மெசரட்டி மீது ஹோண்டா காரை மோதிய 97 வயது பெண் ஓட்டுநர்

ஹாங்காங்: ஹாங்காங்கில் 97 வயது மூதாட்டி தாம் ஓட்டி வந்த காரை மெசரட்டி காரின் மீதும், மேரியட் ஹோட்டல் சுவரின் மீதும் மோதி, கடுமையான காயங்கள் ஏதுமின்றி நூலிழையில் தப்பி இருக்கிறார். ஃபிரான்பீஸ் ஜோவன் லியோங் (படத்தில் வலது: தி ஸ்டார்) எனும் அந்த மூதாட்டி தமது ஹோண்டா காரை ஹோட்டலுக்கு வெளியே நிறுத்த முயன்றபோது அவர் மெசரட்டி காரின் மீது மோதியதாக தி சவுத் சைனா மார்னிங் போஸ்ட் குறிப்பிட்டது. சுமார் $314,125 மதிப்பிலான மெசரட்டி காரின் மீது அவர் மோதியபோது அதிர்ஷ்டவசமாக காருக்குள் யாரும் இல்லை என்று கூறப்பட்டது. ஹோண்டா காரின் முன்புறமும் சுமார் ஈராண்டுகளுக்கு முன்பு வாங்கப் பட்ட மெசரட்டி காரின் பின்புறமும் சேதம் அடைந்தன.