மாணவர் முரசு
இ-பேப்பர்
புதுடெல்லி: நாடாளுமன்ற குளிர்காலக் கூட்டத்தொடர் வரும் 29ஆம் தேதி தொடங்கி டிசம்பர் மாதம் 23 ஆம் தேதி வரை நடைபெறவுள்ளது.
திரும்பப் பெறப்படுவதாக பிரதமர் மோடி நேற்று அறிவித்த மூன்று வேளாண் சட்டங்களை ரத்து செய்வது தொடர்பாக இந்தக் கூட்டத்தொடரில் தீர்மானம் நிறைவேற்றப்படலாம் என்று நம்பப்படுகிறது.
கொரோனா விதிமுறைகளைப் பின்பற்றி கடந்த ஒன்றரை ஆண்டுகளாக நடைபெற்று வரும் கூட்டத் தொடரைப் போலவே, குளிர்காலக் கூட்டத்தொடரும் நடைபெறவுள்ளது. நோய்ப் பரவல் காரணமாக கடந்த ஆண்டு குளிர்கால கூட்டத்தொடர் நடத்தப்படாத நிலையில், தற்போது 20 நாட்கள் நடத்த திட்டமிடப்பட்டுள்ளது.
உத்தரப் பிரதேசம் உள்ளிட்ட ஐந்து மாநில சட்டப்பேரவைத் தேர்தல் நெருங்கும் நிலையில், இந்த கூட்டத்தொடர் கூடவுள்ளதால், மிகுந்த முக்கியத்துவம் வாய்ந்த முடிவுகள் எடுக்கப்படலாம் என எதிர்பார்க்கப்படுகிறது.
அதே நேரம் பெட்ரோல், டீசல் விலை உயர்வு, சமையல் எண்ணெய் விலை அதிகரிப்பு, காஷ்மீரில் பொதுமக்களை குறிவைத்து பயங்கரவாதிகள் நடத்திய தாக்குதல், உத்தரப் பிரதேசத்தில் விவசாயிகள் மீது கார் ஏற்றி கொலை செய்ததில் வெடித்த வன்முறை போன்ற பிரச்சினைகள் இந்தக் கூட்டத்தொடரில் வலுவாக எதிரொலிக்கும் என கூறப்படுகிறது.