இந்தியாவின் சிறந்த மாநிலங்களின் பட்டியலில் தமிழகத்துக்கு இரண்டாம் இடம்

புதுடெல்லி: பல்வேறு துறைகளில் சிறந்து விளங்கும் இந்திய மாநிலங்களின் பட்டியல் வெளியாகி உள்ளது.

இந்தப் ‘பணக்கார’ மாநிலங்களின் பட்டியலில் மகாராஷ்டிரா, தமிழ்நாடு, கர்நாடகா, குஜராத் உள்ளிட்ட மாநிலங்கள் இடம்பெற்றுள்ளன.

இம்மாநிலங்கள் நிதி, தகவல் தொழில்நுட்பம், உற்பத்தி, ஏற்றுமதி ஆகிய துறைகளில் பெரும் வளர்ச்சி கண்டு வருகின்றன.

இந்தியாவின் மொத்த உள்நாட்டு உற்பத்தியின் பெரும்பகுதியை மேற்குறிப்பிட்ட பட்டியலில் இடம்பெற்றுள்ள 10 மாநிலங்கள்தான் பங்களிக்கின்றன.

மொத்த உள்நாட்டு உற்பத்தி அடிப்படையில் (ஜிடிபி), மகாராஷ்டிரா முதல் இடம் பிடித்துள்ளது. அம்மாநிலத்தின் ஏற்றுமதி மதிப்பு, 2024-25 நிதியாண்டில், ரூ.42.67 லட்சம் கோடியாக உயர்ந்துள்ளது. இது நாட்டின் மொத்த ஜிடிபியில் 13% ஆகும்.

இரண்டாம் இடத்தில் உள்ள தமிழகத்தின் பங்களிப்பு 8.90% ஆக உள்ளது.

கர்நாடகா, குஜராத், உத்தரப் பிரதேசம், மேற்கு வங்கம், ராஜஸ்தான், தெலுங்கானா, ஆந்திரப் பிரதேசம், மத்தியப் பிரதேசம் ஆகியவை முறையே 3 முதல் 10ஆம் இடங்களில் உள்ளன.

இந்தியாவின் முக்கியமான தொழில்நுட்ப மையங்களில் ஒன்றாக சென்னை மாறி வருகிறது என்றும் இதேபோல் கோவை, மதுரையும் தமிழ்நாட்டின் முக்கிய தொழில்நுட்ப நகரங்களாக மாறி வருகின்றன என்றும் தமிழக அதிகாரிகள் தெரிவித்துள்ளனர்.