மாணவர் முரசு
இ-பேப்பர்
சமூக ஊடகத் தளங்கள் நமது அன்றாட வாழ்க்கையில் இன்றியமையாதவையாக உருவெடுத்துவிட்டன.
தமிழ் முரசு உட்பட பல ஆண்டுகளாக இயங்கிவரும் முன்னணி ஊடகங்களும் சமூக ஊடகத் தளங்களைப் பெரிதும் பயன்படுத்தி வருவது நமக்குத் தெரிந்ததே. இளையர்களை, அவர்களுக்கு விருப்பமான முறைகளில் செய்தி, நடப்பு விவகாரங்கள், சமூக நடப்புகள் ஆகியவற்றைச் சென்றடையச் செய்வது இலக்காகும்.
குறிப்பாக, ‘ஜென் ஸி’ என்றழைக்கப்படும் வயதுப் பிரிவில் உள்ள இளையர்கள் அதிகம் பயன்படுத்துபவையாக இன்ஸ்டகிராம், டிக்டாக், யூடியூப் போன்ற சமூக ஊடகத் தளங்கள் பார்க்கப்படுகின்றன. சமூக ஊடகங்களைப் பயன்படுத்தாமல் எந்த நிறுவனமும் செயல்படுவது சிரமம் என்பது பரவலான கருத்தாகும்.
இந்நிலையில், சமூக ஊடகங்களுக்கு இருந்த மோகம் இப்போது குறைந்து வருவதாக சில புள்ளிவிவரங்கள் காட்டுகின்றன. அண்மையில் ஃபைனான்ஷியல் டைம்ஸ் ஊடகத்தில் வெளியான ‘சமூக ஊடக மோகம் உச்சத்தைத் தொட்டுக் களையிழந்து வருகிறதா’ (ஹேஸ் சோஷியல் மீடியா ஃபைனலி பீக்ட்) என்ற தலைப்பைக் கொண்ட கட்டுரையில் இத்தகவல் தெரிவிக்கப்பட்டது.
கடந்த 2022ஆம் ஆண்டில் சமூக ஊடகப் பயன்பாடு உச்சத்தைத் தொட்டது. அதற்குப் பிறகு பயன்பாடு குறைந்து வருவதாக அக்கட்டுரை குறிப்பிடுகிறது.
கருத்தாய்வு மூலம் 50க்கும் மேற்பட்ட நாடுகளைச் சேர்ந்த 250,000 பெரியவர்களின் இணையப் பழக்க வழக்கங்கள் ஆராயப்பட்டன. ஃபைனான்ஷியல் டைம்சுக்காகப் பயனர் பழக்கங்களை ஆராயும் நிறுவனமான ஜிடபிள்யுஐ (GWI) அக்கருத்தாய்வை நடத்தியது.
கொவிட்-19 தொற்றுப் பரவல் காலத்தின்போது சமூக ஊடகத் தளங்கள் அதிகம் பயன்படுத்தப்பட்டன. பிறகு அந்தப் போக்கில் சிறிதளவு மாற்றம் ஏற்படுவது இயல்புதான்.
ஆனால், அதற்கும் அப்பால் பயன்பாட்டுப் பழக்க வழக்கங்களில் மாறுதல் ஏற்பட்டுள்ளது.
தொடர்புடைய செய்திகள்
உலகம் முழுவதும் 16 வயதைக் கடந்தவர்கள் நாள்தோறும் சராசரியாக இரண்டு மணிநேரம் 20 நிமிடங்கள் சமூக ஊடகத் தளங்களில் செலவிடுவது கருத்தாய்வில் தெரிய வந்துள்ளது. இது, 2022ல் பதிவானதைவிட கிட்டத்தட்ட 10 விழுக்காடு குறைவாகும்.
அதிலும் சமூக ஊடகங்களை அதிகம் பயன்படுத்துவதாகக் கருதப்படும் பதின்ம வயதினர், 20 வயதைக் கடந்தவர்கள் ஆகியோருக்கிடையே இந்தப் போக்கு காணப்படுவதாகத் தெரிவிக்கப்பட்டுள்ளது. மேலும், இவ்வாண்டுத் தொடக்கத்திலிருந்தே சமூக ஊடகங்களின் பயன்பாடு குறைந்துவருவதற்கான அறிகுறிகள் தென்படுவதாகப் பல கட்டுரைகள் வெளிவந்துள்ளன.
