ஆந்திராவிலிருந்து இறால் இறக்குமதி: தடையை விலக்கிய ஆஸ்திரேலியா

புதுடெல்லி: ஆஸ்திரேலியா, பல காலமாக இந்தியாவின் ஆந்திர மாநிலத்திலிருந்து ‌ஷ்ரிம்ப் வகை இறால் இறைச்சியை இறக்குமதி செய்வதற்குத் தடை விதித்திருந்தது.

இப்போது அந்தத் தடை நீக்கப்பட்டுள்ளதாக பல்வேறு ஊடகங்கள் தெரிவித்துள்ளன.

அமெரிக்க அதிபர் டோனல்ட் டிரம்ப்பின் வரிவிதிப்பால் ஆந்திராவில் இறால் ஏற்றுமதித் துறை சவால்களை எதிர்நோக்கியது. இத்தகைய சூழலில் தடை நீக்கப்பட்டது அந்த மாநிலத்துக்கு நற்செய்தியாகப் பார்க்கப்படுகிறது.

ஆந்திர மாநிலத்தின் தகவல், தொடர்பு அமைச்சர் நாரா லோகே‌ஷ் செவ்வாய்க்கிழமை (அக்டோபர் 21) இதனைத் தெரிவித்தார். ஆஸ்திரேலியாவுக்கு அதிகாரத்துவப் பயணம் மேற்கொண்டுள்ள அவர், அந்நாட்டு அரசாங்க அதிகாரிகள், முதலீட்டாளர்கள், கடல் விலங்கு இறைச்சி வர்த்தக அதிகாரிகள் ஆகியோருடன் சந்திப்பு நடத்தி வருகிறார்.

இது, இந்தியாவின் கடல் விலங்கு இறைச்சித் துறைக்குக் கிடைத்திருக்கும், வருங்காலத்தில் போக்கை மாற்றக்கூடிய நற்செய்தி என்று திரு லோகே‌ஷ் எக்ஸ் தளத்தில் பதிவிட்டார். இந்தியாவிலிருந்து உரிக்கப்படாத இறால்களை இறக்குமதி செய்ய ஆஸ்திரேலியா ஒப்புதல் அளித்துள்ளதாக அவர் தெரிவித்தார்.

அந்த இறால் இறைச்சியில் ஒருவகை கிருமி இருந்தது கண்டறியப்பட்டதைத் தொடர்ந்து ஆஸ்திரேலியா அவற்றுக்குத் தடை விதித்திருந்தது.

இத்தடை, இந்திய ஏற்றுமதி நிறுவனங்களுக்குப் பெரிய சவாலாக இருந்து வந்தது. குறிப்பாக வட ஆந்திராவில் உள்ள விவசாயிகளுக்கும் வர்த்தகர்களுக்கும் இது பொருந்தும்.