அதிக உடல் எடையால் ஏற்படும் புற்றுநோய் அபாயம்

அதிகப்படியான உடல் எடை தற்போது புற்றுநோய் ஏற்படுவதற்கான இரண்டாவது முக்கியக் காரணியாக உள்ளது.

புகைபிடிக்கும் பழக்கத்தால் ஏற்படும் புற்றுநோய் அபாயம், மக்களின் உடனடி கவனத்தையும் வாழ்க்கைமுறை மாற்றத்தையும் தூண்டுகிறது.

பல ஆண்டுகளாகப் புற்றுநோய் தடுப்பு முயற்சிகள், புகைபிடிக்கும் பழக்கத்தை நிறுத்துவதில் மட்டுமே கவனம் செலுத்தி வந்துள்ளன.

தற்போது உடல் பருமன் அதிகரிப்பும், உலகளவில் புற்றுநோய் பாதிப்புகளை அதிகரித்து வருகிறது. உடல் உழைப்புக்கு முக்கியத்துவம் தராத வாழ்க்கைமுறையே இதற்கு முக்கியக் காரணம்.

அதிக உடல் எடைக்கும் புற்றுநோய்க்கும் இடையே உயிரியல் ரீதியிலான தொடர்பு உள்ளது.

அதிகப்படியான கொழுப்புத் திசுக்கள், குறிப்பாக, வயிற்றுப் பகுதியைச் சுற்றியுள்ளவை, தீவிரமான நாளமில்லா உறுப்புபோலச் செயல்பட்டு உடலில் உள்ள உட்சூழலை அடிப்படையில் மாற்றும் சுரப்பு நீர், அழற்சிப் புரதங்களை இடைவிடாமல் வெளியேற்றுகின்றன.

கொழுப்பு அணுக்கள், அதிகப்படியான ஈஸ்ட்ரோஜனை உற்பத்தி செய்கின்றன. அவை சுரப்பு நீர் உணர்திறன் கொண்ட மார்பக, குறிப்பாக மாதவிடாய் நின்ற பின்னர், கருப்பை, சினைப்பை புற்றுநோய்கள் போன்றவற்றின் வளர்ச்சியைத் தூண்டுகின்றன.

அதிக எடையுள்ளவர்கள் பெரும்பாலும் நீடித்த குறைந்த தர அழற்சியை அனுபவிக்கின்றனர். இது, புற்றுநோய் அணுக்கள் செழித்து பெருகக்கூடிய ஒரு சூழலை ஏற்படுத்துகிறது.

தொடர்புடைய செய்திகள்

நீரிழிவைத் தடுக்கும் மத்திய தரைக்கடல் உணவுப் பழக்கம்

உடல் பருமன் இன்சுலின் எதிர்ப்புக்கு வழிவகுக்கிறது. இதனால் அதிக அளவு இன்சுலின் போன்ற வளர்ச்சி காரணிகளை உடல் உற்பத்தி செய்ய வேண்டியுள்ளது. இவை புற்றுநோய் கட்டிகளின் பெருக்கத்தை ஊக்குவிக்கின்றன.

அதிக உடல் நிறை குறியீட்டெண் உள்ளவர்கள் குறைந்தது 13 வகையான புற்றுநோய்களுக்கான அபாயம் கொண்டுள்ளதாக ஆய்வுகள் காட்டுகின்றன.

பல மரபணுக் காரணிகள்போல அல்லாமல், உடல் எடை பெரும்பாலும் கட்டுப்படுத்தக்கூடிய ஒரு அம்சமாக உள்ளது.

ஆரோக்கியமான உணவு, வழக்கமான உடல் செயல்பாடு, நிலையான வாழ்க்கைமுறை மாற்றங்களுக்கு முன்னுரிமை அளிப்பதன் மூலம் உடல் எடை அதிகரிப்பதைத் தடுக்க முடியும்.

இந்த அபாயத்தைக் கணிசமாகக் குறைக்கும் ஆற்றல், அனைவரின் கைகளிலும் அன்றாடத் தேர்வுகளிலும் உள்ளது.

புற்றுநோய்க்கு எதிரான மிகச்சிறந்த செயல்பாடு நம் உடலில்தான் உள்ளது. உடல் எடையைச் சரிபார்ப்பதன் மூலம் அந்தப் பயணத்தைத் தொடங்க முடியும்.

மருத்துவர் அல்லது ஒரு உணவியல் நிபுணருடன் பேசுவது, தினசரி உடற்பயிற்சிகளை அன்றாட வழக்கத்தில் சேர்த்துக்கொள்வது போன்றவை சில எளிய வழிகள்.

புதிய பழக்கத்தை ஆரம்பிப்பது கடினமாக இருந்தாலும் ஆரோக்கியத்தை மீட்டெடுப்பதற்கான ஒவ்வொரு முயற்சியும் ஆயுட்காலத்தை நீட்டிப்பதுடன், தரமான வாழ்க்கையையும் வெகுமதியாக அளிக்கிறது.