மாணவர் முரசு
இ-பேப்பர்
புதுடெல்லி: சில வாரங்களுக்கு முன்பு தொற்றுக்குப் பலியானவர்களை 24 மணி நேரமும் அடக்கம் செய்துக் கொண்டிருந்த தலைநகர் புதுடெல்லியில் நிலைமை தற்போது மாறியுள்ளது.
இவ்வார இறுதியில் ஏராளமான மக்கள் கடைத் தொகுதிகளிலும் சந்தைகளிலும் குவிந்து தங்களுடைய ஆதங்கத்தைத் தீர்த்துக் கொண்டனர்.
ஒரு கையில் ஆடைகள் நிரம்பிய பையை மாட்டிக்கொண்டு மிகவும் பரபரப்பான 'செலக்ட் சிட்டி வாக்' கடைத்தொகுதியில் கணவருடன் மேலும் பொருட்களை வாங்கிக் கொண்டிருந்த திருமதி சுருளி குப்தா, வீட்டிலேயே அடைந்து கிடந்து நொந்துபோய்விட்டேன்," என்றார்.
"எனக்கு இந்த மாற்றம் தேவைப்படுகிறது. எவ்வளவு காலம்தான் அடைந்துகிடப்பது," என்று 26 வயது விற்பனை அதிகாரியான கூறினார்.
அந்த கடைத்தொகுதியில் இருந்த உணவு நிலையத்திலும் கூட்டம் நிரம்பி வழிந்ததால் அதையும் பொருட்படுத்தாமல் சுருளி குப்தா பொறுமையுடன் வரிசையில் காத்திருந்தார்.
"கொரோனா கிருமித்தொற்று இப்போது போகாது. அதனுடன் வாழப்பழகிக் கொள்வதைத் தவிர வேறு வழியில்லை," என்றார் அவர்.
அவருக்குப் பின்னால் பலர் கூட்டமாக பேசிக்கொண்டு அளவளாவினர். சமூக இடைவெளி, முகக் கவசம் பற்றி அறிவிப்புகள் வந்துகொண்டேயிருந்தாலும் அவர்கள் தோசையையும் நூடல்சையும் ருசிப்பதில் மும்முரமாக இருந்தனர்.
பிரபல பர்கர் கடை வாசலில் வரிசையில் இருந்த ஒரு தம்பதியரின் முகத்தில் முகக்கவசம் தொங்கிக் கொண்டிருந்தது. உடல் வெப்பநிலை பரிசோதிப்பதையும் கையைக் கிருமி நாசினியைக் கொண்டு கைகளை சுத்தப்படுத்துவதையும் ஊழியர்கள் அடிக்கடி நினைவுப்படுத்தினர்.
இந்தக் கடைத்தொகுதிக்கு சற்றுத் தொலைவில் உள்ள லஜ்பட் நகர் சந்தையிலும் திறந்தவெளி சாைலயோரக் கடைகளிலும் கூட்டம் அலைமோதியது. தலையங்கி, வளையல்கள், மலிவான முக அழகு சாதனங்களை பலர் பேரம் பேசி வாங்கி பெருமையுடன் நடந்தனர்.
தள்ளுவண்டியில் விற்கப்பட்ட 'கூல்சே-சோலே' உணவையும் (ரொட்டி-மசாலா சுண்டல்) வாங்கி வாயில் லாவகமாகத் தள்ளி ருசித்தனர்.
ஆனால் இன்று கடைக்கு வந்திருக்கக் கூடாது என்று கல்லூரி மாணவியான 21 வயது பிரெர்னா ஜெயின் தெரிவித்தார்.
"ஒரே கூட்டம், ஒன்றுவிட்ட சகோதரரின் திருமணத்துக்காக சில பொருட்களை அவசரமாக வாங்க வேண்டியிருந்தது. அதனால்தான் வந்தேன். இப்படி வருவது பாதுகாப்பானது அல்ல. ஆனால் எல்லாமே முக்கியமாக இருக்கிறது," என்று அவர் கூறினார்.
இருபது மில்லியன் மக்கள் வசிக்கும் தலைநகரில் கடந்த மாதம் பயங்கரமான காட்சிகள் அரங்கேறின. கடந்த மாதம் கிருமித்தொற்று இதுவரை இல்லாத உச்சத்தைத் தொட்டது. கொரோனாவுக்குப் பலியானவர்களை இறுதி அடக்கம் செய்யக்கூட இடமில்லாமல் போனது. இரவு பகலாக சடலங்கள் எரிக்கப்பட்டன. படுக்கைகள், உயிர்வாயு பற்றாக்குறையால் மூச்சுத் திணறிய நோயாளிகளில் பலர் மருத்துவமனை வாசலிலே உயிரைவிட்டனர்.
இந்தியாவில் தொற்றுக்கு 330,000 பேருக்கு மேல் பலியாகிவிட்டனர்.
ஆனால் மரணமுற்றோர்களின் எண்ணிக்கை இதைவிட அதிகமாக இருக்கும் என்று மருத்துவ நிபுணர்கள் கூறியுள்ளனர்.