பெங்களூரில் குப்பைகளை வீசுவோரைக் காணொளி எடுத்து அனுப்பினால் ரொக்கம்

பெங்களூரு: பொது இடத்தில் குப்பைகளை வீசுவோரைத் தங்கள் கைப்பேசியில் காணொளி எடுத்து ‘வாட்ஸ்அப்’ செயலி மூலம் அனுப்புவோருக்கு ரூ.250 சன்மானம் வழங்கப்படும் என பெங்களூரு திடக்கழிவு மேலாண்மை நிறுவனம் அறிவித்துள்ளது.

குப்பை வீசும் நபரைக் கண்டறிந்து அவர்களுக்கு 1,000 முதல் 10,000 ரூபாய் வரை அபராதம் விதிக்கப்படும் என்றும் அந்நிறுவனம் கூறியுள்ளது.

பெங்களூருவில் குப்பை பிரச்சினை தீராத தலைவலியாக உள்ளது.

தூய்மைப் பணியாளர்கள் வீடு வீடாகக் குப்பை சேகரிக்க வந்தாலும், பலரும் குப்பையைக் கொடுப்பதில்லை. அவர்கள் சென்றபின், அதை சாலையில் வீசுகின்றனர்.

அதனால், அந்நகரின் பிரதான சாலைகள்கூட குப்பை மேடாகக் காட்சி அளிக்கின்றன. அதைக் கட்டுப்படுத்துவதற்கான இந்தப் புதிய முயற்சியைக் கையில் எடுத்துள்ளதாக அந்நிறுவனம் தெரிவித்துள்ளது.