மாணவர் முரசு
இ-பேப்பர்
சமந்தா பெண்கள் பலருக்கும் தொடர்ந்து உத்வேகம் தந்து வருகிறார். குறிப்பாக, ஆரோக்கியத்தில் அக்கறை செலுத்துவதிலும் உடற்கட்டுடன் இருப்பதிலும் அவர் அதிக ஆர்வம் காட்டி வருகிறார். அவரது எளிமையான உணவு முறை, உடற்பயிற்சி வழக்கமே அவரை இன்றுவரை ஃபிட்டாகவும் ஆரோக்கியமாகவும் வைத்திருக்கிறது. எடைப் பயிற்சி, புஷ்-அப் பயிற்சிகள், யோகா, சைக்கிள், இதயத்திற்கான 'கார்டியோ' ஆகியவை சமந்தா செய்யும் பயிற்சிகளாகும்.
அண்மைய இன்ஸ்டகிராம் பதிவில், சமந்தா தனது பயிற்சியாளர் ஜுனைத் ஷேக்குடன் ஜிம்மில் உடற்பயிற்சி செய்யும் காணொளி யைப் பகிர்ந்துகொண்டார்.
அது அனைவரையும் ஊக்குவிக்கும் விதமாக இருந்தது.
"முழங்காலைப் பயன்படுத்தி ஜம்பிங் ஸ்குவாட் (kneeling jump squat) செய்யவேண்டும். இதில் எந்தக் கருவியும் பயன்படுத்தக் கூடாது. உங்கள் கலோரிகளை எரிக்கவும் உடல் எடையைக் குறைக்கவும் இதுவே நல்ல தொடக்கம். இதைச் செய்தால் உடனே நல்ல பலன் கிடைக்கும்," எனக் கூறியுள்ளார்.
பயிற்சி வழிமுறை:
படி 1: இரு கைகளையும் இறுகப் பிடித்து கால்களையும் மடக்கி மண்டியிட்டவாறு அமர வேண்டும்.
படி 2: பின் மூச்சை நன்கு உள்ளிழுக்கவும். பின்னர் மூச்சை வெளிவிட்டு ஓய்வு அடையுங்கள்.
படி 3: இறுதியாக உங்கள் ஒட்டுமொத்த ஆற்றலையும் பயன்படுத்தி குதித்து அமருங்கள்.
படி 4: நீங்கள் ஆரம்ப நிலைக்குத் திரும்பும்போது மூச்சை உள்ளிழுக்கவும்.
நீங்கள் முழங்காலில் ஜம்ப் ஸ்குவாட் செய்யும்போது, உங்கள் கால், இடுப்பு, தொடை எலும்புகள் மற்றும் முதுகுத் தண்டுவடத்தில் கலோரிகள் குறைவதை உணரலாம். இந்த உடற்பயிற்சி குறுகிய காலத்தில் அதிக அளவு கலோரிகளை எரிக்க உதவுகிறது.
அதேநேரத்தில் உங்கள் வளர்சிதை மாற்ற விகிதத்தை 48 மணிநேரம் வரை அதிகரிக்கிறது. இந்த உடற்பயிற்சி உங்கள் நடு, கீழ் முதுகு வலிமையையும் மேம்படுத்துகிறது என்கிறார் சமந்தா.
உடற்கட்டு ஆர்வலரான 33 வயது சமந்தா உடற்பயிற்சிக் கூடத்தில் 75 கிலோ, 78 கிலோ, 80 கிலோ வரையிலான எடைகளை சர்வசாதா ரணமாகத் தூக்கும் காணொளி யைத் தனது இன்ஸ்டகிராம் பக்கத்தில் பகிர்ந்துள்ளார். இந்தக் காணொளி சமூக வலைத்தளத்தில் பரவி வரும் நிலையில், சமந்தாவின் முயற்சி தங்களுக்கு முன்மாதிரியாக இருப்பதாக பலரும் கருத்து தெரிவித்து வருகின்றனர்.
தனது உணவுப் பழக்கம் குறித்து ஒரு நேர்காணலில் சமந்தா கூறுகையில், காலை உணவில் அவகாடோ, முட்டைகள் இருக்கும். பின்னர் மதிய உணவில் மீன் அல்லது ஆட்டு இறைச்சியை எடுத்துக்கொள்கிறேன். சில நேரங்களில் மாலையில் பசி ஏற்பட்டால், சர்க்கரை வள்ளிக்கிழங்கு அல்லது முட்டைகளை வேகவைத்து எடுத்துக்கொள்வேன். இரவு உணவு என்று வரும்போது, நான் சில காய்கறிகள், ஆட்டிறைச்சி அல்லது மீனைத் தேர்ந்தெடுத்து சாப்பிடுவேன். ஞாயிற்றுக்கிழமையில் பிரியாணி, இறால் மற்றும் அனைத்து வகையான காரமான உணவுகளையும் சாப்பிடுவேன் என்றும் சமந்தா கூறியுள்ளார்.