முதல் தனியார் ராணுவ விமானத் தயாரிப்பு நிறுவனம்

புதுடெல்லி: இந்தியாவின் முதல் தனியார் ராணுவ விமானத் தயாரிப்பு நிறுவனத்தை ஸ்பெயின் பிரதமருடன் சேர்ந்து பிரதமர் மோடி திங்கட்கிழமை அன்று (அக்டோபர் 28) தொடங்கிவைத்தார்.

குஜராத்தில் அமைந்துள்ள இந்த டாடா விமான உற்பத்தி ஆலை இந்தியப் பாதுகாப்புப் படைகளுக்காக சி-295 ரக விமானங்களைத் தயாரிக்கவுள்ளது.

இந்நிகழ்ச்சியில் பேசிய திரு மோடி, “எனது நண்பரும் ஸ்பெயின் பிரதமருமான பெட்ரோ சான்செஸ் முதல்முறையாக இந்தியாவுக்குப் பயணம் மேற்கொண்டுள்ளார். இன்று, இந்தியாவுக்கும் ஸ்பெயினுக்கும் இடையிலான உறவுக்கு புதிய பாதை ஏற்படுத்தப்பட்டுள்ளது. இன்று தொடங்கப்பட்டுள்ள இந்த ஆலை, இந்தியா-ஸ்பெயின் இடையேயான உறவை வலுப்படுத்துவதுடன், ‘இந்தியாவில் தயாரிப்பு’, ‘உலகத்துக்கான தயாரிப்பு’ ஆகிய திட்டங்களை வலுப்படுத்தியுள்ளது,” என்று குறிப்பிட்டார்.

காலஞ்சென்ற ரத்தன் டாடா

அண்மையில் நாட்டின் மிகச்சிறந்த மகனான ரத்தன் டாடாவை நாம் இழந்ததாகக் கூறிய பிரதமர் மோடி, அவர் இருந்திருந்தால் மகிழ்ச்சி அடைந்திருப்பார். ஆனால், அவரது ஆன்மா மகிழ்ச்சி அடைந்திருக்கும் என்றார்.

“நான் குஜராத் முதல்வராக இருந்தபோது தொடங்கப்பட்ட ரயில் பெட்டிகள் தயாரிப்புத் தொழிற்சாலை, இன்று வெளிநாடுகளுக்கு ரயில் பெட்டிகளை ஏற்றுமதி செய்து வருகிறது. இதேபோல, இந்தத் தொழிற்சாலையும் வருங்காலத்தில் வெளிநாடுகளுக்கு விமானங்களை ஏற்றுமதி செய்யும் என்ற நம்பிக்கை உள்ளது.

“நாட்டின் பாதுகாப்புத் துறைக்கான உற்பத்தி அமைப்பில், இந்தியா புதிய உச்சத்தை தொட்டு வருகிறது. பத்து ஆண்டுகளுக்கு முன்பு நாம் உறுதியான முடிவை எடுக்காமல் இருந்திருந்தால் இந்த உச்சத்தை அடைந்திருக்க வாய்ப்பில்லை. நாம் எடுத்த முடிவுகளுக்கான பலன் இப்போது கண்முன் தெரிகிறது.

“பொதுப் பணித்துறையை வலுப்படுத்த, பாதுகாப்புத் துறை உற்பத்தியை தனியார் நிறுவனங்களுக்கு விரிவாக்கம் செய்தோம். உ.பி. மற்றும் தமிழகத்தில் மிகப்பெரிய பாதுகாப்புத் தளவாடங்கள் உற்பத்தி மையம் அமைக்கப்பட்டுள்ளது.

தொடர்புடைய செய்திகள்

உக்ரேன் போரை நிறுத்த மோடியின் செல்வாக்கு பயன்படும்: ஸெலென்ஸ்கி

“கடந்த 10 ஆண்டுகளில் இந்திய விமானப் போக்குவரத்துத் துறையில் வளர்ச்சியையும் மாற்றத்தையும் நீங்கள் கண்டிருக்கிறீர்கள். இந்தியாவை விமானப் போக்குவரத்து மையமாக மாற்ற பணியாற்றி வருகிறோம். வருங்காலத்தில் இந்தியாவிலேயே பயணிகள் விமானங்களும் தயாரிக்கப்படும்.

“தற்போது, இந்திய விமான நிறுவனங்கள் 1,200 விமானங்கள் வாங்குவதற்கு வெளிநாட்டு நிறுவனங்களிடம் ஒப்பந்தம் செய்துள்ளன. விரைவில் இந்த விமான உற்பத்தி தொழிற்சாலை, இந்தியாவுக்கு மட்டுமின்றி உலகத் தேவைகளையும் பூர்த்தி செய்யும் வகையில் முக்கியப் பங்காற்றும்,” என்று பிரதமர் மோடி தெரிவித்தார்.