மாணவர் முரசு
இ-பேப்பர்
இந்திய திரைப்பட நடிகர்கள் மீது ஆஸ்திரேலிய கிரிக்கெட் வீரர் டேவிட் வார்னருக்கு மிகுந்த ஆர்வம். ஐபிஎல் போட்டிகளில் ஆடுவதற்காக இந்தியாவில் இருந்த காலத்தில் நடிகர்களை மிகவும் ரசித்தார்.
குறிப்பாக, ரஜினிகாந்தை அவருக்கு மிகவும் பிடிக்கும். ஏற்கெனவே எந்திரன் படத்தில் ரஜினி நடித்த 'சிட்டி ரோபோ' போல நடித்துக் காட்டி சமூக ஊடகங்களில் பதிவேற்றிய காணொளி மிகவும் பிரபலமானது.
பாகுபலியாகவும் அமீர்கானாகவும் பல வேடங்களில் தம்மைப் பொருத்தி படங்களை வெளியிட்டு வந்த வார்னர், நேற்று முன்தினம் புத்தாண்டு தினத்தில் மீண்டும் ரஜினியாக மாறினார்.
'ரீஃபேஸ்' செயலி மூலம் தம்மை ரஜினியாக மாற்றி, 'தர்பார்' படத்தில் ரஜினி ஆடிக்கொண்டு 'சும்மா கிழி' என்று பாடுவதை காணொளியாகப் பதிவு செய்து இன்ஸ்டகிராமில் பதிவேற்றம் செய்தார்.
ஏராளமான ரசிகர்கள் கேட்டுக்கொண்டதால் ரஜினியின் பாடலை இணைத்து புத்தாண்டு வாழ்த்துத் தெரிவிப்பதாக அந்தப் பதிவில் வார்னர் குறிப்பிட்டிருந்தார்.
இதனை ஏராளமான ரஜினி ரசிகர்கள் வரவேற்று வார்னரை வானளாவப் புகழ்ந்து வருகின்றனர்.