தங்கம், வெள்ளி இறக்குமதி: வங்கிகளுக்கு வழங்கப்பட்ட சலுகை ரத்து

புதுடெல்லி: வங்கிகள் மற்றும் அதிகாரத்துவ அமைப்புகள் மூலம் இறக்குமதி செய்யப்படும் தங்கம், வெள்ளி மற்றும் பிளாட்டினம் மீதான ஒருங்கிணைந்த ஜிஎஸ்டி வரிவிலக்குச் சலுகையை ஜிஎஸ்டி அமைப்பு திரும்பப் பெற்றுள்ளது.

அந்த வரிவிலக்குச் சலுகை இவ்வாண்டு மார்ச் 31க்குப் பிறகு நீட்டிக்கப்படவில்லை என்று வருவாய்த்துறைச் செயலாளர் அரவிந்த் ஸ்ரீவஸ்தவா வியாழக்கிழமை (அக்டோபர் 8) புதுடெல்லியில் செய்தியாளர்களிடம் தெரிவித்தார்.

இந்த நடவடிக்கை, தங்கமும் வெள்ளியும் இறக்குமதி செய்யப்படும் எல்லா வழித்தடங்களையும் சமமான வரிவிதிப்பு நிலைக்குக் கொண்டுவருகிறது.

இந்தப் புதிய நடவடிக்கை ஏப்ரல் 1 முதல் நடப்புக்குக் கொண்டுவரப்பட்டது என்றும் அவர் கூறினார். மேலும், வியாழக்கிழமை நடைபெற்ற கூட்டத்தில் இது குறித்து ஜிஎஸ்டி அமைப்புக்குத் தெரிவிக்கப்பட்டுவிட்டது என்றும் அவர் குறிப்பிட்டார்.

அதன் பின்னர், வெளிநாட்டு வர்த்தக தலைமை இயக்குநரகம் ஏப்ரல் 17 அன்று அங்கீகரிக்கப்பட்ட இறக்குமதியாளர்களின் புதிய பட்டியலை வெளியிட்டது. ஆனால் வரி விலக்கு அறிவிப்பு புதுப்பிக்கப்படவில்லை என்றார் அவர்.

2017ஆம் ஆண்டு தங்கம் இறக்குமதிக்காக அறிமுகப்படுத்தப்பட்டு, பின்னர் வெள்ளி மற்றும் பிளாட்டினத்திற்கும் நீட்டிக்கப்பட்ட இந்த வரிவிலக்கு, இறக்குமதியாளர்களை ஒருங்கிணைந்த சரக்கு மற்றும் சேவை வரி (ஐஜிஎஸ்டி) செலுத்துவதிலிருந்து விடுவித்தது.

அங்கீகரிக்கப்பட்ட வர்த்தகர்கள் மூலம் தங்கக் கட்டிகளின் இறக்குமதியை எளிதாக்கும் வகையில் இந்தச் சலுகை வடிவமைக்கப்பட்டது.