உள்நாட்டு அதிநவீன ‘குஷா’ ஏவுகணைச் சோதனை வெற்றி

புதுடெல்​லி: ரஷ்யத் தயாரிப்பான எஸ்400 அதிநவீன ஏவுகணைக் கவசத்தைப் போன்ற வலுமிகு ஏவுகணைக் கவசம் ஒன்றை இந்தியா தயாரித்துள்ளது. ‘குஷா’ எனப் பெயரிடப்பட்ட அந்த ஏவுகணைக் கவசத்தில் 150 கி.மீ., 250 கி.மீ., 400 கி.மீ., தொலைவு பாயும் ஏவுகணைகளைப் பயன்படுத்தி நிர்ணயிக்கப்பட்ட இலக்கை மிகத் துல்லியமாகத் தாக்கி அழிக்க முடியும்.

அமெரிக்​கா​வின்​ ​தாட்​, ரஷ்​யா​வின்​ எஸ்​400 ஏவுகணை கவசத்​துக்​கு இணை​யாக இந்​தி​யா​வில்​ குஷா ஏவுகணை கவசம்​ உரு​வாக்​கப்​பட்​டு உள்​ளது. 2028-ம்​ ஆண்​டில்​ இந்​த ஏவுகணை கவசங்​கள்​ இந்​தி​ய ​வி​மானப்​படை​யில்​ சேர்​க்​கப்​படும்.

இந்த ஏவுகணைச் சோதனை வியாழக்கிழமை ஒடிசாவின் அப்துல் கலாம் தீவில் நடத்தப்பட்டது. அப்போது தரையில் இருந்து ஏவப்பட்ட ஏவுகணை நிர்​ண​யிக்​கப்​பட்​ட ​வான்​ இலக்​கை மிகத்​ துல்லியமாகத் தாக்கி அழித்​தது.

இது இந்தியாவின் வான் பாதுகாப்புத் திறன்களில் ஒரு குறிப்பிடத்தக்க மைல்கல்லாக அமைந்துள்ளது.

இந்த ஏவுகணைக் கவசத்தை மத்​தி​ய அரசின்​ ​பாது​காப்​பு ஆ​ராய்​ச்​சி, மேம்​பாட்​டு நிறுவனம்​ (டிஆர்​டிஓ) உரு​வாக்​கியுள்ளது.

போர் விமானங்கள், ஏவுகணைகள், ஆளில்லா வான்வழி வாகனங்கள். எதிரி நாட்டு நவீன விமானங்கள் உள்ளிட்ட பல்வேறு வான்வழி அச்சுறுத்தல்களை, நீண்ட தூரம் மற்றும் உயர வரம்பில் செயலிழக்கச் செய்யும் வகையில் ‘குஷா’ ஏவுகணை அமைப்பு வடிவமைக்கப்பட்டுள்ளது என்று அமைச்சு தெரிவித்துள்ளது.

இந்த ஆயுத அமைப்பின் ஏவுகணை, ரேடார்கள் மற்றும் கட்டளை மற்றும் கட்டுப்பாட்டு அமைப்புகள் உள்ளிட்ட அனைத்து முக்கியக் கூறுகளும், உள்நாட்டுத் தொழில்நுட்பத்தைக் கொண்டு உருவாக்கப்பட்டுள்ளன. இந்தச் சோதனை வெற்றி பெற்றதற்காக ‘டிஆர்டிஓ’ அமைப்பு உள்ளிட்ட அனைத்துத் தரப்பினருக்கும் தற்காப்பு அமைச்சர் ராஜ்நாத் சிங் வாழ்த்து தெரிவித்தார்.

“நீண்ட தூரம் சென்று தாக்கும் தரை, வான் ஏவுகணை அமைப்பின் வெற்றிகரமான உருவாக்கம், இத்தகைய மேம்பட்ட தொழில்நுட்பத்தைக் கொண்ட ஒரு சில நாடுகளின் வரிசையில் இந்தியாவை இடம்பெறச் செய்கிறது. இந்தச் சாதனை இறக்குமதியைச் சார்ந்திருப்பதைக் குறைப்பதோடு, நாட்டின் பாதுகாப்பையும் கணிசமாக வலுப்படுத்தும்,” என்று அமைச்சர் ராஜ்நாத் சிங் தனது எக்ஸ் தளத்தில் பதிவிட்டுள்ளார்.