மாணவர் முரசு
இ-பேப்பர்
அமராவதி: விவசாயிகளுக்கு நியாயமான முறையில் ஆதரவாக இருந்ததற்காகத் தனது குடும்பத்துக்கு மிரட்டல்கள் வந்ததாக உச்ச நீதிமன்ற முன்னாள் தலைமை நீதிபதி என்.வி.ரமணா தெரிவித்துள்ளார்.
தமக்கும் மிரட்டல்கள் வந்ததாகவும் தமது குடும்பத்தார் மீது வழக்குகள் பதிவு செய்யப்பட்டதாகவும் அவர் குறிப்பிட்டார்.
ஆந்திர மாநிலத்துக்கு அமராவதியைப் புதிய தலைநகராக உருவாக்கும் திட்டத்தை முந்தைய ஒய்எஸ்ஆர் காங்கிரஸ் ஆட்சி கைவிட்டது. மாறாக விசாகப்பட்டினம், அமராவதி, கர்னூல் என மூன்று தலைநகரங்களை உருவாக்கும் திட்டத்தை அறிவித்தார் அன்றைய முதல்வர் ஜெகன்மோகன் ரெட்டி.
இதனால், அமராவதிக்காக நிலம் கொடுத்த விவசாயிகள் கடும் அதிர்ச்சி அடைந்தனர். புதிய அறிவிப்புக்கு கடும் எதிர்ப்பு கிளம்பியது. போராட்டமும் வெடித்தது.
இந்த விவகாரம் நீதிமன்றப் படியேறியபோது, விவசாயிகளுக்கு ஆதரவாக உத்தரவு பிறப்பிக்கப்பட்டது. இதனால் ஜெகன் மோகன் ரெட்டி அரசுக்குப் பெரும் பின்னடைவு ஏற்பட்டது.
இந்நிலையில், அமராவதியில் நடைபெற்ற ஒரு நிகழ்ச்சியில் கலந்துகொண்டு பேசிய ஓய்வு பெற்ற நீதிபதி என்.வி.ரமணா, விவசாயிகளுக்கு உறுதுணையாக இருந்தவர்கள் அனைவரும் மிரட்டப்பட்டனர் என்று வெளிப்படையாகத் தெரிவித்தார். எனினும், அப்போது ஆந்திராவில் ஓய்எஸ்ஆர் காங்கிரஸ் கட்சி ஆட்சியில் இருந்ததை அவர் குறிப்பிடவில்லை.
“மிரட்டல்கள் மூலம் என்னைப் பணியவைக்க பார்த்தனர். விவசாயிகளுக்கு ஆதரவாக யாரெல்லாம் செயல்பட்டார்களோ, அவர்கள் அனைவரும் மிரட்டப்பட்டனர்.
“அந்தச் சமயத்தில், அரசியல் தலைவர்களால்கூட அநீதிக்கு எதிராக குரல் எழுப்ப முடியவில்லை. அப்போது நீதிமன்றங்கள், வழக்கறிஞர்கள், நீதிபதிகள்தான் விவசாயிகளுக்கு உறுதுணையாக இருந்தனர்,” என்றார் திரு ரமணா.
தொடர்புடைய செய்திகள்
அரசுகள் மாறிக்கொண்டே இருக்கும் என்று குறிப்பிட்ட அவர், நீதிமன்றங்களும் சட்டத்தின் ஆட்சியும் என்றும் மாறாது என்றார்.
அரசு இயந்திரத்தை எதிர்த்து நின்ற அமராவதி விவசாயிகளின் துணிச்சலைப் பாராட்டுவதாகவும் விவசாயிகள் நடத்திய போராட்டத்தில் இருந்து தாம் நிறைய கற்றுக்கொண்டதாகவும் அவர் தெரிவித்தார்.