புதுச்சேரி: புதுச்சேரி கடற்கரை சாலையில் பாரம்பரிய கார் கண்காட்சி நடந்தது. இதை பொதுமக்கள் ஆர்வத்துடன் பார்வையிட்டனர்.
புதுச்சேரி அரசு சுற்றுலாத் துறை, சென்னை ஹெரிட்டேஜ் மோட்டார்ஸ் கிளப் ஆகியவை இணைந்து கடந்த 2010 ஆம் ஆண்டு முதல் பாரம்பரிய கார்களின் அணிவகுப்பு கண்காட்சி நடத்துகின்றன. அதன்படி இந்த ஆண்டும் கார் கண்காட்சி கடற்கரை சாலையில் (படம்) நேற்றுமுன்தினம் நடந்தது. இதில் சென்னை, புதுச்சேரியில் இருந்து 72 பாரம்பரிய வாகனங்கள், 25 மோட்டார் சைக்கிள்கள் பொதுமக்களின் பார்வைக்காக நிறுத்தி வைக்கப்பட்டிருந்தன. கண்காட்சியில் ‘ஆஸ்டின்’ (1927 ஆம் ஆண்டு), ‘டாட்ஜ்’ (1933), ‘மோரிஸ்’ (1935), ‘ஜாகுவார்’ (1936) ‘சிட்ரன்’ (1946), ‘சிங்கர்’ (1947), ‘பேர்ட் முஸ்டாங்’ (1967), ‘வி டபிள்யூ பீட்டில்’ (1966), ‘மோரிஸ் மைனர் 1000’ உள்ளிட்ட வாகனங்கள் காட்சிக்கு நிறுத்தி வைக்கப்பட்டிருந்தன.
இந்தக் கார்களின் அருகே அதன் உரிமையாளர் பெயர், கார் தயாரிக்கப்பட்ட ஆண்டு உள்ளிட்ட பல்வேறு விவரங்கள் வைக்கப்பட்டிருந்தன. அதேபோல் பழங்கால மோட்டார் சைக்கிள்களும் விதவிதமான மாடல்களில் பொதுமக்களின் பார்வைக்கு நிறுத்தி வைக்கப்பட்டிருந்தன.