மாணவர் முரசு
இ-பேப்பர்
புதுடெல்லி: குஜராத் மாநிலத்தில் கடந்த 2002ஆம் ஆண்டு ஏற்பட்ட கலவரத்தில் வன்முறை வெடித்தது. இதில் பலர் உயிரிழந்தனர். அப்போது பில்கிஸ் பானோ எனும் 19 வயது இளம் பெண் கூட்டுப் பாலியல் வன்கொடுமைக்கு ஆளாக்கப்பட்டார். அத்துடன் பானோவின் மூன்று வயதுக் குழந்தை சலேஹா உட்பட மொத்தம் 14 பேர் கொல்லப்பட்டனர்.
இது தொடர்பான வழக்கில் 11 பேர் குற்றவாளிகளாக அடையாளம் காணப்பட்டு நீதிமன்றம் அவர்களுக்கு ஆயுள் தண்டனையளித்து தீர்ப்பளித்தது.
கடந்த 14 ஆண்டுகள் சிறையில் இருந்த அவர்களை கருணை அடிப்படையில் சுதந்திர தினத்தன்று குஜராத் மாநில அரசு விடுதலை செய்தது. இதைக் கண்டித்து பல்வேறு அரசியல் தலைவர்கள் அறிக்கை வெளியிட்டனர்.
ஆகஸ்ட் 17 அன்று, தனது மௌனத்தை உடைத்து, பில்கிஸ் பானோ, தான் அச்சமின்றி வாழ்வதற்கான உரிமையைக் கேட்டு ஒரு அறிக்கையை வெளியிட்டார்.
அதில், "நம் நாட்டில் உள்ள உயர் நீதிமன்றங்களை நான் நம்பினேன். நான் அமைப்பை நம்பினேன், நான் மெதுவாக எனக்கு ஏற்பட்ட துயரத்துடன் வாழக் கற்றுக்கொண்டேன். தற்போது அந்த குற்றவாளிகளின் விடுதலை என்னிடமிருந்து என் அமைதியைப் பறித்துள்ளது மற்றும் நீதியின் மீதான எனது நம்பிக்கையை அசைத்துவிட்டது," என்று பில்கிஸ் பானோ வருத்தம் தெரிவித்துள்ளார்.
இந்நிலையில் பில்கிஸ் பானோ வழக்கில் குற்றவாளிகளை விடுவித்த குஜராத் அரசின் உத்தரவுக்கு எதிராக உச்ச நீதிமன்றத்தில் வழக்கு தொடரப்பட்டுள்ளது.
இதனைத்தொடர்ந்து பில்கிஸ் பானோ வழக்கில் தண்டனை பெற்ற 11 பேரும் விடுதலை செய்யப்பட்டது குறித்து பரிசீலிப்பதாக இந்திய தலைமை நீதிபதி சி ஜே ரமணா உறுதியளித்துள்ளார்.
இந்நிலையில், தேசிய மனித உரிமை ஆணையம், இந்தப் பிரச்சினையை விவாதத்திற்கு எடுத்துக்கொள்ள உள்ளதாக இந்திய ஊடகங்கள் தெரிவித்துள்ளன.
2017 முதல் 2022 வரை தேசிய மனித உரிமை ஆணையத்தின் முன்னாள் உறுப்பினராக இருந்த வழக்கறிஞர் ஜோதிகா கல்ரா, குஜராத் அரசின் நடவடிக்கையை விமர்சித்தார். மேலும், "பில்கிஸ் பானோ வழக்கில் தண்டனை பெற்ற 11 பேரும் விடுதலை செய்யப்பட்டிருப்பது மிகவும் துரதிர்ஷ்டவசமானது. இது சாதாரண பாலியல் குற்ற வழக்கு மட்டுமல்ல, கலவரத்தின் போது கும்பல் பாலியல் வன்கொடுமை மற்றும் ஒரு குழந்தையைக் கொலை செய்ததற்கான தண்டனையாகும். பாதிக்கப்பட்டவர் சிறுபான்மை சமூகத்தைச் சேர்ந்தவர் என்பதால் குற்றம் சாதாரணமாக பார்க்கப்படுகிறது," என்றும் ஜோதிகா கல்ரா கூறினார்.