சபாநாயகருக்கே முழு அதிகாரம்; இந்திய உச்ச நீதிமன்றம்

கர்நாடகாவின் ஆளுங்கூட்டணிக்கு எதிராகத் திரும்பிய கர்நாடக சட்டமன்ற உறுப்பினர்களின் பதவி விலகலை ஏற்பதா இல்லையா என்பது குறித்து முடிவு செய்யும் அதிகாரம் மாநில சபாநாயகருக்கு மட்டும் இருப்பதாக உச்ச நீதிமன்றம் தெரிவித்திருக்கிறது. பதவி விலகலை ஏற்க சபாநாயகருக்கு உத்தரவிடும் உரிமை நீதிமன்றங்களுக்கு இல்லை என்றும் உச்ச நீதிமன்றம் கூறியது.

“சபாநாயகரின் முடிவை எந்த நீதிமன்ற உத்தரவும் பாதிக்கக்கூடாது.  அந்தப் பதவி விலகல்களை ஏற்பது குறித்த முடிவை சபாநாயகர் எப்போது வேண்டுமானாலும் செய்துகொள்ளலாம்,” என்று உச்ச நீதிமன்றம் தெரிவித்துள்ளது.

இருந்தபோதும் சட்டமன்ற நடப்புகளில் பங்கேற்க இந்த அதிருப்தி எம்எல்ஏக்கள் வற்புறுத்தப்படக்கூடாது என்றும் நீதிமன்றம் தெரிவித்தது. இதனால் மாநில அரசாங்கம், இன்றைய நம்பிக்கை வாக்கெடுப்பில் அவர்களைப் பங்கேற்குமாறு கட்டாயப்படுத்த முடியாது. கடந்த இரண்டு வாரங்களில் காங்கிரஸ்-மதச்சார்பற்ற ஜனதா தள கூட்டணியைச் சேர்ந்த 16 சட்டமன்ற உறுப்பினர்களும் இரண்டு சுயேச்சை உறுப்பினர்களும் பதவி விலகியுள்ளனர். இந்தப் பதவி விலகல்கள் ஏற்கப்பட்டால் ஆளுங்கூட்டணி தனது பெரும்பான்மையை இழந்துவிடும். கூட்டணியின் 118 உறுப்பினர்கள் என்ற எண்ணிக்கை 100ஆகக் குறையும்.  மாநில சட்டமன்றத்தில் பாஜகவுக்கு 105 உறுப்பினர்களும் இரண்டு சுயேச்சை உறுப்பினர்களின் ஆதரவும் உள்ளது.

அதிருப்தி எம்எல்ஏக்கள் பலர் தகுதிநீக்கத்தை எதிர்நோக்குவதாகக் கூறிய சபாநாயகர் கே. ஆர். ரமேஷ்,  அவர்களது பதவி விலகல் கடிதத்தை முழுமையாக ஆராய்வதற்கு நேரம் தேவைப்படுவதாகக் கூறினார். மேலும் , பதவி விலகல்கள் வற்புறுத்தலின் பேரில் நிகழ்ந்ததா என்பதை உறுதி செய்வதற்கும் நேரம் தேவைப்படுவதாக அவர் கூறினார்.

சம்பந்தப்பட்ட சட்டமன்ற உறுப்பினர்கள் தகுதிநீக்கம் செய்யப்பட்டால் அவர்கள் மீண்டும் தேர்தலில் வெல்ல வேண்டிய கட்டாயத்திற்கு உள்ளாவர். அத்துடன் அவர்கள் அமைச்சர்களாகப் பதவியேற்க முடியாது. ஆனால் அந்தச் சட்டமன்ற உறுப்பினர்களின் பதவி விலகல் ஏற்கப்பட்டால் பாஜக ஆட்சியைக் கைப்பற்றிய பின்னர் அவர்கள் வெகு சுலபத்தில் அமைச்சர்களாக நியமிக்கப்பட முடியும்.  தேர்தலில் மீண்டும் பங்கேற்க அவர்களுக்கு ஆறு மாதங்கள் இருக்கும்.

ஜூலை 6ஆம் தேதியன்று பதவி விலகிய அதிருப்தி எம்எல்ஏக்கள் மும்பையில் தங்கியுள்ளனர்.  சபாநாயகர் ஆளுங்கூட்டணிக்குச் சாதகமாக நடந்துகொண்டு தங்களது பதவி விலகலில் இழுபறியை ஏற்படுத்த  முயல்வதாக அவர்கள் குற்றம் சாட்டுகின்றனர்.

கர்நாடகாவின் முதலமைச்சர் குமாரசாமி சபாநாயகரை ஆதரித்துப் பேசியுள்ளார்.  தமது ஆட்சிக்குப் பதற்றத்தை ஏற்படுத்துவதே அந்தச் சட்டமன்ற உறுப்பினர்களின் நோக்கம் என்றும் அவர்களது பதவி விலகல் கவனமாக மறுபரிசீலனை செய்யப்படவேண்டும் என்றும் அவர் தெரிவித்தார்.

“மும்பைக்குச் சென்றிருந்த ஒவ்வொரு சட்டமன்ற உறுப்பினரும் தான் அமைச்சர் ஆகவேண்டும் என்றே எண்ணுகின்றனர்,” என்றார் திரு குமாரசாமி

ஆளுங்கூட்டணி மக்களின் நம்பிக்கையை இழந்திருப்பதால் அது ஆட்சியிலிருந்து விலக வேண்டும் என்று பாரதிய ஜனதா தெரிவித்துள்ளது.

 

இப்பகுதியில் மேலும் செய்திகள்

இரு தலை உடைய நாகம் புராண நம்பிக்கையுடன் தொடர்புடையது என கூறிய பொதுமக்கள் பாம்பை அதிகாரிகளிடம் ஒப்படைக்க மறுத்துவிட்டனர். படம்: இந்திய ஊடகம்

13 Dec 2019

புராண நம்பிக்கை: இருதலை பாம்பை தர மறுத்த கிராம மக்கள்

சீராய்வு மனு தள்ளுபடி செய்யப்பட்டால் அடுத்த ஒருசில நாட்களில் நான்கு குற்றவாளிகளுக்கும் தூக்குத் தண்டனை நிறைவேற்றப்படும் என்று தகவல்கள் தெரிவிக்கின்றன. படம்: இந்திய ஊடகம்

13 Dec 2019

‘ஹேங்மேன்’, கயிறு தயார்; நால்வரையும் ஒரே நேரத்தில் தூக்கிலிட ஏற்பாடுகள் தீவிரம்

நாடாளுமன்றத்தில் சமஸ்கிருத பல்கலைக்கழக மசோதா மீதான விவாதம் நேற்று நடைபெற்றது. படம்: இந்திய ஊடகம்

13 Dec 2019

சமஸ்கிருதம் பேசினால் சர்க்கரை நோய் வராது: பாஜக எம்.பி. நாடாளுமன்றத்தில் பேச்சு