மாணவர் முரசு
இ-பேப்பர்
உலகளவில் பணவீக்கம் உயர்வு, உக்ரேன்-ரஷ்யா போர் உள்ளிட்ட காரணங்களால் அதிகரிக்கும் வாழ்க்கைச் செலவினம்
பெட்ரோல், மின்சாரம், முட்டை போன்ற அத்தியாவசியப் பொருள்களின் விலை உயர்ந்துகொண்டே செல்கிறது. உலகளவில் பணவீக்கம், தளவாடம் தொடர்பான செலவினம், உக்ரேன்-ரஷ்ய போர் உள்ளிட்ட அம்சங்கள் விலையுயர்வுக்கு காரணமாக உள்ளன.
என்றாலும், சிறுசிறு உத்திகளைப் பின்பற்றுவதன் மூலம் வாழ்க்கை செலவினம் உயர்வதன் தாக்கத்தை நீங்கள் குறைக்கலாம்.
வெளியே சாப்பிடுவதைக் குறைத்துக்கொள்வது, மலிவு விற்பனையில் பொருள் வாங்குவது உள்ளிட்டவை சில அடிப்படை உத்திகள்.
1. மளிகைப் பொருள் செலவைக் குறைக்க உணவு சமைப்பதில் முன்கூட்டியே திட்டமிடுதல்
நான்கு பேர் கொண்ட குடும்பத்துக்காக இரு வாரங்களுக்கான சமையலுக்குத் திட்டமிடுவதால் ரடியா பிஸ்மில்லாவால் செலவினத்தைக் குறைக்க முடிகிறது.
"முன்னதாக, எனது குடும்பத்துக்குத் தேவையான அளவைவிட அதிகமாக நான் சமைத்தேன். அதனால், உணவுக் கழிவும் அதிகரித்தது.
"உணவு சமைக்க திட்டமிடுவதால், பணத்தைச் சேமிப்பதுடன் நேரத்தையும் மிச்சப்படுத்த முடிகிறது. என்ன சமைப்பது என்பதை நான் திட்டமிடவில்லை என்றால், குளிர்பதனப் பெட்டியைத் திறந்து சமையலுக்குத் தேவையான பொருள்கள் இருக்கிறதா எனப் பார்க்கும்போது, சமையலுக்கு மற்ற பொருள்களை வாங்க வேண்டும் என நினைப்பேன்," என்றார் திருமதி ரடியா, 30.
2. மலிவு விலையில் உணவை வாங்கவும்
இல்லத்தரசியான மேக்டலின் பேலனுக்கு தோ பாயோ ஈரச்சந்தையில் கட்டுப்படியான விலையில் மீன் கிடைக்கிறது.
"கானாங்கெளுத்தி முழு மீனை நான் ஏறத்தாழ $13க்கு வாங்க முடிகிறது. பேரங்காடிகளில் இதே மீன் துண்டுகள் இன்னும் கூடுதல் விலைக்கு விற்கப்படுகிறது," என்றார் அவர்.
உணவு காலாவதியாகும்தேதி நெருங்கும்போது அதன் விலை குறைக்கப்படும். அத்தகைய உணவை அவர் வாங்குவார்.
விலையுயர்ந்த சின்ன பொருள்களுக்குப் பதிலாக ஃபேர்பிரைஸ் சின்ன பொருள்களை வாங்குவது மற்றொரு உத்தி.
3. மின்னியல் சாலைக் கட்டணத்தைத் தவிர்க்கவும்
கூகல் மேப்ஸ் செயலி, தனது கார் பயணத்துக்குத் திட்டமிட உதவுவதுடன், மின்னியல் சாலைக் கட்டண வாயில்களைத் தவிர்க்கவும் அச்செயலி உதவியாக இருப்பதாக திரு கீத் ஓங் கூறுகிறார்.
மின்னியல் சாலைக் கட்டணத்தைத் தவிர்ப்பதற்கான தெரிவு அச்செயலியில் உள்ளது. மேலும், போக்குவரத்து நெரிசல் குறைந்த பாதைகளைத் தேர்ந்தெடுக்கவும் கூகல் மேப்ஸ் உதவும் என்கிறார் திரு ஓங். இதனால், போக்குவரத்து நெரிசலில் சிக்கிக்கொள்வதைத் தவிர்க்க முடிவதால் நேரத்தையும் பெட்ரோலையும் மிச்சப்படுத்தலாம் என்கிறார் திரு ஓங்.
4. தள்ளுபடி விலையில் பெட்ரோல் வாங்கவும்
கடன் பற்று அட்டைகள், லாயல்டி அட்டைகள், செயலிகள், வெகுமதி புள்ளிகள் போன்றவற்றைப் பயன்படுத்தி பெட்ரோல் விலையில் தள்ளுபடியைப் பெறலாம்.
