மாணவர் முரசு
இ-பேப்பர்
கடந்த ஐந்தாண்டுகளாக 'சிங்கப்பூர் இலக்கியங்களை வாங்குங்கள்' (BuySingLit) என்ற இலக்கிய இயக்கம், உள்ளூர் இலக்கிய நூல்களை வாங்க வைப்பதன் மூலம் சிங்கப்பூர் இலக்கியத்தை ஆதரித்து வளர்க்கும் முயற்சிகளை மேற்கொண்டு வந்தது.
இலக்கியத் துறையினரால் செயல்படுத்தப்படும் இந்த இயக்கத்தின் அடுத்த கட்டமாக, இலக்கியத்தை அறியச் செய்யும் முயற்சிகள் முன்னெடுக்கப்பட உள்ளன.
'சிங்கப்பூர் இலக்கியம்: நம் உலகை வாசிப்போம்' என்ற புதிய பெயருடன் இந்த ஆண்டு நிகழ்ச்சிகள் ஏற்பாடு செய்யப்படுகின்றன.
கடந்த 2017ல் தொடங்கப்பட்ட இந்த இயக்கம், ஒவ்வோர் ஆண்டும் மார்ச் மாதம் நடைபெறும் இரண்டு வார இறுதி இலக்கிய விழாவுக்குப் பதிலாக, சிங்கப்பூர் இலக்கியத்தை வாசகர்களுக்கு கொண்டுசெல்ல ஆண்டு முழுவதும் முயற்சிகளை மேற்கொள்ள உள்ளது.
அதன் ஓர் அங்கமாக இம்மாதம் 'சிங் லிட்' நிலையம் 'புளோக்' கொண்டாட்டத்துக்கு ஏற்பாடு செய்துள்ளது. இதில் மெய்நிகர் நிகழ்ச்சிகள், குழு விவாதங்கள் போன்றவை இடம்பெறும்.
"சிங்கப்பூர் இலக்கியத்தை வாசிக்க ஊக்குவிக்கும் இந்த இயக்கம் எங்களைப் போன்ற எழுத்தாளர்களின் படைப்புகளுக்கும் ஒருங்கிணைத்த குரல்களுக்கும் பேராதரவாக விளங்குகிறது," என்றார் எழுத்தாளரும் மொழிபெயர்ப்பாளருமான முனைவர் அனிதாதேவி பிள்ளை.
"சிங்கப்பூர் இலக்கியம் என்பது நமது இலக்கியம், நமது கதைகள். கண்ணாடியில் தெரியும் பிம்பம் போல் நம்முடைய முகத்தை நாமே காண்பதுபோல் நம் கதைகளை நாம் பேசுகிறோம்.
"இங்குதான் நாம் உண்மையாக நமது குரலை நேர்மையோடு பதிவு செய்கிறோம். சிங்கப்பூர் வாழ்வியல் சார்ந்தவை அனைத்தையும் உள்ளடக்கியதே சிங்கை இலக்கியமாகும்," என்றார் தேசியக் கல்விக்கழகம், நன்யாங் தொழில்நுட்பப் பல்கலைக்கழகத்தில் மூத்த விரிவுரையாளராகப் பணியாற்றும் முனைவர் அனிதாதேவி.
இந்த ஆண்டு இயக்கத்தின் ஓர் அங்கமாக மார்ச் மாதம் சிங்கப்பூர் புத்தக வெளியீட்டாளர்கள் சங்கத்தின் புத்தகச் சந்தை இடம்பெறுகிறது.
ஏப்ரல் 16ஆம் தேதி தமிழ் நிகழ்ச்சிகள் ஏற்பாடு செய்யப்பட்டுள்ளன.
கடந்த 2017ல் தொடங்கப்பட்ட இந்த இயக்கத்தை சிங்கப்பூர் புத்தக மன்றம், சிங்கப்பூர் புத்தக வெளியீட்டாளர் சங்கம் ஆகியவை வழிநடத்துகின்றன.
நிகழ்ச்சி குறித்த மேல் விவரங்களை https://singlit.world/ என்ற இணையப்பக்கத்தில் காணலாம். ஃபேஸ்புக்: https://www.facebook.com/singlit.world
புத்தகம் வெளியிடும் ஆர்வம் உள்ளவர்கள் https://t.me/singlitislit இணையப்பக்க முகவரியில் (டெலிகிராம் குழு) எழுத்தாளர்கள், வெளியீட்டாளர்கள், மொழிபெயர்ப்பாளர்கள், சித்திரக் கலைஞர்கள், ஆசிரியர்கள், வாசகர்களுடன் தொடர்புகொள்ளலாம்.
கூடுதல் செய்தி: சக்தி மேகனா