அப்படியிருக்கையில், சமூக ஊடகங்கள் இல்லாமல் ‘வாழ்க்கை இல்லை’ என்ற கருத்து இன்னும் செல்லுபடியாகுமா என்ற கேள்வி எழலாம்.
சமூக ஊடகங்கள் அன்றாட வாழ்க்கையிலும் நிறுவன நடைமுறைகளிலும் தொடர்ந்து பெரும்பங்கு வகிக்கும் என்பதில் மாற்றுக் கருத்து இராது. ஆயினும், 10 ஆண்டுகள் கழித்து சமூக ஊடகங்களுக்குத் தற்போதிருக்கும் முக்கியத்துவம் இருக்குமா என்பதற்கான பதில் தற்போதைக்கு நம்மிடையே இல்லை.
அப்படியென்றால் நிலைமை பெரிதும் மாறுவதற்கு முன்பே நடைமுறைகளைக் காலத்துக்கு ஏற்றவாறு மாற்றிக்கொள்ளும் தருணத்தில் நாம் இப்போது இருக்கலாம்.
அண்மைக் காலமாகவே சமூக ஊடகங்களில் காணப்படும் பரவலான கருத்துகளுக்கும் நடைமுறை நிகழ்வுகளுக்கும் அதிகத் தொடர்பில்லாமல் இருப்பதை நாம் பார்த்திருக்கலாம். தேர்தல்கள், விளையாட்டு, திரையுலகம் போன்றவற்றில் இதைக் கண்டிருப்போம்.
பலர் வெளிப்படையாகக் கூறக் கூச்சப்படுபவற்றை சமூக ஊடகங்களில் பதிவிடலாம். ஆனால், நடைமுறை வாழ்க்கையில் மனத்தில் பட்டதைப் பட்டென்று உடைத்துச் சொல்ல சிரமப்பட்டு, தனிப்பட்ட கருத்துகளுக்கு ஏற்ப நடந்துகொள்ளாமல் இருக்கலாம். சிந்தித்துப் பார்த்தால் இது ஓரளவு மனித இயல்பும்கூட.
அதனால், சமூக ஊடகங்கள்தான் எல்லாம் என்ற மனப்போக்கில் மாற்றம் தேவையா என்பது ஆலோசிக்கவேண்டிய ஒன்றாக இருக்கிறது.
அண்மையில் ‘கார்டியன்’ ஊடகத்தில் வெளியான கட்டுரையிலும் 16லிருந்து 21 வயதுக்கு இடைப்பட்ட இளையர்கள் பலர் சமூக ஊடகங்களிலிருந்து ‘விலகி நிற்பதாக’ தெரிவிக்கப்பட்டது. ஆய்வு ஒன்றின் முடிவுகளை மேற்கோள்காட்டிய அக்கட்டுரை, இளையர்களில் கிட்டத்தட்ட பாதிப் பேர் சமூக ஊடகங்கள் இல்லாத உலகில் வாழ விரும்புவதாகத் தெரிவித்துள்ளது.
அத்துடன், சமூக ஊடகப் பயன்பாட்டுக்கும் மனநலத்திற்கும் உள்ள தொடர்பைப் பற்றிப் பல கட்டுரைகள் வெளிவந்துவிட்டன. அவையும் இளையர்களின் மாறுபட்ட போக்கிற்குக் காரணமாக இருக்கலாம்.
அப்படியிருக்கையில், மக்கள் அதிலும் இளையர்களிடையே சமூக ஊடக மோகம் தணிந்து, மறுபடியும் சமூகம் சார்ந்த பழக்க வழக்கங்களில் அதிகம் ஈடுபடத் தொடங்கிவிட்டனரா என்று கேட்கவும் தோன்றுகிறது.
சமூக ஊடகங்களுக்கு அப்பால், நிலவரத்தை அறிய முற்படும் நிலை வந்துவிட்டதுபோல் தெரிகிறது.