மக்களை ஈர்த்துவரும் இரண்டாம் நிலைச் சுற்றுலாத் தலங்கள்

பயண ஆர்வலர்கள் முன்னணிச் சுற்றுலாத் தலங்களைத் தாண்டி இரண்டாம் நிலைத் தலங்களை அதிகம் தேடுவதாக அகோடா நிறுவனம் தெரிவித்துள்ளது.

தனித்துவமான சுற்றுப்பயண அனுபவங்களைப் பெறும் ஆவல் பயணிகளிடையே அதிகரித்துவரும் நிலையில், அவ்வகை இரண்டாம்நிலைத் தலங்களில் தங்குமிடங்களுக்கான முன்பதிவுகள் அதிகரிப்பதைப் பயண முன்பதிவுத் தளமான அகோடா சுட்டிக்காட்டியுள்ளது.

இது, பயண அனுபவத்தை மேம்படுத்துவதுடன், புதிய இடங்களைச் சேர்ந்தோர்க்குப் பொருளியல் வளர்ச்சி வாய்ப்புகளையும் வழங்கும் என்றும் நிறுவனம் கூறியது.

உலகச் சுற்றுலா தினத்தையொட்டி இதனை வெளியிட்ட அகோடா, ஆசியாவில் இந்தியா, இந்தோனீசியா, ஜப்பான், மலேசியா, தாய்லாந்து உள்ளிட்ட நாடுகளின் சுற்றுலா அமைச்சுகளும் தங்கள் இரண்டாம்நிலைச் சுற்றுலாத் தலங்களுக்கு வருகையளிக்க ஊக்குவிப்பதாகக் கூறியுள்ளது.

பல்வேறு வட்டாரங்களின் விமான நிலையங்களை மேம்படுத்தும் இந்தியாவின் ‘உடான்’ திட்டம், இந்தோனீசியாவின் ‘முன்னுரிமைச் சுற்றுலாத் தலங்கள்’ முயற்சி, மலேசியாவின் ‘இரண்டாம் நிலை இலக்கு முதலீட்டு மண்டலங்கள் எனப் பல்வேறு நாடுகளும் தங்கள் நாடுகளின் சுற்றுலாத் துறையை மேம்படுத்த இவ்வாய்ப்பைப் பயன்படுத்திக்கொள்கின்றன.

அகோடா நிறுவனம் வெளியிட்டுள்ள தரவின்படி, 2023ஆம் ஆண்டைவிட 2025ஆம் ஆண்டில் ஆசிய நாடுகளில் இரண்டாம்நிலை சுற்றுலாத் தலங்களுக்கான தேடல் அதிகரித்துள்ளது. இந்தோனீசியாவில் 57 விழுக்காடு, இந்தியாவில் 19 விழுக்காடு, ஜப்பானில் 74 விழுக்காடு, மலேசியாவில் 22 விழுக்காடு எனத் இந்தத் தேடல் அதிகரித்துள்ளதை நிறுவனம் சுட்டியது.

இவ்வகைத் தலங்களின் மீதான ஈர்ப்பு அவ்விடங்களின் வளர்ச்சிக்கும் பங்களிக்கும் என்றும் அதற்கு அகோடா நிறுவனம் ஆதரவாக அமைவதில் பெருமை என்றும் அந்நிறுவனம் தெரிவித்தது.