மாணவர் முரசு
இ-பேப்பர்
புதுடெல்லி: இந்தியாவில் நேற்றுக் காலை வரையிலான கடந்த 24 மணி நேரத்தில் புதிதாக 7,579 பேர்க்கு கொவிட்-19 தொற்று உறுதிப்படுத்தப்பட்டதாக அந்நாட்டின் சுகாதார அமைச்சு அறிவித்தது.
கடந்த 543 நாள்களில், அதாவது கிட்டத்தட்ட ஒன்றரை ஆண்டுகளில் ஒரேநாளில் பதிவான ஆகக் குறைவான கொரோனா பாதிப்பு இது என்று கணக்கிடப்பட்டுள்ளது.
பண்டிகைக் காலம் என்ற
போதும் கொரோனா பாதிப்பு உயராததற்கு அதிகமானோர் தடுப்பூசி போட்டுக்கொண்டதும் உடலில் 'ஆன்டிபாடி' எனப்படும் நோயெதிர்ப்பான்கள் உருவானதுமே காரணம் எனக் கூறப்படுகிறது.
கடந்த அக்டோபர் மாதத்தில் துர்க்கா பூஜை, இம்மாதத்தில் தீபாவளி என முக்கிய பண்டிகை
களைக் கொண்டாடுவதற்காக, பொருள்கள் வாங்கவும் குடும்பத்தினரைச் சந்திக்கவும் பல கோடி மக்கள் பெரும்பாலும் முகக் கவசம் அணியாமலேயே வெளியில் நடமாடினர்; பயணம் செய்தனர்.
பெருநகரங்களைத் தவிர மற்ற ஊர்களில் முகக்கவசம் அணியும் பழக்கம் கிட்டத்தட்ட அறவே இல்லாமல் போய்விட்டதாகச் சொல்லப்படுகிறது.
"தீபாவளிக்குப் பிறகும்கூட கிருமித்தொற்று உயரவில்லை," என்றார் தேசிய தொற்றுநோயியல் நிலையத்தின் முன்னாள் இயக்குநர் டாக்டர் எம்.டி.குப்தே.
இயற்கையாகவே நோய் தொற்றியதன்மூலம் பெரும்பாலான இந்தியர்களின் உடலில் நோயெதிர்ப்பான்கள் உருவானதே இதற்கு முக்கியக் காரணம் என்று டாக்டர் குப்தே குறிப்பிட்டார்.
இவ்வாண்டு ஜூலை மாதம்வரை, கிட்டத்தட்ட 70% இந்தியர்களை இயல்பாகவே கிருமி தொற்றி விட்டதாக அரசாங்கக் கருத்தாய்வுகள் மதிப்பிட்டுள்ளன.
இதுவரை, இந்தியாவில் 18 வயதிற்கு மேற்பட்ட 944 மில்லியன் பேரில் 81 விழுக்காட்டினர் குறைந்தது முதல் தவணை தடுப்பூசியும் 43 விழுக்காட்டினர் முழுமையாகவும் தடுப்பூசி போட்டுக்கொண்டுள்ளனர்.18 வயதிற்குட்பட்டவர்களுக்குத் தடுப்பூசி போடுவது இன்னும் தொடங்கப்படவில்லை.
இந்தியாவில் கொரோனா பரி சோதனை செய்வதும் குறைந்து வருகிறது.
தடுப்பூசியும் நோயெதிர்ப்பு ஆற்றலும் தொற்றுப் பரவல் அபாயத்தைக் குறைப்பதாகத் தகவல்