மாணவர் முரசு
இ-பேப்பர்
செலவுகளையும் குழப்பங்களையும் தவிர்க்க மத்திய அரசு தீவிர ஆலோசனை
புதுடெல்லி: மக்களவை, சட்டசபை, உள்ளாட்சி உள்ளிட்ட அனைத்து தேர்தல்களுக்கும் பொது வாக்காளர் பட்டியலை உருவாக்குவது குறித்து மத்திய அரசு தீவிரமாக ஆலோசனை நடத்தி வருகிறது.
தற்போதுள்ள நிலையில் மக்களவைத் தேர்தல், சட்டப்பேரவைத் தேர்தல் என தனித்தனியாக தேர்தல் நேரத்தில் வாக்காளர் பட்டியலை தேர்தல் ஆணையம் தயாரிக்கிறது.
அதேபோல உள்ளாட்சித் தேர்தல் நேரத்தில் மாநிலத் தேர்தல் ஆணையம், நகராட்சிகள், ஊராட்சிகள் ஆகியவற்றுடன் இணைந்து வாக்காளர் பட்டியலை தயாரிக்கிறது. இப்படி பலவிதமாக வாக்காளர் பட்டியல்கள் தயாரிப்பதால் கூடுதல் செலவு ஏற்படுகிறது. அத்துடன் ஏதாவது ஒரு வாக்காளர் பட்டியலில் பல வாக்காளர்களின் பெயர்கள் விடுபட்டுப்போகின்றன. இதனால் பிரச்சினையும் குழப்பமும் ஏற்படுகின்றன.
இந்த நிலையைத் தவிர்க்க, எதிர்காலத்தில் நாடாளுமன்றம், மாநில சட்டசபை, உள்ளாட்சித் தேர்தல் ஆகிய மூன்றுக்கும் ஒரே வாக்காளர் பட்டியலை பயன்படுத்துவதற்கான வாய்ப்பு குறித்து மத்திய அரசு தீவிரமாக ஆலோசித்து வருவதாக டெல்லியில் மத்திய அரசு அதிகாரிகள் தெரிவித்துள்ளனர்.
இது தவிர பல்வேறு மாநிலங்களில் உள்ள தேர்தல் ஆணையங்கள் வரைவு வாக்காளர் பட்டியலையும் வெளியிட்டு சொந்தமாக வாக்காளர் பட்டியலையும் தயாரிக்கின்றன.
இந்நிலையில் வாக்காளர் பட்டியல் தயாரிப்பில் இருக்கும் முரண்பாடுகளை களையும் விதத்தில், மக்களவை, சட்டசபை, உள்ளாட்சித் தேர்தல் என அனைத்துக்கும் பொதுவான ஒரே வாக்காளர் பட்டியலை தயாரிக்க மத்திய அரசு திட்டமிட்டு ஆலோசித்து வருகிறது. மாநிலங்கள் சட்டம்இயற்றி, சுயமாக உள்ளாட்சித் தேர்தல்களை நடத்திக்கொள்ள அரசியலமைப்புச் சட்டப்படி அதிகாரம் இருக்கிறது.
இதன்படி மாநிலங்களே சொந்தமாக வாக்காளர் பட்டியலைத் தயாரிக்கலாம் அல்லது சட்டப்பேரவை தேர்தல் நேரத்தில் தேர்தல் ஆணையம் தயாரித்த வாக்காளர் பட்டியலைப் பயன்படுத்திக்கொள்ளலாம். தற்போது மாநிலங்களை மத்திய தேர்தல் ஆணையம் தயாரித்த வாக்காளர் பட்டியலை பயன்படுத்துமாறு கேட்டுக்கொள்ளப்படு கிறது. ஆனால், பொதுவான வாக்காளர் பட்டியல் முறை வந்தால் ஒரே பணியை தேர்தல் நேரத்தில் திரும்ப செய்யும் பணி தவிர்க்கப்படும். ஒரே பணிக்கு இரு முறை செலவிடுவது தவிர்க்கப்படும்.
ஒரே வாக்காளர் பட்டியல் முறைக்கு ஏற்கெனவே தேர்தல் ஆணையம், சட்ட ஆணையம், பணியாளர் மற்றும் சட்டத்துக்கான நாடாளுமன்ற நிலைக்குழு ஆகியவை ஆதரவு தெரிவித்துள்ளன.