மாணவர் முரசு
இ-பேப்பர்
புரதச்சத்து அதிகம் கொண்ட உணவு முட்டை.
உடலுக்குத் தேவைப்படும் 20 அமினோ அமிலங்கள் இதுவரை கண்டறியப்பட்டுள்ளன. அதில் 11 அமினோ அமிலங்களை உடலே உற்பத்தி செய்யும். அதில் எஞ்சிய 9 அமினோ அமிலங்களை உணவு மூலமாகவே உடல் பெற முடியும். இந்த அத்தியாவசிய 9 அமினோ அமிலங்கள் கொண்ட ஒரே உணவுப்பொருள் ‘முட்டை’ என்பது கூடுதல் தகவல்.
இதில் ஏ, டி, ஈ, கே, பி2, பி6, பி12 உள்ளிட்ட உயிர்ச்சத்துகளும் கால்சியம், பாஸ்பரஸ், பொட்டாசியம், சோடியம், இரும்பு, மெக்னீசியம், மாங்கனீசு, செலினியம், ஸிங்க் முதலிய தாதுப்பொருள்களும் உள்ளன. ஆன்டி ஆக்சிடன்ட் எனும் நோயெதிர்ப்புப் பொருள்களும் அதிகம் உள்ளன.
ஒரு முட்டையில் பொதுவாக 75 கலோரிகள், 7 கிராம் புரதம், 5 கிராம் கொழுப்பு, 1.6 கிராம் இரும்பு, உயிர்ச்சத்து, தாதுக்கள், கரோட்டினாய்டுகள் இருக்கும்.
வெள்ளைக்கருவில் ஒரு விழுக்காடுகூட கொழுப்பு கிடையாது. எனவே, உணவுக் கட்டுப்பாட்டில் இருப்பவர்கள் வெள்ளைக்கரு மட்டும் சாப்பிடுகின்றனர். ஆனால், முட்டையின் முழுச் சத்துகளைப் பெற இரண்டையும், அதாவது முழுவதுமாக முட்டையைச் சாப்பிட வேண்டும் என்றே மருத்துவர்கள் பரிந்துரைக்கின்றனர்.
மேலும், மஞ்சள் கருவில் உள்ள கொழுப்பு ஹெச்டிஎல் (லிப்போ புரதம் அதிகமுள்ள கொழுப்பு) எனும் நல்ல கொழுப்பு. அது உடலுக்குத் தேவையானதும்கூட. இந்தக் கொழுப்பு இதய நோய்களில் இருந்தும் பக்கவாதத்தில் இருந்தும் பாதுகாக்கிறது.
மஞ்சள் கருவில் கலோரி அதிகம் என்றாலும் அதில் சத்துகள் நிறைந்திருப்பதால் அதையும் சாப்பிடவே மருத்துவர்கள் கூறுகிறார்கள்.
கண்கள், மூளை, இதயம், தசைகள் என ஒட்டுமொத்த உடல் நலத்திற்குமான உணவுதான் முட்டை.
முட்டை ஒரு முழுமையான புரத உணவு. எனவே, அதனை நாளும் சாப்பிடலாம்.
நாளும் சராசரியாக முட்டை எடுத்துக்கொண்டவர்களுக்கு இதய நோய் பாதிப்பு குறைந்துள்ளது ஆய்வுகளில் உறுதிசெய்யப்பட்டுள்ளது.
முட்டை சாப்பிட்டால் உடல் எடை அதிகரிக்கும் என்று சிலர் கூறுவதுண்டு. ஆனால், உண்மையில் முட்டை உடல் எடையைக் குறைக்கிறது.
முட்டையைத் தனியாகச் சாப்பிடும்போது உடலுக்குத் தேவையான சத்து கிடைப்பதுடன் உடல் எடையைக் குறைக்கும். இது உடலில் கொழுப்பைக் கரைக்கிறது; பசியைக் குறைக்கிறது. கலோரி குறைவு என்பதாலும் உடல் எடை அதிகரிக்காது.
முடிந்தவரை மற்ற உணவுடன் முட்டை சேர்த்துச் சாப்பிடுவதைத் தவிர்க்கவும்.
முட்டையில் ஒமேகா 3 கொழுப்பு அமிலம் உள்ளதால் உடல் எடையைக் குறைப்பதுடன் இதயத்தையும் பாதுகாக்கிறது. மேலும், முட்டையில் நோயை எதிர்க்கக்கூடிய சத்துகளும் உள்ளன.
பெரியவர்கள் நாள் ஒன்றுக்கு இரண்டு முதல் மூன்று முட்டைகளைத் தாராளமாகச் சாப்பிடலாம். குழந்தைகளுக்கும் நாளும் ஒன்று கொடுக்கலாம் என்கின்றனர் மருத்துவர்கள். அதேநேரத்தில், முட்டையை வேகவைக்காமல் சாப்பிடுவது தொற்றை ஏற்படுத்தும் என்று அவர்கள் எச்சரிக்கின்றனர்.