மாணவர் முரசு
இ-பேப்பர்
புதுடெல்லி: முன்னாள் பிரதமர் மன்மோகன் சிங், காங்கிரஸ் முன்னாள் தலைவர் ராகுல் காந்தி, தெலுங்கானா முதல்வர் சந்திரசேகர ராவ் உள்ளிட்ட பல தலைவர்களும் முக்கிய பிரமுகர்களும் கொரோனா கிருமித்தொற்றால் பாதிக்கப்பட்டுள்ளனர்.
டெல்லி முதல்வர் அரவிந்த் கெஜ்ரிவால் மனைவிக்கும் கொரோனா கிருமித்தொற்றுப் பாதிப்பு இருப்பது உறுதியானது. இதையடுத்து முதல்வர் கெஜ்ரிவால் தம்மை தனிமைப்படுத்திக் கொண்டுள்ளார்.
முன்னாள் பிரதமர் மன்மோகன் சிங் சிகிச்சைக்காக டெல்லி எய்ம்ஸ் மருத்துவமனையில் அனுமதிக்கப்பட்டுள்ளதாகவும் அவருக்கு உரிய சிகிச்சை அளிக்கப்பட்டு வருவதாகவும் மத்திய சுகாதார அமைச்சர் ஹர்ஷ் வர்தன் தெரிவித்துள்ளார்.
தெலுங்கானா முதல்வர் சந்திரசேகர ராவுக்கும் சிகிச்சை அளிக்கப்பட்டு வருகிறது.
தமக்கு கிருமி தொற்றியது உறுதியாகி இருப்பதாகவும் தொற்றுக்கான சில லேசான அறிகுறிகள் மட்டுமே தமக்கு இருந்ததாகவும் ராகுல் டுவிட்டரில் பதிவிட்டுள்ளார். எனவே அனைவரும் பாதுகாப்பாக இருக்க வேண்டும் என அவர் கேட்டுக் கொண்டுள்ளார்.
கொரோனா பரவல் அதிகரித்ததை அடுத்து மேற்கு வங்க மாநிலத் தேர்தல் பிரசாரத்தில் தாம் பங்கேற்கப் போவதில்லை என்று அண்மையில் ராகுல் அறிவித்திருந்தார்.
இதற்கிடையே உத்தரப் பிரதேசத்தில் வார இறுதி நாள்களில் ஊரடங்கு அமல்படுத்தப்படும் என மாநில அரசு அறிவித்துள்ளது. வெள்ளிக்கிழமை இரவு எட்டு மணி முதல் திங்கள்கிழமை காலை ஏழு மணி வரை இந்த ஊரடங்கு அமலில் இருக்கும்.
முன்னதாக அம்மாநிலத்தின் ஐந்து மாவட்டங்களில் ஊரடங்கை அமல்படுத்த வேண்டும் என அலகாபாத் உயர் நீதிமன்றம் பிறப்பித்த உத்தரவுக்கு உச்ச நீதிமன்றம் நேற்று இடைக்காலத் தடை விதித்தது. அம்மாநில அமைச்சர் ஹனுமன் மிஷ்ரா கொவிட்-19 பாதிப்பால் நேற்று உயிரிழந்தார்.
ஒடிசாவில் தொற்றுப்பரவலைத் தடுக்க ஏதுவாக நகர்ப்புறங்களில் வார இறுதி நாள்களில் ஊரடங்கு அமலுக்கு வருகிறது. இதுவரை இல்லாத அளவுக்கு தொற்றுப்பாதிப்பு உச்சத்தில் உள்ளது.
மேகாலயாவில் கொரோனா இரண்டாவது அலையின் தாக்கத்தால் கொவிட்-19 நோயாளிகளின் எண்ணிக்கை ஆறு மடங்காக அதிகரித்துள்ளது. இதையடுத்து அங்கு கொரோனா கட்டுப்பாடுகள் தீவிரமடைந்துள்ளன.
இதற்கிடையே மத்திய இணை அமைச்சர் ஜிதேந்திர சிங், தேர்தல் ஆணையர் சுஷில் சந்திரா ஆகியோரும் கிருமித்தொற்றால் பாதிக்கப்பட்டுள்ளனர். மத்திய அமைச்சர் கிரண் ரெஜ்ஜு, உத்தரப் பிரதேச முதல்வர் யோகி ஆதித்யநாத் ஆகியோரும் ஏற்கெனவே பாதிப்புக்கு ஆளாகியுள்ளனர்.