மாணவர் முரசு
இ-பேப்பர்
புதுடெல்லி: இந்தியாவில் கடந்த 2023ஆம் ஆண்டு அளவிற்கு அதிகமாக மருந்தை உட்கொண்டதால் சராசரியாக வாரத்திற்குக் குறைந்தது 12 பேர் இறந்துவிட்டதாகத் தேசியக் குற்றப் பதிவகத் தரவுகள் தெரிவிக்கின்றன.
அதாவது, மிகையளவு மருந்தால் கிட்டத்தட்ட நாளுக்கு இருவர் உயிரிழக்க நேரிட்டது.
மொத்தத்தில், கடந்த 2019 முதல் 2023 வரை அளவிற்கதிகமாக மருந்தை உட்கொண்டதால் 3,390 இறப்புகள் பதிவாயின.
இது உறுதிசெய்யப்பட்ட தரவு மட்டுமே என்றும் உண்மையில் மிகையளவு மருந்தால் மாண்டோர் எண்ணிக்கை இன்னும் அதிகமாக இருக்கலாம் என்றும் சொல்லப்படுகிறது.
ஆயினும், மிகையளவு மருந்து என்பது போதைப்பொருளா அல்லது மருத்துவர் பரிந்துரை மருந்துகள் தொடர்புடையதா என்பதைத் தேசியக் குற்றப் பதிவகம் குறிப்பிடவில்லை.
2019 முதல் 2023 வரையிலான ஐந்தாண்டுக் காலகட்டத்தின் தொடக்க ஆண்டுகளில் மிகையளவு மருந்தால் நேரிட்ட மரணங்களைப் பொறுத்தமட்டில், தமிழ்நாடு முதலிடம் பிடித்தது.
அவ்வகையில், கடந்த 2019ல் மட்டும் தமிழகத்தில் 108 பேர் உயிரிழந்தனர். அந்த எண்ணிக்கை 2020ல் 110ஆகவும் 2021ல் 250ஆகவும் பதிவானது.
ஆயினும், அடுத்த ஈராண்டுகளில் மிகையளவு மருந்தால் தமிழகத்தில் மாண்டோர் எண்ணிக்கை வெகுவாகக் குறைந்தது. அவ்வகையில், 2022ல் 50 பேரும் 2023ல் 65 பேரும் உயிரிழந்தனர்.
தொடர்புடைய செய்திகள்
பாகிஸ்தான் எல்லையை ஒட்டி அமைந்துள்ள பஞ்சாப், ராஜஸ்தான் மாநிலங்களில் மிகையளவு மருந்தால் மாண்டோர் எண்ணிக்கை அதிகரித்து வருகிறது.
கடந்த 2019ஆம் ஆண்டில் முதல் ஐந்து இடங்களுக்குள் வராத பஞ்சாப், 2023ஆம் ஆண்டு முதலிடத்தைப் பிடித்தது. மிகையளவு மருந்தால் 2019ஆம் ஆண்டு அங்கு 34 பேர் இறந்துவிட்ட நிலையில், 2022ஆம் ஆண்டு அது 144ஆக உயர்ந்தது. 2023ல் அந்த எண்ணிக்கை 89ஆகச் சரிந்தபோதும் மாநிலங்களைப் பொறுத்தமட்டில் அதுவே ஆக அதிகம்.
2019 முதல் 2023 வரை மிகையளவு மருந்தால் நேர்ந்த மரணங்களைப் பொறுத்தவரை, அந்த ஐந்தாண்டுகளிலும் ராஜஸ்தான் மாநிலமானது இரண்டாம் அல்லது மூன்றாம் நிலையிலேயே வந்தது. மிகையளவு மருந்தால் அங்கு 2019ஆம் ஆண்டு 60 பேர் இறந்துவிட்ட நிலையில், 2023ஆம் ஆண்டு அது 84ஆகப் பதிவானது.
2019, 2020ஆம் ஆண்டுகளில் முதல் ஐந்து இடங்களுக்குள் இடம்பெறாத மத்தியப் பிரதேசம், 2023ல் 85 மரணங்களுடன் இரண்டாம் இடத்தைப் பிடித்தது.
வடகிழக்கு இந்திய மாநிலங்களான மணிப்பூரும் மிசோரமும் விட்டுவிட்டு முதல் ஐந்து இடங்களுக்குள் வந்தன.
கர்நாடக மாநிலம் 2019ஆம் ஆண்டு 67 மரணங்களுடன் முதல் ஐந்து இடங்களுக்குள் ஒன்றாக இடம்பெற்றிருந்தது.