ல் வெளியேறியபோது ஜெய் குதூகலித்தார். சுதந்திரம் கிடைத்துவிட்டதாக அவர் எண்ணினார். தொழில்நுட்பக் கல்விக்கழகத்தில் மின்னிலக்க ஒலி, ஒளித் தயாரிப்புத் துறையில் பயின்ற காலத்தில் பகுதிநேர வேலைகள் செய்தும் வந்தார்.
இருப்பினும், தாள வாத்தியங்களைக் கற்றுக்கொண்டு தன் இசைத் திறமையை மேம்படுத்திக்கொள்ளும் வாய்ப்பு, அந்தச் சிறுவர் இல்லத்தில்தான் அமைந்ததாக அவர் கூறினார்.
"அதுவரை உதவி தேவைப்படும் ஓர் இளையராகத்தான் சுற்றி இருந்தவர்கள் என்னைப் பார்த்தார்கள். நம்பிக்கைக்குரிய ஒரு நபராக என்னை அவர்கள் கருதவில்லை. சிறுவர் இல்லப் பராமரிப்பாளர்கள்தான் என்னை முதன்முறையாக மரியாதையுடன் நடத்தினார்கள்," என்றார் 29 வயது ஜெய். தான் பயனடைந்த அதே வகையில் பிற இளையர்களுக்கும் கைகொடுக்கவேண்டும் என்ற ஆர்வம் அவருக்கு ஏற்பட்டது.
தற்போது இளையர்களுடன் பணிபுரிந்துவரும் ஜெய், 'யூத்ரீச்' பிரிவில் இயங்கி வருகிறார். பாதிப்படையக்கூடிய இளையரைக் கண்டறிந்து அவர்களுக்கு உதவுவது ஜெய்யின் வேலைப் பொறுப்புகளில் ஒன்றாகும். ஜெய் இவர்களுடன் இயல்பாக உரையாடிச் சிக்கல்களை அறிந்துகொள்ள முற்படுகிறார்.
தனக்கு இசை தந்த பிடிமானம் பிற இளையர்களையும் வசப்படுத்தும் என்ற நம்பிக்கையில், தாள வாத்தியங்கள் வாசிப்பதைச் சில வகுப்புகளில் அறிமுகப்படுத்தினார் ஜெய். குப்பைத்தொட்டி, வாளி எனக் கையில் கிடைப்பதைப் பயன்படுத்தி இசை உருவாக்கியது இளையர்களிடையே நல்லதொரு மாற்றத்தைக் கொண்டு வந்ததாகவும் அவர் நினைவுகூர்ந்தார்.
"இப்பணியில், ஒவ்வொரு நாளும் வெவ்வேறு படிப்பினைகள் உண்டு; சலிப்பு தட்டவே தட்டாது," என்று கூறிய ஜெய், தன் மனதுக்கு நெருக்கமான இந்தப் பணியை நிறுத்துவதாக இல்லை என்றார்.