மாணவர் முரசு
இ-பேப்பர்
வாட்ஸ்அப் உரையாடல்களை ஆண்ட்ராய்ட் திறன்பேசியில் இருந்து புதிய ஐபோனுக்கு மாற்றும் வசதியை 'மெட்டா' நிறுவனம் விரைவில் வழங்க இருப்பதாகத் தகவல் வெளியாகி இருக்கிறது.
இப்போது, புதிதாக ஐபோன் வாங்குவோர் தங்களது ஆண்ட்ராய்ட் திறன்பேசியில் இருந்து வாட்ஸ்அப் உரையாடல்களை எந்த வழியிலும் பரிமாற்றம் செய்ய இயலாது.
இருப்பினும், சில சாம்சுங், கூகல் பிக்சல் திறன்பேசிகளில் இருந்து வாட்ஸ்அப் உரையாடல்களை ஐபோனுக்கு மாற்றும் வசதியை 'மெட்டா' நிறுவனம் கடந்த ஆண்டு அறிமுகப்படுத்தியது.
இப்போது அந்த வசதியை அதிகமான ஆண்ட்ராய்ட் திறன்பேசிகளில் அறிமுகப்படுத்த அந்நிறுவனம் திட்டமிட்டுள்ளதாகத் தெரிகிறது.
வாட்ஸ்அப் குறித்த அண்மைய தகவல்களை வெளியிடும் 'டபிள்யூஏபீட்டாஇன்ஃபோ' தளம் மூலமாக இது தெரியவந்து உள்ளது.
வாட்ஸ்அப் உரையாடலைப் பரிமாற்றம் செய்வதற்குப் பயனரின் ஒப்புதலைக் காட்டும் படம் ஒன்றையும் அச்செய்தி காட்டுகிறது.
ஆனாலும், இந்த வசதி அறிமுகப்படுத்தப்பட சிறிதுகாலம் ஆகலாம் என்று அச்செய்தி கூறுகிறது.
கடந்த செப்டம்பரில் வாட்ஸ்அப் வெளியிட்ட 'பீட்டா' பதிப்பின்மூலம் ஆண்ட்ராய்ட் திறன்பேசியில் இருந்து தங்களது உரையாடல்களுக்கு ஐபோனுக்கு மாற்றும் வசதி விரைவில் அறிமுகப்படுத்தப்படும் எனக் கோடிகாட்டியிருந்தது.
இப்படி வாட்ஸ்அப் உரையாடலை மாற்றிக்கொள்ள 'லைட்னிங் - யுஎஸ்பி சி' கம்பிவடத்தைப் பயனர்கள் பயன்படுத்த வேண்டியிருக்கலாம். அத்துடன், இதற்கு ஆப்பிள் நிறுவனத்தின் 'மூவ்' செயலியையும் பயனர்கள் தங்களது ஆண்ட்ராய்ட் திறன்பேசியில் நிறுவ வேண்டியிருக்கலாம்.
சாம்சுங் திறன்பேசிகளில் இருந்து வாட்ஸ்அப் உரையாடல்களைப் புதிய ஐபோனுக்கு மாற்றும் வசதி கடந்த ஆண்டு ஆகஸ்ட்டில் அறிமுகப்படுத்தப்பட்டது. அதனைத் தொடர்ந்து, கூகல் பிக்சல் திறன்பேசிகளில் 2021 அக்டோபரில் அவ்வசதி அறிமுகப்படுத்தப்பட்டது.
ஆண்ட்ராய்ட் 12 இயங்குதளத்தைக் கொண்டிருக்கும் அந்நிறுவனங்களின் திறன்பேசிகளில் இவ்வசதி இருப்பதாகச் சொல்லப்படுகிறது.