மாணவர் முரசு
இ-பேப்பர்
விசாகப்பட்டினம்: ஆந்திராவில் உள்ள பார்மா நிறுவன ஆய்வகத்தில் திடீரென ஏற்பட்ட தீ விபத்தில் நால்வர் பலியாகினர். காயமடைந்த வர்கள் மருத்துவமனையில் அனுமதிக்கப்பட்டுள்ளனர்.
உயிரிழந்த ஊழியர்களின் குடும்பங்களுக்கு ரூ. 25 லட்சம் ரூபாய் இழப்பீடாக வழங்கப்படும் என முதல்வர் ஜெகன் மோகன் ரெட்டி அறிவித்துள்ளதாக மாநில தொழில்துறை அமைச்சர் அமர்நாத் தெரிவித்துள்ளார்.
பராமரிப்புப் பணியின்போது இந்த தீவிபத்து நிகழ்ந்ததாக காவலர்கள் தெரிவித்தனர்.
ஆந்திர மாநிலம், அனக்கா பள்ளி மாவட்டம், பரவாடா பகுதியில் தனியார் நிறுவனத்திற்குச் சொந்தமான மருந்து தயாரிக்கும் தொழிற்சாலை இயங்கி வருகிறது. இதில் உள்ள மூன்றாவது பிரிவில் திடீரென பற்றிய தீ மளமளவென பரவியது.
தீயை அணைப்பதற்குள் அந்தப் பிரிவில் இருந்த பல கோடி மதிப்பிலான அனைத்து உபகரணங் களும் எரிந்து நாசமானது.
அருகில் இருந்த ரப்பர் கிடங்கிலும் தீ பற்றியதால் கரும்புகை சூழ்ந்து, அங்கு வேலை செய்து கொண்டிருந்த ஊழியர்களுக்கு மூச்சுத் திணறல் ஏற்பட்டு மயங்கி விழுந்தனர்.
அங்கிருந்த ஒரு சில ஊழியர்கள் அலறி அடித்துக்கொண்டு வெளியே ஓடினர். 10க்கும் மேற்பட்ட ஊழியர்கள் தீவிபத்தில் சிக்கிக்கொண்டனர்.
அனக்கா பள்ளி தீயணைப்புத் துறையினர் சம்பவ இடத்திற்கு வந்து பல மணி நேரம் போராடி தீயைக் கட்டுக்குள் கொண்டு வந்தனர்.
தீயணைப்பு வீரர்கள் உள்ளே சென்று பார்த்தபோது அங்கு 4 ஊழியர்கள் அடையாளம் தெரியாத அளவுக்கு உடல் கருகிய நிலையில் இறந்து கிடந்தனர்.
ஐந்துக்கும் மேற்பட்ட ஊழியர்கள் பலத்த காயங்களுடன் உயிருக்குப் போராடிக்கொண்டு இருந்தனர்.
காயமடைந்தவர்களை மீட்ட தீயணைப்புத் துறையினர் சிகிச்சைக்காக விசாகப்பட்டினம் அரசு மருத்துவமனைக்கு அனுப்பி வைத்தனர்.
விபத்து குறித்து அனக்கா பள்ளி காவலர்கள் விசாரணை நடத்தி வருகின்றனர்.
இந்திய மருந்து தயாரிப்பு நிறுவனமான லாரஸ் லேப்ஸ் கூறுகையில், இந்திய நகரங்களான ஹைதராபாத் உட்பட எட்டுக்கும் மேற்பட்ட இடங்களில் 5,700க்கும் மேற்பட்ட ஊழியர்கள் பணியமர்த்தப்பட்டுள்ள னர்.
ஆன்டி-ரெட்ரோவைரல், ஹெப்படைடிஸ் சி மற்றும் ஆன்காலஜி மருந்துகளில் நிபுணத்துவம் பெற்ற இந்த நிறுவனம், சம்பவம் குறித்து வேறு எந்த விவரமும் தெரிவிக்காமல், விபத்து நடந்ததற்கான காரணம் குறித்து விசாரணையைத் தொடங்கி உள்ளதாகக் கூறியுள்ளது.
விபத்தில் படுகாயமடைந்த மற்ற ஊழியர்களுக்கும் மருத்துவ உதவிகளை வழங்குமாறு மருத்துவ அதிகாரிகளுக்கு அமர்நாத் உத்தரவிட்டுள்ளார்.