மாணவர் முரசு
இ-பேப்பர்
புதுடெல்லி: ‘ஐசி 814: தி கந்தஹார் ஹைஜாக்’ தொடரில் பயங்கரவாதிகளுக்கு இந்துப் பெயர்களை வைத்திருப்பதாக எழுந்த சர்ச்சையைத் தொடர்ந்து நெட்ஃபிளிக்ஸ் நிறுவனத்துக்கு மத்திய அரசு அழைப்பாணை விடுத்துள்ளது.
அனுபவ் சின்ஹா இயக்கத்தில் நெட்ஃபிளிக்ஸ் தளத்தில் வெளியாகி உள்ளது அந்தத் தொடர். 1999ஆம் ஆண்டு இந்தியன் ஏர்லைன்ஸ் விமானம் பயங்கரவாதிகளால் கடத்தப்பட்ட சம்பவத்தை அடிப்படையாகக் கொண்டு இந்தத் தொடர் தயாரிக்கப்பட்டுள்ளது. அது ஆகஸ்ட் 29ஆம் தேதி வெளியிடப்பட்டது.
இந்தத் தொடரில், விமானத்தைக் கடத்திய பயங்கரவாதிகளுக்கு இந்துப் பெயர்கள் வைக்கப்பட்டிருப்பதாகச் சர்ச்சை எழுந்தது.
இந்தியன் ஏர்லைன்ஸ் விமானத்தை பாகிஸ்தானைச் சேர்ந்த பயங்கரவாத அமைப்பான ஹர்கத் - உல் - முஜாஹிதீனைச் சேர்ந்தவர்கள் கடத்தியதாகக் கூறப்படுகிறது. அப்படி இருக்கும்போது ‘ஐசி 814: தி கந்தஹார் ஹைஜாக்’ தொடரில் பயங்கரவாதிகளுக்கு ‘போலா’ மற்றும் ‘சங்கர்’ என்று பெயர் சூட்டப்பட்டதன் தொடர்பில் சமூக ஊடகங்களில் எதிர்ப்பு தெரிவிக்கப்பட்டது.
இதனிடையே, நெட்ஃபிளிக்ஸ் இந்தியாவின் தலைவர் மோனிகா ஷெர்கில் செப்டம்பர் 3ஆம் தேதி நேரில் சென்று விளக்கம் அளிக்குமாறு மத்திய தகவல், ஒலிபரப்பு அமைச்சு அழைப்பாணை விடுத்தது.
இத்தொடரில் நடிகர்கள் விஜய் வர்மா, நசிருதீன் ஷா, பங்கஜ் கபூர், மனோஜ் பஹ்வா, அரவிந்த் சாமி, அனுபம் திரிபாதி, தியா மிர்சா, பத்ரலேகா, அம்ரிதா புரி, திபியேந்து பட்டாச்சார்யா, குமுத் மிஸ்ரா உள்ளிட்டோர் முக்கிய வேடங்களில் நடித்துள்ளனர்.
இந்நிலையில், திருவாட்டி மோனிகா ஷெர்கில் செப்டம்பர் 3ஆம் தேதி மத்திய தகவல், ஒலிபரப்பு அமைச்சுக்கு நேரில் சென்று விளக்கம் அளித்துள்ளார். நெட்பிளிக்ஸ் தரப்பில் வெளியான அறிக்கையில், “இனி கதையின் கரு முழுமையாக ஆய்வு செய்யப்படும். இந்திய மக்களின் உணர்வுகளுக்கு மதிப்பளிப்போம்,” என்று குறிப்பிடப்பட்டது.
