ஹோமியோபதி மருந்து வர்த்தகப் பெயரில் மோசடி

அகமதாபாத்: இந்தியாவில் ஹோமியோபதி மருந்து வர்த்தகம் என்ற போர்வையில் மோசடி மேற்கொண்டதாக நம்பப்படுவோர் கைது செய்யப்பட்டுள்ளனர்.

அகமதாபாத் இணையக் குற்றப் பிரிவு, மும்பை, பெங்ளூரு நகரங்களில் அறுவரைக் கைது செய்துள்ளது. அவர்களில் நைஜீரியாவைச் சேர்ந்த மடுஃபோர் ஸ்டீவ் உஸோச்சி என்ப[Ϟ]வரும் அடங்குவார்.

கைது செய்யப்பட்ட மற்றவர்கள் கிருஷ்ணமதி செளத்ரி, சலீம் ‌ஷெய்க், த்ரிஜுகிலால் குர்மி, ராஜே‌ஷ்குமார் சரோஜ் என அடையாளம் காணப்பட்டுள்ளனர். அனைவரும் மும்பை, அதன் சுற்று வட்டாரங்களைச் சேர்ந்தவர்கள்.

ஹோமியோபதி மருந்து வர்த்தகம் என்ற போர்வையில் அகமதாபாத்வாசி ஒருவரிடமிருந்து 3.2 மில்லியன் ரூபா[Ϟ]யைப் (470,672 வெள்ளி) பறித்த இணையக் குற்றக் கும்பலை அவர்கள் நடத்தியதாகச் சந்தேகிக்கப்படுகிறது.

இந்த முறியடிப்பு நடவடிக்கை, இந்தியாவில் மேற்கொள்ளப்பட்டுள்ள எல்லை தாண்டிய இணையக் குற்றத் தடுப்பு நடவடிக்கைகளில் முக்கியமான ஒன்றாகப் பார்க்கப்படுகிறது.

தான் ஏமாற்றப்பட்டதாக நிஹார் வர்மா என்ற அகமதாபாத்வாசி புகார் அளித்ததாக காவல்துறையினர் தெரிவித்தனர். ஆப்பிரிக்க மருந்து நிறுவனம் ஒன்றைப் பிரதிநிதிப்பவர்கள் என்று சொல்லிக்கொண்டு சிலர் இணையம்வழித் தன்னைத் தொடர்புகொண்டதாக அவர் புகாரளித்திருந்தார்.

‘இயூப்பட்டோரியம் மெர்க்கோலா லிக்குவிட்’ (Eupatorium Mercola Liquid) என்ற ஹோமியோபதி மருந்தை விநியோகிக்க ஆள் தேவை என்று அவர்கள் தன்னிடம் கூறியதாக நிஹார் வர்மா குறிப்பிட்டிருக்கிறார். அம்மருந்து, ஆப்பிரிக்காவில் மலேரியா, டெங்கி போன்ற நோய்களுக்கு சிகிச்சையளிக்கப் பயன்படுத்தப்படுகிறது.

தொடர்புடைய செய்திகள்

மோசடி நிலையங்களைத் தரைமட்டமாக்கும் மியன்மார் ராணுவம்

அதிக மதிப்புள்ள, வர்த்தகத்தில் ஈடுபடுவதற்கான பரிந்துரையை அவர்கள் தன்னிடம் முன்வைத்ததாக வர்மா கூறியிருக்கிறார். அந்தப் பரிந்துரை நம்பகமானது என்று வர்மா முதலில் நம்பியிருக்கிறார். அதனைத் தொடர்ந்து அவர் ஏமாற்றப்பட்டதாகக் கூறப்படுகிறது.

இந்த மோசடியை மேற்கொண்டதாக நம்பப்படும் கும்பலை நைஜீரியர்கள் வழிநடத்தியது விசாரணையில் தெரிய வந்தது. மடுஃபோர் ஸ்டீவ் உழோச்சி, மோசடியில் இடம்பெறக்கூடிய பரிவர்த்தனைகளைக் கவனித்துக்கொண்டதாக சந்தேகிக்கப்படுகிறது.