புதுடெல்லியைச் சூழ்ந்த கடும் புகைமூட்டம்

புதுடெல்லி: கடும் புகைமூட்டத்தால் இந்தியத் தலைநகர் புதுடெல்லி வெகுவாகப் பாதிக்கப்பட்டுள்ளது.

இதன் காரணமாக விமானச் சேவைகள் ரத்து செய்யப்படும் நிலை ஏற்படக்கூடும் என்று அஞ்சப்படுகிறது.

சில இடங்களில், முன்னால் இருப்பவற்றைப் பார்க்க முடியாத அளவுக்கு காற்றின் தரம் மோசமாக இருப்பதாக அதிகாரிகள் தெரிவித்தனர்.

பனிக்காலம் தொடங்கியதிலிருந்து கடும் புகைமூட்டத்தால் புதுடெல்லி பாதிக்கப்பட்டுள்ளது.

மாசடைந்த தலைநகரங்கள் பட்டியலில் புதுடெல்லி மூன்றாவது இடம் வகிப்பதாக சுவிட்சர்லாந்தைச் சேர்ந்த ஐகியூஏர் தெரிவித்துள்ளது.

இதுவரை புதுடெல்லியில் எந்த ஒரு விமானச் சேவையும் ரத்து செய்யப்படவில்லை என்றும் வேறு நகருக்குத் திருப்பிவிடப்படவில்லை என்றும் புதுடெல்லி விமான நிலையத்தின் செய்தித்தொடர்பாளர் தெரிவித்தார்.

ஆனால், புகைமூட்டம் கடுமையாக இருப்பதால் தரையிறங்க விமானங்கள் சிரமப்படக்கூடும் என்று அதிகாரிகள் எச்சரிக்கை விடுத்துள்ளனர்.

புகைமூட்டம் காரணமாக விமானச் சேவைகள் தாமதமடையக்கூடும் என்று இண்டிகோ, ஸ்பைஸ்ஜெட் ஆகிய விமானச் சேவைகள் சமூக ஊடகத்தில் பதிவிட்டன.

தொடர்புடைய செய்திகள்

காற்று தூய்மைக்கேட்டால்பொருளியலுக்கு பாதிப்பு

இந்திய நேரப்படி வெள்ளிக்கிழமை (ஜனவரி 3) காலை 10.14 மணி நிலவரப்படி 20 விமானச் சேவைகள் சராசரியாக எட்டு மணி நேரத்துக்குத் தாமதமடைந்ததாகவும் ஃபிளைட்ரேடார்24 எனும் விமானப் போக்குவரத்து இணையப்பக்கம் தெரிவித்தது.

புகைமூட்டம் காரணமாகப் புதுடெல்லியில் சில ரயில் சேவைகளும் பாதிக்கப்பட்டதாக இந்திய ஊடகம் தெரிவித்தது.