அத்தகைய அட்டைகளைப் பயன்படுத்துவதன் மூலம் பெட்ரோல் கட்டணத்தில் கிட்டத்தட்ட 21 விழுக்காடு தள்ளுபடி பெற முடிவதாக திரு கிளேர் டோ கூறினார்.
5. பயனீட்டுச் சேவை வழங்குநர்களை மாற்றவும்
ஓராண்டிற்கு முன்பு வேறொரு பயனீட்டுச் சேவை வழங்குநருக்கு மாறினார் திருமதி டோ. அதைத் தொடர்ந்து, மாதக் கட்டணம் 5 விழுக்காடு குறைந்ததை அவர் உணர்ந்தார்.
அதோடு, கடன் பற்று அட்டைகளைக் கொண்டு பயனீட்டுக் கட்டணம் செலுத்தும்போது விலைத் தள்ளுபடி கிடைக்கிறதா என்பதையும் பார்க்குமாறு பயனீட்டாளர்களுக்கு அவர் ஆலோசனை வழங்குகிறார்.
"ஒவ்வொரு முறையும் நாம் சேமிக்கும் பணம் குறைவாக இருக்கலாம். ஆனால், சிறுதுளி பெருவெள்ளம்," என்கிறார் அவர்.
6. 'சிம்' மட்டுமான கைபேசித் திட்டத்துக்கு மாறலாம்
சொத்துச் சந்தை ஆலோசகரான திரு நிக்கலஸ் ஹுவாங், 37, ஈராண்டுகளுக்கு முன்பு வழக்கமான கைபேசித் திட்டத்தைக் கைவிட்டு சிம் மட்டுமான திட்டத்துக்கு மாறினார்.
உங்களது திறன்பேசியில் உள்ள சிம் அட்டையில் நீங்கள் பயன்படுத்தும் நிமிடங்கள், குறுஞ்செய்திகள், தரவுக்கு மட்டும் கட்டணம் செலுத்த இத்திட்டம் வகை செய்கிறது.
தமது பணியில் திரு ஹுவாங்கின் கைபேசி பயன்பாடு அதிகமாக இருந்தாலும், கைபேசிக் கட்டணம் $200லிருந்து $35ஆக குறைந்தது.
7. இணையத்தில் பொருள் வாங்கும்போது பற்றுச்சீட்டுகளைப் பெறவும்
இணையத்தில் பொருள் வாங்கும்போது விலைக்குத் தகுந்த மதிப்பைப் பெற 'ஷாப்பேக்' செயலியைப் பதிவிறக்கம் செய்துகொள்ளுமாறு திருமதி செர் பரிந்துரைக்கிறார். ஷாப்பி, ஃபுட்பாண்டா, லஸாடா, ஸலோரா உள்ளிட்ட பிரபல மின் வணிகத் தளங்களில் 'கேஷ்பேக்' பற்றுச்சீட்டுகளை அச்செயலி வழங்குகிறது.
8. முன்னதாக பயன்படுத்தப்பட்ட பொருள்களை வாங்கலாம்
'கேரோசெல்' மின் வணிகத் தளத்தில் ஏற்கெனவே பயன்படுத்தப்பட்ட துணிமணிகளை திருமதி செர் வாங்கி விற்கிறார். நல்ல நிலையில் உள்ள துணிகளை பாதி அல்லது அதற்கும் குறைவான விலையில் அவர் வாங்குகிறார்.
விளையாட்டுப் பொருள்கள், நூல்கள், குழந்தைகள் பயன்படுத்தும் பொருள்கள் என பல்வேறு பொருள்களை அவர் வாங்கியிருக்கிறார்.
9. செலவினத்தைக் கண்காணிக்கவும்
ஒருவரது செலவினத்தைக் கட்டுப்படுத்த வரவுசெலவு, நிதித் திட்டமிடுதல் செயலிகளைப் பயன்படுத்துமாறு வங்கி ஊழியர் நவின் ஸ்ரீகந்தன், 31, அறிவுறுத்துகிறார்.
வெவ்வேறு கடன்பற்று அட்டைகளின் அனுகூலங்களைப் பற்றி ஆராய்வது முக்கியம் என அவர் வலியுறுத்துகிறார்.
"ஒவ்வொரு பிரிவிலும் நீங்கள் ஏறக்குறைய எவ்வளவு செலவு செய்கிறீர்கள் என்பதை நீங்கள் கண்டறியும்போது உங்களது செலவினத்தை நீங்கள் கண்காணிக்க முடியும்," என்கிறார் அவர்.
"உங்களது செலவினத்தைப் பற்றி நீங்கள் தெரிந்துகொள்ளும்போதுதான் அதைக் கட்டுப்படுத்த முயற்சி எடுக்க முடியும்," என்றும் அவர் கூறினார்.