மாணவர் முரசு
இ-பேப்பர்
புதுடெல்லி: உலகளாவிய நிச்சயமற்ற தன்மைக்கு மத்தியில் ஒளிமயமான எதிர்காலத்தை நோக்கி இந்தியா நம்பிக்கையுடன் நகர்ந்துகொண்டிருப்பதாக பிரதமர் நரேந்திர மோடி தெரிவித்துள்ளார்.
இந்தியா மேலும் வளர்ச்சி அடைந்து, தன்னிறைவு பெற்ற நாடாக உருவெடுப்பதில் ஆர்வமாக உள்ளதாக அவர் புதுடெல்லியில் நடைபெற்ற நிகழ்ச்சியில் பேசும்போது குறிப்பிட்டார்.
இந்தியா வளர்ந்து வரும் சந்தை மட்டுமன்று, அது வளர்ச்சிக்கான ‘மாதிரி’ என்றும் அவர் சொன்னார்.
கடந்த 2022ஆம் ஆண்டு ஏற்பட்ட ஐரோப்பிய நெருக்கடிநிலை, உலகளாவிய விநியோகச் சங்கிலிகள், எரிசக்தி சந்தைகளைப் பாதித்ததாகக் குறிப்பிட்ட திரு மோடி, அத்தகைய சூழலிலும் இந்தியாவின் பொருளியல் 2023 வரை வலுவாகத் தொடர்ந்தது என்றார்.
அதன்பின் 2023ஆம் ஆண்டு மேற்காசியாவின் நிலைமை மோசமடைந்தபோதும், இந்தியாவின் வளர்ச்சி விகிதம் வலுவாக இருந்ததை நினைவுகூர்ந்த அவர், நடப்பாண்டில் உலகளாவிய நிலையற்ற தன்மையிலும் இந்தியாவின் வளர்ச்சி விகிதமானது 7%ஆக உள்ளது எனப் பெருமிதத்துடன் குறிப்பிட்டார்.
உலகம் சீர்குலைவுக்கு அஞ்சும் நேரத்தில் உலக நாடுகள் அனைத்தும் இந்தியாவை நம்பிக்கையுடன் பார்ப்பதாகத் திரு மோடி கூறினார்.
“பீகார் சட்டமன்றத் தேர்தல் முடிவுகள் இந்திய மக்களின் உயர்ந்த விருப்பங்களை மீண்டும் ஒருமுறை நிரூபிக்கின்றன.
“இன்று, குடிமக்கள் அந்த விருப்பங்களை நிறைவேற்றவும் வளர்ச்சிக்கு முன்னுரிமை அளிக்கவும் நேர்மையுடன் செயல்படும் அரசியல் கட்சிகள்மீது நம்பிக்கை வைத்துள்ளனர்.
தொடர்புடைய செய்திகள்
“பீகார் தேர்தல் முடிவுகளிலிருந்து பாடம் கற்றுக்கொள்ள வேண்டும். இன்று வழங்கப்படும் ஆட்சி முறையே வரும் ஆண்டுகளில் அரசியல் கட்சிகளின் எதிர்காலத்தைத் தீர்மானிக்கும்,” என்றார் பிரதமர் மோடி.
மத்திய அரசாக இருந்தாலும் சரி, மாநிலங்களில் பல்வேறு கட்சிகள் தலைமையிலான அரசுகளாக இருந்தாலும் சரி, வளர்ச்சியும் மேம்பாடும் மட்டுமே மிக உயர்ந்த முன்னுரிமையாக இருக்க வேண்டும் என்று அவர் வலியுறுத்தினார். சிறந்த முதலீட்டுச் சூழல்களை உருவாக்குவதில் போட்டியிடவும், வணிகம் செய்வதை எளிதாக்குவதில் போட்டியிடவும், வளர்ச்சி அளவுருக்களை முன்னேற்றுவதில் போட்டியிடவும் அனைத்து மாநில அரசுகளுக்கும் அவர் அழைப்பு விடுத்தார்.
இத்தகைய முயற்சிகள்தான் மக்களின் நம்பிக்கையைப் பெறும் என்றார் பிரதமர்.